ព្យុះ បោកបក់ចំ ចម្ការទុរេននៅថៃ ​ជ្រុះ ​ខូច​ផ្លែអស់ជាង ​៤តោន, ម្ចាស់បានត្រឹម យកទៅបោះចោល

ផ្លែទុរេន ដែលគិតជាទម្ងន់រហូតទៅជាង ៤តោន បានជ្រុះធ្លាក់រាយប៉ាយពេញដី ដោយសារតែព្យុះខែប្រាំង វាយប្រហារខេត្តនគររាជសីមា ប្រទេសថៃ ខណៈម្ចាស់ចម្ការ បានត្រឹមអង្គុយយំ សោកស្តាយព្រោះថា ជិតដល់ថ្ងៃប្រមូលផលទៅហើយ មិនគួរជួបរឿងបែបនេះសោះ។

តាមការផ្សាយរបស់ Amarin TV នៅថ្ងៃចន្ទ ទី៤ ខែឧសភា ឆ្នាំ២០២៦, ចម្ការទុរេននៅស្រុក Soeng Sang ត្រូវព្យុះបោកបក់ចំ បណ្តាលឲ្យខ្ទេចខ្ទី ក្នុងរយៈពេលត្រឹម ១៥នាទីប៉ុណ្ណោះ។

គណនី Facebook ឈ្មោះ Arreeya Singphong ដែលអះអាងខ្លួនជាម្ចាស់ចម្ការ បានបង្ហោះរូបភាពនិងវីដេអូ ផ្លែទុរេន ជ្រុះពេញដីមានទាំងតូចទាំងធំ ហើយប្រមូលដាក់ជាគំនរ គរដូចភ្នំ ខណៈទុរេនទាំងនោះ សុទ្ធតែខូច ដោយមិនអាចយកទៅទទួលទានបានឡើយ ពោលគឺមានតែបោះចោលប៉ុណ្ណោះ។

រឿងនេះកើតឡើង ចំពេលប្រទេសថៃ កំពុងផ្ទុះការរិះគន់ បញ្ហាពាក់ព័ន្ធផ្លែទុរេន ដោយកសិករ បាននាំគ្នាស្តីបន្ទោស Influencers និង​ក្រសួង​ពាណិជ្ជកម្ម មិនសំចៃមាត់ រឿងលក់បង្ខូចតម្លៃទីផ្សារ។

ម្យ៉ាង ទុរេនថៃ ក៏ត្រូវបានអាជ្ញាធរចិន រកឃើញថា មានជ្រលក់សារធាតុគីមី ដែលបណ្តាលឲ្យប៉ះពាល់យ៉ាងខ្លាំង ដល់សុខភាពអ្នកបរិភោគ៕

អត្ថបទ៖ សុខ សុវណ្ណ