លោក ពូទីន ប្រកាស​ផ្តល់ការសម្របសម្រួល ក្រោយកិច្ចចរចាសន្តិភាពអាមេរិក-អ៊ីរ៉ង់ជាប់គាំង

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានសន្ទនាតាមទូរសព្ទជាមួយសមភាគីអ៊ីរ៉ង់ លោក Masoud Pezeshkian កាលពីថ្ងៃអាទិត្យ ដោយផ្តល់ការគាំទ្រក្នុងការធ្វើជាអ្នកសម្របសម្រួលដោះស្រាយជម្លោះ បន្ទាប់ពីការចរចារវាងសហរដ្ឋអាមេរិក និងអ៊ីរ៉ង់ទទួល​បរាជ័យក្នុងការឈាន​ទៅ​ដល់កិច្ចព្រមព្រៀង។

យោង​តាម​សារព័ត៌មាន Moscow Times ចុះផ្សាយ​ថ្ងៃទី​១២​ខែមេសា​ឆ្នាំ​២០២៦ វិមានក្រឹមឡាំងបាន​ឲ្យ​ដឹងថា លោក​ពូទីន បានត្រៀមខ្លួនរួចជាស្រេចដើម្បីសម្របសម្រួលកិច្ចខិតខំប្រឹងប្រែងឆ្ពោះទៅរក «សន្តិភាពប្រកបដោយយុត្តិធម៌ និងយូរអង្វែងនៅក្នុងតំបន់មជ្ឈិមបូព៌ា»។ ការផ្តល់ជូននេះកើតឡើងក្រោយពីកិច្ចចរចារយៈពេល​២១​ម៉ោងនៅប្រទេសប៉ាគីស្ថាន បានបញ្ចប់ដោយមិនមានលទ្ធផលផ្លូវការ។

ក្នុងអំឡុងពេលនៃការសន្ទនានោះ លោក Pezeshkian បានលើកឡើងថា «ស្តង់ដារ​មិន​ស្មើ​ភាព​គ្នា» និង «វិធីសាស្ត្រផ្តាច់ការ» របស់សហរដ្ឋអាមេរិកនៅតែជាឧបសគ្គចម្បងក្នុងការឈានដល់កិច្ចព្រមព្រៀងយុត្តិធម៌។ យោងតាមទីភ្នាក់ងារសារព័ត៌មាន Tasnim លោក Pezeshkian បានបញ្ជាក់ថា អ៊ីរ៉ង់នៅតែត្រៀមខ្លួនជាស្រេចក្នុងការឈានដល់កិច្ចព្រមព្រៀងដែលមានតុល្យភាព បើសហរដ្ឋអាមេរិកគោរពតាមក្របខ័ណ្ឌច្បាប់អន្តរជាតិ។

ទន្ទឹមគ្នានេះ ប្រធានាធិបតី ដូណាល់ ត្រាំ និងអនុប្រធានាធិបតី JD Vance បានអះអាងថា ការបដិសេធរបស់អ៊ីរ៉ង់ក្នុងការបោះបង់កម្មវិធីនុយក្លេអ៊ែរគឺជាចំណុចចម្រូងចម្រាសដ៏សំខាន់។ លោកត្រាំ បានលើកឡើងនៅលើបណ្តាញសង្គមថា ទោះបីជាចំណុចភាគច្រើនត្រូវបានព្រមព្រៀងគ្នាក៏ដោយ ក៏កិច្ចព្រមព្រៀងទាំងនោះ «មិនមានន័យអ្វីឡើយ» ប្រសិនបើអ៊ីរ៉ង់នៅតែបន្តមានថាមពលនុយក្លេអ៊ែរ៕

ប្រែសម្រួល៖ ឈាង