ចារកម្មអាមេរិក បង្ហាញថា អ៊ីរ៉ង់នៅតែមានសមត្ថភាពបាញ់មីស៊ីលនិងដ្រូន ផ្ទុយពីការអះអាងរបស់លោក ត្រាំ

ជាងមួយខែហើយដែលអាមេរិកនិងអ៊ីស្រាអែល ចាប់ដៃគ្នាធ្វើសង្គ្រាមជាមួយអ៊ីរ៉ង់ ហើយប្រមុខរដ្ឋាភិបាលទីក្រុងវ៉ាស៊ីនតោន លោក ដូណាល់ ត្រាំ អះអាងហើយអះអាងទៀតថា ខ្លួនបានបំផ្លាញសមត្ថភាពយោធារបស់សាធារណរដ្ឋឥស្លាម សឹងតែទាំងស្រុង។

យ៉ាងណា ពេលនេះ របាយការណ៍ចារកម្មអាមេរិក បានបញ្ចេញទិន្នន័យដែលផ្ទុយស្រឡះពីការអួតអាងរបស់លោកត្រាំ ដោយបង្ហាញថា ប្រព័ន្ធបាញ់មីស៊ីលនិងដ្រូនវាយប្រហាររបស់អ៊ីរ៉ង់ប្រហែល ៥០% នៅតែដំណើរការធម្មតា។

យោងតាមការវាយតម្លៃចុងក្រោយពីទីភ្នាក់ងារស៊ើបការណ៍សម្ងាត់អាមេរិក និងត្រូវបានផ្សាយដោយ CNN នៅថ្ងៃសុក្រទី៣ខែមេសាឆ្នាំ២០២៦, ទោះមានការវាយប្រហារយ៉ាងខ្លាំងក្លារៀងរាល់ថ្ងៃពីសំណាក់សហរដ្ឋអាមេរិកនិងអ៊ីស្រាអែល ទៅលើគោលដៅយោធាក្នុងរយៈពេល៥សប្តាហ៍កន្លងមកនេះក៏ដោយ ក៏ប្រព័ន្ធបាញ់បង្ហោះមីស៊ីលរបស់អ៊ីរ៉ង់ប្រហែលពាក់កណ្តាលនៅតែមានសភាពល្អប្រសើរ ហើយដ្រូនវាយប្រហារអត្តឃាតរាប់ពាន់គ្រឿងទៀត ក៏នៅតែមានក្នុងឃ្លាំងអាវុធរបស់អ៊ីរ៉ង់នៅឡើយ។ ពួកគេនៅតែស្ថិតក្នុងស្ថានភាពត្រៀមលក្ខណៈ ដើម្បីបង្កវិនាសកម្មដ៏ធ្ងន់ធ្ងរនៅទូទាំងតំបន់។

អ៊ីរ៉ង់នៅតែរក្សាទុកនូវដ្រូនវាយប្រហាររាប់ពាន់គ្រឿង និងមីស៊ីលការពារតំបន់ឆ្នេរ ដែលអាចបង្កការគំរាមកំហែងដល់ការដឹកជញ្ជូនតាមកប៉ាល់ក្នុងច្រកសមុទ្រ Hormuz។

យ៉ាងណា មូលហេតុដែលអាវុធទាំងនោះមិនត្រូវបានកម្ទេចទាំងស្រុង គឺដោយសារអ៊ីរ៉ង់បានលាក់ទុកនៅក្នុងរូងភ្នំឬក្រោមដី ដែលពិបាកនឹងកម្ទេចពីលើអាកាសណាស់។

របាយការណ៍នេះ ប្រៀបបាននឹងការបំបាក់មុខលោកត្រាំ ដែលតែងប្រកាសក្តែងៗថា អាមេរិក បានកម្ទេចយោធាសឹងតែហ្មត់ទៅហើយ។

កាលពីសប្តាហ៍មុន ប្រមុខសេតវិមាន បានអួតអាងអំពីជោគជ័យរបស់អាមេរិកនៅមជ្ឈិមបូព៌ា ថែមទាំងប្រកាសថា អ៊ីរ៉ង់ មកសុំអង្វរអាមេរិកធ្វើកិច្ចព្រមព្រៀងសន្តិភាព ព្រោះកងទ័ពរបស់ពួកគេ ទាំងជើងគោកនិងអាកាសត្រូវទីក្រុងវ៉ាស៊ីនតោន កម្ទេចហ្មត់អស់ហើយ។

លោកអះអាងថា អាមេរិកបានកម្ទេចកងទ័ពជើងទឹកនិងអាកាសរបស់អ៊ីរ៉ង់ទាំងស្រុង ហើយបំផ្លាញឧបករណ៍បាញ់បង្ហោះមីស៊ីលសឹង៩០% ចំណែកគ្រាប់មីស៊ីលអ៊ីរ៉ង់ខ្ទេចជាង៩០%ទៅហើយ។

ទោះបែបនេះ ក្រោយមកទីក្រុងតេហេរ៉ង់ បានបោះពាក្យសម្តីបញ្ឈឺទៅកាន់អាមេរិកវិញ ដោយនិយាយបែបមើលស្រាលថា ទាំងអាមេរិកនិងអ៊ីស្រាអែលសុទ្ធតែមិនទទួលបានព័ត៌មានគ្រប់ជ្រុងជ្រោយអំពីសមត្ថភាពយោធានិងគ្រឿងសព្វាវុធរបស់ទីក្រុងតេហេរ៉ង់ ហើយការផលិតអាវុធយោធារបស់អុីរ៉ង់ ត្រូវបានធ្វើឡើងនៅក្នុងទីកន្លែងគ្មាននរណាស្គាល់៕

អត្ថបទ៖ សុខ សុវណ្ណ