ព័ត៌មានអន្ដរជាតិ

អ៊ីស្រាអែលនិងលីបង់យល់ព្រមជួបចរចានៅថ្ងៃទី១៤មេសានាទីក្រុងវ៉ាស៊ីនតោន

បានផុស

២ ខែ មុន

នៅ

ថ្ងៃសៅរ៍ ១១ មេសា ២០២៦

ដោយ

អ៊ីស្រាអែលសុខចិត្តចូលតុចរចាបញ្ចប់ការវាយប្រហារនៅលីបង់ ខណៈសម្ពាធអន្តរជាតិបានធ្លាក់ទៅលើអ៊ីស្រាអែលដូចទឹកបាក់ទំនប់ ក្រោយអ៊ីស្រាអែលបដិសេធថា បទឈប់បាញ់រវាងអ៊ីរ៉ង់និងអាមេរិកមិនអាចគ្របដណ្តប់លើបញ្ហាលីបង់ ហើយ ខ្លួនបានវាយប្រហារយ៉ាងខ្លាំងបណ្តាលឲ្យមនុស្សរាប់រយនាក់បានស្លាប់ និងជាង១០០០នាក់រងរបួសក្នុងថ្ងៃដំបូងនៃបទឈប់បាញ់នោះ។

ប្រធានាធិបតីលីបង់ លោក Joseph Aoun។ **SANA**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម BBC កិច្ចចរចារវាងអ៊ីស្រាអែល និងលីបង់នឹងចាប់ផ្តើមនៅទីក្រុងវ៉ាស៊ីនតោននៅថ្ងៃអង្គារសប្តាហ៍ក្រោយ ត្រូវនឹងថ្ងៃទី១៤ខែមេសា។

យោងសេចក្តីថ្លែងការណ៍មួយពីការិយាល័យប្រធានាធិបតីលីបង់ អ៊ីស្រាអែល និងលីបង់នឹងចាប់ផ្តើមកិច្ចចរចានៅថ្ងៃអង្គារនៅទីក្រុងវ៉ាស៊ីនតោន ដើម្បីពិភាក្សាអំពីបទឈប់បាញ់ក្នុងជម្លោះអ៊ីស្រាអែល-ហេសបូឡា ដោយសហរដ្ឋអាមេរិកនឹងសម្របសម្រួលការសន្ទនារវាងពួកគេទាំងពីរ។

ការិយាល័យរបស់ប្រធានាធិបតីលីបង់ លោក Joseph Aoun បានសរសេរថា ប្រទេសទាំងពីរនឹងជួបគ្នានៅក្រសួងការបរទេសសហរដ្ឋអាមេរិក «ដើម្បីស្វែងរកការប្រកាសអំពីបទឈប់បាញ់ និងកាលបរិច្ឆេទដើម្បីចាប់ផ្តើមការចរចាដោយផ្ទាល់»។

មានរបាយការណ៍ថា ការហៅទូរស័ព្ទមួយបានកើតឡើងនៅថ្ងៃសុក្ររវាងឯកអគ្គរដ្ឋទូតលីបង់ និងអ៊ីស្រាអែលនៅសហរដ្ឋអាមេរិក រួមជាមួយឯកអគ្គរដ្ឋទូតសហរដ្ឋអាមេរិកប្រចាំប្រទេសលីបង់ ដើម្បីរៀបចំការសន្ទនា។

អ៊ីស្រាអែល ក្រោយការដឹកនាំរបស់នាយករដ្ឋមន្ត្រី បេនចាមីន ណេតាន់យ៉ាហ៊ូ ដែលក្នុងសង្គ្រាមជាង២ឆ្នាំមកនេះ មិនបានស្តាប់តាមការទាមទារជាអន្តរជាតិនោះទេ ប៉ុន្តែបានពង្រីកការវាប្រហារលើប្រទេសលីបង់ ដោយយកលេសតាមកម្ទេចក្រុមហេសបូឡាដែលគាំទ្រដោយអ៊ីរ៉ង់៕

រ៉ាន់ រើយ