អ៊ីរ៉ង់ ត្រៀមរៀបចំពិធីបុណ្យសពដ៏ធំ ជូនអតីតមេដឹកនាំ Khamenei ក្រោយពន្យារពេល ដោយសារសង្គ្រាម

កាលពីថ្ងៃសុក្រ ទី២៩ ខែឧសភា ប្រព័ន្ធផ្សព្វផ្សាយផ្លូវការបានរាយការណ៍ថា អាជ្ញាធរអ៊ីរ៉ង់ កំពុងរៀបចំគ្រឹះ សម្រាប់ពិធីបុណ្យសព «ដ៏ធំសម្បើម» ជូនចំពោះមេដឹកនាំកំពូលដែលបានបាត់បង់ជីវិត គឺលោក Ayatollah Ali Khamenei បន្ទាប់ពីពន្យារពេលយ៉ាងយូរ ដោយសារតែសង្គ្រាមជាមួយសហរដ្ឋអាមេរិក និងអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតពេលវេលាពិតប្រាកដ នៅមិនទាន់ច្បាស់ក៏ដោយ ប៉ុន្តែវិទ្យុនិងទូរទស្សន៍រដ្ឋ បានរាយការណ៍ដោយដកស្រង់សម្តីលោក Mohsen Mahmoudi ប្រមុខក្រុមប្រឹក្សាសម្របសម្រួលតេហេរ៉ង់ សម្រាប់ការឃោសនាឥស្លាមថា «ទីបញ្ជាការដ្ឋានពិសេសមួយ ត្រូវបានបង្កើតឡើង ដើម្បីរៀបចំសម្រាប់ពិធីបុណ្យសព ហើយទីភ្នាក់ងារផ្សេងៗ បច្ចុប្បន្នកំពុងរៀបចំផែនការ និងចាត់ចែងកិច្ចការនានា»។

កម្មវិធីមួយដើម្បីគោរពវិញ្ញាណក្ខន្ធលោក Khamenei ត្រូវបានរៀបចំឡើងកាលពីខែមេសា ប៉ុន្តែពិធីបុណ្យសពថ្នាក់ជាតិដែលត្រូវបានប្រកាសដំបូង មិនអាចប្រព្រឹត្តទៅបានឡើយដោយសារតែសង្គ្រាម។

យោងតាមសារព័ត៌មាន timesofisrael លោក Khamenei ដែលដឹកនាំសាធារណរដ្ឋឥស្លាមមួយនេះ អស់រយៈពេលជាងបីទសវត្សរ៍មកហើយនោះ ត្រូវបានសម្លាប់នៅក្នុងរលកទីមួយ នៃការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែល ដែលបានបើកឆាកសង្គ្រាមកាលពីថ្ងៃទី២៨ ខែកុម្ភៈ។ ក្រោយមក កូនប្រុសរបស់លោក និងជាអ្នកបន្តតំណែងគឺលោក Mojtaba Khamenei ក៏ត្រូវរបួសដែរ ក្នុងការវាយប្រហារនោះ តែគេមិនដែលឃើញគាត់បង្ហាញខ្លួនជាសាធារណៈឡើយ ចាប់តាំងពី ឡើងកាន់តំណែងមក៕

អត្ថបទ ៖ សាង ស្រីល័ក្ខ