អាជ្ញាធរខេត្តកំពង់ចាមបើកឡើងវិញអគារសម្រាកព្យាបាលទូទៅមួយចំនួន

អាជ្ញាធរខេត្តកំពង់ចាមបានអនុញ្ញាតដាក់ឱ្យដំណើរការឡើងវិញ អគារសម្រាកព្យាបាលទូទៅ នៅក្នុងពេទ្យបង្អែកស្រីសន្ធរ និងមន្ទីរពហុព្យាលបាលព្រែកពោធិ៍ ស្ថិតនៅក្នុងភូមិរការទ្វារ ឃុំព្រែកពោធិ៍ ស្រុកស្រីសន្ធរ ខេត្តកំពង់ចាម។

អាជ្ញាធរខេត្តកំពង់ចាមបានបិទអគារសម្រាកព្យាបាលទូទៅក្នុងពេទ្យបង្អែកស្រីសន្ធរ និងមន្ទីរពហុព្យាលបាលព្រែកពោធិ៍ជាបណ្តោះអាសន្នកាលពីថ្ងៃទី១៨ ខែមេសា ឆ្នាំ២០២១ ក្រោយពាក់ព័ន្ធនឹងអ្នកជំងឺកូវីដ-១៩ម្នាក់។

យោងតាមរបាយការណ៍របស់មន្ទីរសុខាភិបាលខេត្តកំពង់ចាម បានឱ្យដឹងថា អ្នកជំងឺដែលពាក់ពាក់នឹងមន្ទីរពេទ្យទាំងពីរខាងលើមានឈ្មោះ ហួ ហ៊ា ភេទប្រុស អាយុ៣២ឆ្នាំ រស់នៅភូមិទ្រា ឃុំស្វាយពោធិ៍ ត្រូវបានយកទៅព្យាបាលនៅមន្ទីរពេទ្យខេត្តរួចហើយ រួមទាំងអ្នកប៉ះពាល់អ្នកជំងឺ នៅក្នុងភូមិទ្រា ចំនួន១៩នាក់ ក៏បានបញ្ជូនទៅមណ្ឌលចត្តាឡីស័ករដ្ឋបាលខេត្តរួចដែរ។

រីឯអ្នកដែលប៉ះពាល់ផ្ទាល់ និងប្រយោលសរុប ៥២នាក់ ក្នុងនោះ មន្ទីរពេទ្យពហុព្យាបាលជំងឺព្រែកពោធិ៍ ២១នាក់ មន្ទីរពេទ្យបង្អែកស្រុកស្រីសន្ធរ ២២នាក់ និងអ្នកសម្រាកព្យាបាលជាមួយនឹងអ្នកជំងឺកូវីដ-១៩ ចំនួន ០៩នាក់ កំពុងធ្វើចត្តាឡីស័កនៅក្នុងមណ្ឌលចត្តាឡីស័ករបស់រដ្ឋបាលស្រុកស្រីសន្ធរ និងនៅមន្ទីរពហុព្យាបាលជំងឺព្រែកពោធិ៍៕

អត្ថបទ៖ សំអឿន