Real Madrid សម្រិតសម្រាំងគ្រូ ៥ នាក់មកជំនួស Arbeloa ខណៈមានគ្រូម្នាក់លេចធ្លោជាងគេ

ក្លិបអធិរាជស Real Madrid កំពុងពិចារណាយ៉ាងហ្មត់ចត់អំពីជម្រើសគ្រូបង្វឹកថ្មី មកជំនួសគ្រូបង្វឹកកំពុងកាន់តំណែងលោក Alvaro Arbeloa។ បច្ចុប្បន្ន ពួកគេបានសម្លឹងឃើញគ្រូបង្វឹក ៥ នាក់ ដែលសក្តិសមបំផុត ប៉ុន្តែក្នុងចំណោមនោះ គ្រូបង្វឹកក្រុម Benfica លោក Jose Mourinho បានក្លាយជាបេក្ខភាពលេចធ្លោជាងគេបំផុត។

យោងតាមសារព័ត៌មាន Record របស់ ព័រទុយហ្គាល់ បានឱ្យដឹង ថា ប្រធានក្លិប Real Madrid លោក Florentino Pérez កំពុងមិនសប្បាយចិត្តនឹងការដឹកនាំរបស់លោក Arbeloa ដែលដឹកនាំក្រុមមិនទទួលបានលទ្ធផលល្អនាមួយរយៈចុងក្រោយនេះ។

ប្រភពដដែលបានអះអាង ថា ប្រធានក្លិបសញ្ជាតិ អេស្ប៉ាញ វ័យ ៧៩ ឆ្នាំត្រៀមធ្វើការផ្លាស់ប្តូរធំៗនៅពេលខាងមុខ ហើយគ្រូបង្វឹកលោក Arbeloa ក៏គ្រោងនឹងធ្វើការផ្លាស់ប្តូរផងដែរ ខណៈពេលនេះលោក Mourinho កំពុងក្លាយជាជម្រើសសំខាន់បំផុត ដើម្បីមកជំនួស។

លោក Mourinho ធ្លាប់ដឹកនាំ Real Madrid ចន្លោះឆ្នាំ ២០១០ ដល់ ២០១៣ ដោយបានឈ្នះពាន ២ រួមមាន La Liga និង Copa del Rey។ បុរសរហស្សនាម “Special One” រូបនេះ ត្រូវបានគេចងចាំ ថា ជាគ្រូបង្វឹកដែលអាចប្រកួតប្រជែងជាមួយ FC Barcelona ក្នុងសម័យកំពូល ដែលស្ថិតក្រោមការដឹកនាំរបស់លោក Pep Guardiola។

ទោះបីមិនទាន់មានការចរចាផ្លូវការក៏ដោយ Mourinho ដែលបច្ចុប្បន្នដឹកនាំ Benfica ត្រូវបាននិយាយថា មានចិត្តបើកចំហចំពោះការត្រឡប់មកវិញ។ ការពិភាក្សាផ្ទៃក្នុងរបស់ក្លិប នឹងត្រូវសម្រេចឆាប់ៗនេះអំពីអនាគតគ្រូបង្វឹកថ្មី។

ទោះបីជាយ៉ាងណា Real Madrid ក៏មិនមែនមើលឃើញលោក Mourinho តែម្នាក់នោះដែរ។ ក្រៅពីនេះពួកគេ កំពុងពិចារណាលើគ្រូបង្វឹកល្បីៗ ៤ នាក់ទៀតដូចជាលោក Jürgen Klopp, Mauricio Pochettino, Didier Deschamps និង Zinedine Zidane៕

ប្រែសម្រួល៖ សេម កុសល
ប្រភព៖ GOAL