សេតវិមានច្រានចោល​ព័ត៌មាន​ថា មាន​ការសុំពន្យារពេល​បទ​ឈប់បាញ់

អ្នកនាំពាក្យសេតវិមាន លោកស្រី Karoline Leavitt បានចេញមកបកស្រាយបំភ្លឺជុំវិញព័ត៌មានដែលថា សហរដ្ឋអាមេរិកបានស្នើសុំពន្យារពេលបទឈប់បាញ់រយៈពេលពីរសប្តាហ៍ជាមួយអ៊ីរ៉ង់ ដែលនឹងត្រូវផុតកំណត់នៅសប្តាហ៍ក្រោយ។ នេះ​បើយោង​តាម​សារព័ត៌មាន Al Jazeera ចុះផ្សាយ​ថ្ងៃទី​១៦​មេសា​២០២៦។

លោកស្រី Karoline បានបញ្ជាក់យ៉ាងច្បាស់ថា ព័ត៌មានដែលចុះផ្សាយថាអាមេរិកស្នើសុំពន្យារពេលនោះ គឺជាព័ត៌មានមិនពិតឡើយ ប៉ុន្តែទោះជាយ៉ាងណា ភាគីទាំងពីរកំពុងតែបន្តកិច្ចពិភាក្សាគ្នាប្រកបដោយផ្លែផ្កា និងមានភាពវិជ្ជមានបំផុត។

លោកស្រីបានបន្តទៀតថា កិច្ចចរចាសន្តិភាពជុំបន្ទាប់ទំនងជានឹងត្រូវធ្វើឡើងនៅក្នុងប្រទេសប៉ាគីស្ថានម្តងទៀត បន្ទាប់ពីការចរចានៅទីក្រុងអ៊ីស្លាម៉ាបាដកាលពីចុងសប្តាហ៍មុនមិនទាន់ទទួលបានលទ្ធផលសម្រេច។ លោកស្រីបានកោតសរសើរយ៉ាងខ្លាំងដល់រដ្ឋាភិបាលប៉ាគីស្ថាន ដែលបានដើរតួជាអ្នកសម្របសម្រួលដ៏ល្អបំផុតតែមួយគត់ក្នុងកិច្ចដំណើរការនេះ ទោះបីជាមានប្រទេសជាច្រើនផ្សេងទៀតចង់ចូលខ្លួនមកជួយក៏ដោយ។ ចំណែក​​ឯ​លោកប្រធានាធិបតី ដូណាល់ ត្រាំ ក៏​យល់ឃើញថា ការបន្តពិភាក្សាតាមរយៈប៉ាគីស្ថាន គឺជាមធ្យោបាយដ៏មានប្រសិទ្ធភាពបំផុតដើម្បីឈានទៅរកការបញ្ចប់សង្គ្រាម។

ជាមួយគ្នានេះដែរ លោកត្រាំ ក៏បានផ្តល់បទសម្ភាសន៍ដល់ទូរទស្សន៍ Fox News ដោយលើកឡើងដោយភាពជឿជាក់ថា សង្គ្រាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់ ជិតនឹងឈានដល់ទីបញ្ចប់ហើយ។ លោកបានសង្កត់ធ្ងន់ថា ខាងភាគីអ៊ីរ៉ង់ខ្លួនឯងក៏ចង់បានកិច្ចព្រមព្រៀងនេះខ្លាំងណាស់ដែរ ហើយវាគឺជាជម្រើសដ៏ល្អបំផុតសម្រាប់អ៊ីរ៉ង់ ក្នុងការធ្វើតាមការទាមទាររបស់សហរដ្ឋអាមេរិក ដើម្បីសន្តិសុខនិងស្ថិរភាពយូរអង្វែង។

ទោះបីជាមានសញ្ញាវិជ្ជមានផ្នែកការទូត ប៉ុន្តែរដ្ឋមន្ត្រីក្រសួងរតនាភិបាលអាមេរិក លោក Scott Bessent បាន​ប្រកាស​ថា អាមេរិកនឹងមិនបន្ធូរបន្ថយការដាក់ទណ្ឌកម្មលើការនាំចេញប្រេងរបស់អ៊ីរ៉ង់ និងរុស្ស៊ីនោះឡើយ។ លោកបានព្រមានចំៗទៅកាន់ប្រទេសចិន ដែលជាអ្នកទិញប្រេងដ៏ធំពីអ៊ីរ៉ង់ថា ការឡោមព័ទ្ធផ្លូវទឹករបស់កងទ័ពជើងទឹកអាមេរិក នឹងធ្វើឲ្យ​ការនាំចូលប្រេងរបស់ចិនត្រូវកាត់ផ្តាច់។ លើសពីនេះ ធនាគារចិនចំនួនពីរ ក៏កំពុងប្រឈមនឹងការដាក់ទណ្ឌកម្មបន្ថែមផងដែរ ប្រសិនបើរកឃើញថាមានការពាក់ព័ន្ធនឹងការផ្ទេរប្រាក់​ឲ្យ​ទៅប្រទេសអ៊ីរ៉ង់៕

ប្រែសម្រួល៖ ឈាង