ព័ត៌មានអន្ដរជាតិ

មន្រ្តីអ៊ីស្រាអែល ២រូប អំពាវនាវឱ្យបង្កើនប្រតិបត្តិការយោធា ប្រឆាំងនឹងក្រុមហេសបូឡា នៅលីបង់

បានផុស

២ ខែ មុន

នៅ

ថ្ងៃអង្គារ ២៦ ឧសភា ២០២៦

ដោយ

អ៊ីស្រាអែល បានវាយប្រហារប្រទេសលីបង់ម្តងហើយម្តងទៀត ដោយសារតែក្រុមហេសបូឡា ជាក្រុមសកម្មប្រយុទ្ធគាំទ្រដោយអ៊ីរ៉ង់ តែងតែបាញ់រ៉ុក្កែតនិងដ្រូនចូលអ៊ីស្រាអែល ចាប់តាំងពីពេលនោះមក អ៊ីស្រាអែលចាត់ទុកក្រុមហេសបូឡាជាការគំរាមកំហែងសន្តិសុខដ៏សំខាន់។

ការណ៍នេះ រដ្ឋមន្ត្រីដែលប្រកាន់និន្នាការស្តាំនិយមជ្រុល២រូប របស់អ៊ីស្រាអែល បានអំពាវនាវឱ្យមានការបង្កើនប្រតិបត្តិការយោធាក្នុងប្រទេសលីបង់ជាថ្មីកាលថ្ងៃទី២៥ ដោយម្នាក់គាំទ្រឱ្យការវាយប្រហារលើទីក្រុងបេរូត ដើម្បីឆ្លើយតបទៅនឹងការវាយប្រហារដោយដ្រូនរបស់ក្រុមហេសបូឡា មកលើយោធាអ៊ីស្រាអែល។ នេះបើយោងតាមសារព័ត៌មាន The Straits Times ផ្សាយថ្ងៃទី២៥ ខែឧសភា ឆ្នាំ២០២៦ ។

រដ្ឋមន្ត្រីសន្តិសុខជាតិ លោក Itamar Ben Gvir សរសេរលើប្រព័ន្ធផ្សព្វផ្សាយសង្គម X ថា៖ « វាដល់ពេលហើយសម្រាប់នាយករដ្ឋមន្ត្រីក្នុងការឈរជើងយ៉ាងរឹងមាំជាមួយ លោក ដូណាល់ ត្រាំ ហើយប្រាប់គាត់ថា អ៊ីស្រាអែលកំពុងវិលត្រឡប់ទៅរកសង្គ្រាមនៅក្នុងប្រទេសលីបង់វិញ»។

លោក Bezalel Smotrich រដ្ឋមន្ត្រីក្រសួងហិរញ្ញវត្ថុអ៊ីស្រាអែល។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា៖ « អគ្គិសនីទៅកាន់ប្រទេសលីបង់ត្រូវតែកាត់ផ្តាច់ ទន្លេ Zahrani ត្រូវតែដណ្តើមយក ហើយសង្គ្រាមដ៏ខ្លាំងក្លានឹងចាប់ផ្តើមឡើងវិញ»។

មិនខុសគ្នាប៉ុន្មាន លោក Bezalel Smotrich រដ្ឋមន្ត្រីក្រសួងហិរញ្ញវត្ថុអ៊ីស្រាអែល បានអំពាវនាវឱ្យមានការវាយប្រហារលើទីក្រុងបេរូត ដើម្បីទប់ទល់នឹងការវាយប្រហារដោយដ្រូនរបស់ក្រុមហេសបូឡា ទៅលើកងកម្លាំងអ៊ីស្រាអែលភាគខាងត្បូងប្រទេសលីបង់និងឆ្លងកាត់ព្រំដែន។

លោក Smotrich និយាយលើបណ្តាញសង្គមថា៖ « មានតម្រូវការបន្ទាន់មួយ ដើម្បីបញ្ចប់ការគំរាមកំហែងដែលបង្កឡើងដោយដ្រូនផ្ទុះរបស់ក្រុមហេសបូឡា។ សម្រាប់ដ្រូនផ្ទុះនីមួយៗ អគារនៅទីក្រុងបេរូតចំនួន១០ ត្រូវតែដួលរលំ»។

លោក Smotrich និយាយថា ខ្លួនបានអនុម័តថវិកាពិសេសប្រមាណ ៦៩២លានដុល្លារ ដើម្បីផ្តល់ឱ្យស្ថាប័នការពារជាតិអាចបង្កើតវិធានការទប់ទល់ប្រឆាំងនឹងដ្រូន។

ការកត់សម្គាល់របស់រដ្ឋមន្ត្រីទាំងពីររូប ដែលជាមនុស្សជំនិតរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ កើតឡើង បន្ទាប់ពីយោធាខ្លួនរាយការណ៍ពីការស្លាប់របស់ទាហានម្នាក់ទៀតនៅភាគខាងត្បូងប្រទេសលីបង់។

ទោះបីអ៊ីស្រាអែលតែងតែវាយប្រហារលីបង់ឥតឈប់ ប៉ុន្តែជនជាតិអ៊ីស្រាអែលខ្លួនឯងក៏ស្លាប់ចំនួន ២៤នាក់ ចាប់តាំងពីអរិភាពបានចាប់ផ្តើម មានទាហាន ២៣នាក់ និងជនស៊ីវិលម្នាក់៕

សម្រួល៖ ណឺ មិនា