ណេតាន់យ៉ាហ៊ូ៖ ទោះ​អាមេរិកនិង​អ៊ីរ៉ង់ឈប់​វាយគ្នា ក៏អ៊ីស្រាអែល​បន្តបាញ់​លីបង់មិនដកដៃ​ឡើយ

សភាពការណ៍នៅមជ្ឈិមបូព៌ាកាន់តែស្មុគស្មាញ បន្ទាប់ពីលោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានប្រកាសយ៉ាងច្បាស់ៗទៅកាន់រដ្ឋាភិបាល​អាមេរិក​ថា ទោះបី​ក្រុង​វ៉ាស៊ីនតោន​ និងអ៊ីរ៉ង់ អាចឈានដល់កិច្ចព្រមព្រៀងសន្តិភាពណាមួយក៏ដោយ ក៏អ៊ីស្រាអែលនឹងមិនបញ្ឈប់ការវាយប្រហារយោធារបស់ខ្លួននៅក្នុងប្រទេស​លីបង់​ឡើយ។ នេះបើយោង​តាម​របាយការណ៍​ដែល​ទទួល​បាន​ដោយ​ទីភ្នាក់ងារ​ព័ត៌មាន Anadolu ចុះ​ផ្សាយ​ថ្ងៃ​ទី​៣១​ខែ​មីនា​ឆ្នាំ​២០២៦។

លោកបានបញ្ជាក់ក្នុងកិច្ចពិភាក្សាផ្ទៃក្នុងថា គោលដៅចម្បងរបស់អ៊ីស្រាអែល គឺត្រូវតែដេញក្រុមហេសបូឡា ឲ្យ​ចេញឆ្ងាយពីព្រំដែន រហូតដល់ហួសទន្លេ Litani ទើបលោកអស់ចិត្ត។

អ្វីដែលគួរ​ឲ្យ​ភ្ញាក់ផ្អើលនោះគឺ មន្ត្រីជាន់ខ្ពស់របស់អ៊ីស្រាអែលបានបង្ហើបថា ខាងភាគីអាមេរិកហាក់ដូចជាយល់ព្រមតាមជំហរដាច់ខាតនេះ ដោយគេថែមទាំងបានលើកឡើងថា រឿងរ៉ាវនៅ​លីបង់​មិនមែនជាអាទិភាពចម្បងសម្រាប់លោកប្រធានាធិបតី ដូណាល់ ត្រាំ នោះទេ។ មិនតែប៉ុណ្ណោះ លោកណេតាន់យ៉ាហ៊ូ ក៏បានបដិសេធសំណើរបស់ប្រធានាធិបតីបារាំង លោក អេម៉ានុយអែល ម៉ាក្រុង ដែលបានព្យាយាមមកធ្វើជាអាជ្ញាកណ្តាលដើម្បីសុំ​ឲ្យ​មានការឈប់បាញ់គ្នា ជាថ្នូរនឹងការជួយជ្រោមជ្រែងផ្នែកការទូតពីសំណាក់ប្រទេសបារាំង។

គិតចាប់តាំងពីមានការវាយប្រហារឆ្លងដែនកាលពីដើមខែមីនាមក ប្រតិបត្តិការតាមអាកាស និងការវាយលុកតាមជើងគោករបស់អ៊ីស្រាអែល បានបណ្តាល​ឲ្យ​មនុស្សយ៉ាងហោចណាស់ ១ ២៤៧នាក់បាត់បង់ជីវិត និងជាង ៣ ៦០០​នាក់ផ្សេងទៀតរងរបួសនៅក្នុងប្រទេស​លីបង់។ ស្របពេលជាមួយគ្នានេះ សង្គ្រាមរួមគ្នារវាងអាមេរិក និងអ៊ីស្រាអែល ប្រឆាំងនឹងអ៊ីរ៉ង់ ក៏បានធ្វើ​ឲ្យ​មនុស្សស្លាប់អស់ជាង ១ ៣៤០​នាក់ទៅហើយ បង្កើតជាវដ្តនៃការសងសឹកគ្នាទៅវិញទៅមកយ៉ាងសាហាវ ទាំងតាមរយៈការបាញ់ស្រោចមីស៊ីលដាក់គ្នា និងការវាយប្រហារលើមូលដ្ឋានទ័ពអាមេរិកនៅក្នុងតំបន់ឈូងសមុទ្រ ដែលធ្វើ​ឲ្យ​ពិភពលោកទាំងមូលកំពុងតែដកដង្ហើមមិនដល់​គ្នា​ពោះចំពោះវិបត្តិ​ទាំង​នេះ៕

ប្រែសម្រួល៖ ឈាង