ព័ត៌មានជាតិ

ក្រសួងការបរទេសតវ៉ាចំពោះសកម្មភាពរបស់ថៃដែលយកដីដែលឈ្លានពានពីខ្មែរទៅចែកពលរដ្ឋខ្លួន

បានផុស

២ ខែ មុន

នៅ

ថ្ងៃអាទិត្យ ២២ មីនា ២០២៦

ដោយ

ក្រសួងការបរទេសកម្ពុជាបានតវ៉ាចំពោះសកម្មភាពរំលោភបំពានលើអធិបតេយ្យភាព និងបូរណភាពទឹកដីកម្ពុជា ដោយក្នុងនោះបានកត់សម្គាល់ថាថៃបានចាប់ផ្ដើមធ្វើសកម្មភាពវាស់ដីដែលឈ្លានពានខ្មែរយកទៅចែកពលរដ្ឋខ្លួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្ដីប្រកាសថ្ងៃទី២០ ខែមីនា ក្រសួងការបរទេសកម្ពុជាថាក្រសួងបានទទួលសេចក្ដីរាយការណ៍ពីការចូលមកវាស់ដីដែលឈ្លានពានខ្មែរបាននៅក្នុងតំបន់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ចំនួន៣កន្លែងទៅឱ្យពលរដ្ឋថៃ លើសពីនេះថៃក៏បានសាងសង់ផ្លូវ និងសំណង់បេតុងផ្សេងៗពីប្រាសាទខ្នារ ឆ្ពោះទៅតំបន់ប្រាសាទតាក្របីផងដែរ។

ក្រសួងការបរទេសបានបញ្ជាក់ថា៖ «នៅថ្ងៃទី១៨ ខែមីនា ឆ្នាំ២០២៦ កងកម្លាំងប្រដាប់អាវុធថៃ រួមជាមួយមន្ត្រីនាយកដ្ឋានព្រៃឈើ និងមន្ត្រីសុរិយោដី បានធ្វើសកម្មភាពវាស់វែងដីធ្លី និងបែងចែកដីចំនួន៣កន្លែងដល់ប្រជាពលរដ្ឋថៃ នៅក្នុងតំបន់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ស្ថិតនៅចន្លោះបង្គោលព្រំដែនលេខ៤៦ និង៤៧»។

រាជរដ្ឋាភិបាលកម្ពុជាសង្កត់ធ្ងន់ថា កម្ពុជាមិនទទួលយកខ្សែព្រំដែន ឬការទាមទារទឹកដីណាមួយតាមការអះអាងជាឯកតោភាគីដោយប្រទេសថៃឡើយ។ សកម្មភាពខាងលើមិនប៉ះពាល់ដល់សិទ្ធិ និងជំហរស្របច្បាប់របស់កម្ពុជាលើការកំណត់ព្រំដែនអន្តរជាតិរបស់កម្ពុជានោះទេ។

កម្ពុជាក៏អំពាវនាវឱ្យថៃបញ្ឈប់សកម្មភាពក្នុងតំបន់ខាងលើ និងតំបន់ផ្សេងទៀតក្រោមកាលៈទេសៈស្រដៀងគ្នានេះ ដោយចៀសវាងធ្វើសកម្មភាពឯកតោភាគីបន្ថែមទៀត និងធានាការអនុវត្តរាល់កិច្ចព្រមព្រៀងពាក់ព័ន្ធរវាងប្រទេសទាំងពីរឱ្យបានពេញលេញ និងសុច្ឆន្ទៈ សំដៅបន្ធូរបន្ថយស្ថានការណ៍ លើកកម្ពស់ទំនុកចិត្តគ្នាទៅវិញទៅមក និងរក្សាសន្ដិភាព ស្ថិរភាព និងភាពជាអ្នកជិតខាងល្អតាមបណ្ដោយតាមព្រំដែនកម្ពុជា-ថៃ។

អត្ថបទដោយ ហ៊ុន សិរីវឌ្ឍន៍