អាមេរិក បញ្ចេញ​វីដេអូ​មីស៊ីល Tomahawk ៤៩គ្រាប់ ដែលបាញ់​​ចូលទឹកដីអ៊ីរ៉ង់

ប្រធានាធិបតីអាមេរិក ដូណាល់ ត្រាំ បានប្រកាសថា កងទ័ពរបស់​លោក​ បានប្រើប្រាស់មីស៊ីលគ្រូសប្រភេទ Tomahawk ចំនួន ៤៩គ្រាប់ បាញ់ចូលជ្រៅទៅក្នុងទឹកដីរបស់ប្រទេសអ៊ីរ៉ង់។ ស្របពេល​ជាមួយ​គ្នា​នោះ ទីបញ្ជាការកណ្តាលរបស់កងទ័ពអាមេរិក (CENTCOM) ក៏បានបញ្ចេញវីដេអូបង្ហាញពីសកម្មភាពបាញ់បង្ហោះមីស៊ីលយ៉ាងច្រើន​សន្ធាប់​នេះ ដោយបានបញ្ជាក់ថា វា​គឺជា «ការវាយបកដើម្បីការពារខ្លួនបន្ថែម» ឆ្លើយតបទៅនឹងការឈ្លានពានជាបន្តបន្ទាប់របស់អ៊ីរ៉ង់។

សារព័ត៌មាន India Today ចុះផ្សាយ​ថ្ងៃទី​១១ ខែមិថុនា ឆ្នាំ​២០២៦ នេះ បានឱ្យដឹងថា បើ​តាមសេចក្តីរាយការណ៍ មីស៊ីលទាំងនោះ ផ្តើមឡើងបាញ់ចេញ​នៅម៉ោង ៣ និង ៤៥នាទីទៀបភ្លឺ ហើយ​បាន​វាយប្រហារចំគោលដៅជាច្រើនកន្លែង ចំតំបន់សំខាន់ៗ រួមមាន ភាគលិចទីក្រុងតេហេរ៉ង់ ខេត្ត Fars ក្រុង Bandar Abbas កោះ Qeshm កោះ Kish តំបន់ Minab និងផ្នែកខ្លះនៃ​ក្រុង Isfahan។

ជាការឆ្លើយតប កងទ័ពអាកាស និងកងទ័ពជើងទឹកនៃកងឆ្មាំបដិវត្តន៍ឥស្លាមអ៊ីរ៉ង់ (IRGC) បានប្រកាសថា ខ្លួនបានបើកការវាយប្រហារតបតវិញចំនួនពីរ​លើក​ធំៗ តម្រង់ទៅលើមូលដ្ឋានទ័ព ដែលមានទាហានអាមេរិកឈរ​ជើង ដោយបានវាយប្រហារចំទីតាំងសំខាន់ៗចំនួន ១៨កន្លែងនៅក្នុងតំបន់។ អ្វីដែលបង្កការព្រួយបារម្ភជាសកលនោះ គឺក្រុម IRGC បានប្រកាសបិទច្រកសមុទ្រហ័រមូសភ្លាមៗ មិនឱ្យនាវាដឹកប្រេង និងនាវាពាណិជ្ជកម្មទាំងអស់ឆ្លងកាត់ឡើយ ដោយសារតែបញ្ហាសន្តិសុខ។ យ៉ាងណាមិញ ទីបញ្ជាការកណ្តាលអាមេរិក បានចេញមុខទាត់ចោលការអះអាងនេះ ដោយបញ្ជាក់ថា នាវាពាណិជ្ជកម្មអន្តរជាតិ នៅតែបន្តធ្វើដំណើរចេញចូលច្រកសមុទ្រយុទ្ធសាស្ត្រនេះជាធម្មតា ទោះបីជាមានការវាយប្រហារគ្នាក៏ដោយ។

នៅក្នុងកិច្ចសម្ភាសន៍ជាមួយទូរទស្សន៍ Fox News លោក ដូណាល់ ត្រាំ បានទម្លាយលម្អិតថា មីស៊ីលខ្លះបានធ្លាក់នៅកៀកនឹងទីក្រុងតេហេរ៉ង់ ក្នុងចម្ងាយត្រឹមតែ ៦៤គីឡូម៉ែត្រប៉ុណ្ណោះ ហើយយន្តហោះចម្បាំងអាមេរិក ក៏កំពុងហោះហើរបំផ្លាញប្រព័ន្ធរ៉ាដា និងប្រព័ន្ធការពារអាកាសនៅភាគនិរតីនៃប្រទេសអ៊ីរ៉ង់ ជាប់ឈូងសមុទ្រពែក្សផងដែរ។ លោក ត្រាំ ថែមទាំងបាន​បញ្ជាក់​​ទៀតថា ថ្នាក់ដឹកនាំជាន់ខ្ពស់របស់អ៊ីរ៉ង់ បានទូរសព្ទមកអង្វរលោកឱ្យបញ្ឈប់ការទម្លាក់គ្រាប់បែកនេះ។ លោកបានគំរាមខ្លាំងៗថា ប្រសិន​ទីក្រុងតេហេរ៉ង់មិនព្រមចុះហត្ថលេខាលើកិច្ចព្រមព្រៀងសន្តិភាព ដែលអាមេរិកស្នើឡើងទេនោះ កងទ័ពអាមេរិក នឹងបើកការទម្លាក់គ្រាប់បែក​បន្ថែមទៀតនៅ «យប់ស្អែក»។

ទោះ​ជា​បែប​នេះក្ដី ភាគីអ៊ីរ៉ង់ បានចេញមុខបដិសេធចំពោះការលើកឡើងរបស់លោក ត្រាំ។ មេបញ្ជាការកងទ័ពអាកាសរបស់ IRGC លោក Majid Mousavi បានព្រមានថា អ៊ីរ៉ង់នឹងធ្វើឱ្យតំបន់ទាំងមូលក្លាយជា «ឋាននរក» សម្រាប់អាមេរិក បើអាមេរិកហ៊ានធ្វើឱ្យច្រកសមុទ្រហ័រមូសបាត់បង់សន្តិសុខ។ ជាមួយគ្នានោះ ប្រព័ន្ធផ្សព្វផ្សាយរដ្ឋរបស់អ៊ីរ៉ង់ ដោយដកស្រង់សម្តីមន្ត្រីជាន់ខ្ពស់ បានទាត់ចោលទាំងស្រុងនូវការអះអាងរបស់លោក ត្រាំ ដែលថា រូបលោកបាននិយាយទូរសព្ទផ្ទាល់ជាមួយមន្ត្រីអ៊ីរ៉ង់ ដោយចាត់ទុកថា វាជាព័ត៌មានមិនពិត និងមិនដែលបានកើតឡើងទាល់តែសោះ។ ព្រឹត្តិការណ៍ចុងក្រោយនេះ បានធ្វើឱ្យជម្លោះរវាងវ៉ាស៊ីនតោន និងតេហេរ៉ង់ ធ្លាក់ចូលទៅក្នុងភាពមិនច្បាស់លាស់ ទាំងលើសមរភូមិយោធា និង​សង្គ្រាមព័ត៌មាន៕

ប្រែសម្រួល៖ ឈាង