អ្នកគាំទ្រកើនដល់ ៤ លាននាក់ ដាក់ញត្តិបណ្តេញ Mbappe ចេញពីក្លិប ក្រោយគេសាងកំហុសធំ ១

អ្នកគាំទ្រច្រើនជាង ៤ លាននាក់ បាននាំគ្នាដាក់ញត្តិនៅលើបណ្តាញសង្គម ដោយទាមទារឱ្យកីឡាករ Kylian Mbappe ចាកចេញពីក្លិប Real Madrid បន្ទាប់ពីខ្សែប្រយុទ្ធសញ្ជាតិ បារាំង មួយនេះសាងនូវកំហុសឆ្គងមួយ រហូតធ្វើឱ្យអ្នកគាំទ្រផ្ទុះការខឹងសម្បារខ្លាំង។

យុទ្ធនាការទទូចឱ្យ Mbappe ចាកចេញ ឬ “Mbappe out” បានផ្ទុះឡើងនៅលើបណ្ដាញសង្គមក្នុងប៉ុន្មានថ្ងៃចុងក្រោយនេះ ក្រោយខ្សែប្រយុទ្ធវ័យ ២៧ ឆ្នាំ ត្រូវបានគេឃើញទៅសម្រាកលំហែកាយនៅកោះ Sardinia ក្នុងប្រទេស អ៉ីតាលី ជាមួយមិត្តស្រីរបស់គេ គឺតារាសម្ដែង Ester Exposito។

ប្រការនេះ បានធ្វើឱ្យអ្នកគាំទ្រ Real Madrid ខឹងសម្បារយ៉ាងខ្លាំង ដោយសារក្រុម Real Madrid កំពុងស្ថិតក្នុងដំណាក់កាលពិបាកបំផុត ដែលសឹងតែមិនអាចឈ្នះពានសូម្បីតែ ១ នៅរដូវកាលនេះ ប៉ុន្តែ Mbappe វិញ បែរ​ជាកំពុងមានរបួស ស្រាប់តែទៅដើរលេងជាមួយមិត្តស្រីរបស់ខ្លួននៅប្រទេស អ៉ីតាលី ហាក់មិនមានរឿងអ្វីកើតឡើង។

ញត្តិ “Mbappe out” នេះបានចាប់ផ្តើមកាលពីថ្ងៃអង្គារ៍ ដោយដំបូងឡើយ អ្នកគាំទ្រទាំងនោះមានគោលដៅប្រមូលចំនួនអ្នកបោះឆ្នោតត្រឹមតែ ២០ ម៉ឺននាក់ប៉ុណ្ណោះ ប៉ុន្តែក្រោយមកបានកើនឡើងយ៉ាងលឿនដល់ ២០ ម៉ឺននាក់ ហើយបន្តមកទៀត ក៏បានឡើងលើស ១ លាននាក់ក្នុងរយៈពេលតែប៉ុន្មានម៉ោង បន្ទាប់ពីបើកដំណើរការ។ មកដល់ថ្ងៃ ពុធ នេះ ចំនួនអ្នកដាក់ញត្តិបានកើនលើស ៤ លាននាក់ហើយ។ នេះបើតាមការរាយការណ៍របស់ The Sun៕

ប្រែសម្រួល៖ សេម កុសល
ប្រភព៖ VN Express