ព័ត៌មានអន្ដរជាតិ

អ៊ីរ៉ង់ ព្រមានវាយប្រហារ អង់គ្លេសនិងបារំាង ដែលបញ្ជូននាវាចម្បាំងទៅច្រក Hormuz

បានផុស

២ ខែ មុន

នៅ

ថ្ងៃចន្ទ ១១ ឧសភា ២០២៦

ដោយ

អ៊ីរ៉ង់ព្រមានចក្រភពអង់គ្លេស និងបារាំង នៅថ្ងៃអាទិត្យថា កងកម្លាំងប្រដាប់អាវុធរបស់អ៊ីរ៉ង់នឹងចាប់ផ្តើមឆ្លើយតបយ៉ាងម៉ឺងម៉ាត់ និងភ្លាមៗ ចំពោះនាវាចម្បាំងណាមួយដែលត្រូវបញ្ជូនទៅច្រកសមុទ្រហ័រមូស (Hormuz) បន្ទាប់ពីទីក្រុងឡុងដ៍ បានបញ្ជូននាវាមួយគ្រឿងទៅកាន់ច្រកសមុទ្រនេះ។ នេះបើយោងតាមសារព័ត៌មានមជ្ឈិមបូព៌ា Middle East Eye ផ្សាយកាលពីថ្ងៃទី១០ ខែឧសភា ឆ្នាំ២០២៦ ។

អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បង្ហោះសារនៅលើបណ្តាញសង្គម X ថា៖ « យើងសូមរំឭកពួកគេ [បារាំងនិងអង់គ្លេស] ថា ទាំងក្នុងសម័យសង្គ្រាមនិងសម័យសន្តិភាពមានតែសាធារណរដ្ឋអ៊ីរ៉ង់ប៉ុណ្ណោះ ដែលអាចបង្កើតសន្តិសុខនៅក្នុងច្រកសមុទ្រនេះបាន ហើយយើងនឹងមិនអនុញ្ញាតឱ្យប្រទេសណាមួយជ្រៀតជ្រែកក្នុងបញ្ហានេះនោះទេ»។

អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi . រូបភាព៖ បណ្តាញសង្គម X ផ្ទាល់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ចក្រភពអង់គ្លេសនិងបារាំងកំពុងដឹកនាំកិច្ចខិតខំប្រឹងប្រែង ដើម្បីបង្កើតសម្ព័ន្ធភាពអន្តរជាតិក្នុងការធានាថាច្រកសមុទ្រហ័រមូសមានសុវត្ថិភាព។

ក្រសួងការពារជាតិចក្រភពអង់គ្លេសបានប្រកាសកាលពីថ្ងៃសៅរ៍ថា ខ្លួននឹងបញ្ជូននាវាពិឃាតមួយគ្រឿងទៅកាន់មជ្ឈិមបូព៌ា ដោយអះអាងថា នាវានោះនឹងពង្រឹងទំនុកចិត្តក្នុងចំណោមការដឹកជញ្ជូនពាណិជ្ជកម្មនិងគាំទ្រដល់កិច្ចខិតខំប្រឹងប្រែងបោសសម្អាតមីន ពេលអរិភាពបញ្ចប់។

អ្នកនាំពាក្យក្រសួងការពារជាតិអង់គ្លេសប្រាប់ AFP ថា៖ « ការដាក់ពង្រាយនាវាចម្បាំង HMS Dragon គឺជាផ្នែកមួយនៃការធ្វើផែនការប្រកបដោយប្រុងប្រយ័ត្នដែលនឹងធានាថាចក្រភពអង់គ្លេសបានត្រៀមខ្លួនរួចជាស្រេច ក្នុងនាមជាផ្នែកមួយនៃសម្ព័ន្ធភាពពហុជាតិសាស្រ្តដឹកនាំរួមគ្នាដោយចក្រភពអង់គ្លេសនិងបារាំង ដើម្បីធានាសុវត្ថិភាពច្រកសមុទ្រ [Hormuz] ពេលមានលក្ខខណ្ឌដែលត្រូវអនុញ្ញាត»។

យ៉ាងណាជុំវិញបញ្ហានេះ ប្រធានាធិបតីបារាំង លោក Emmanuel Macron បញ្ជាក់កាលពីថ្ងៃអាទិត្យថា៖ « ប្រទេសបារាំងមិនដែលគិតទុកជាមុនពីការដាក់ពង្រាយកងទ័ពជើងទឹកនៅច្រកសមុទ្រ Hormuz ទេ ប៉ុន្តែផ្ទុយទៅវិញវាគឺជាបេសកកម្មសន្តិសុខដែលនឹងត្រូវបានសម្របសម្រួលជាមួយអ៊ីរ៉ង់»៕

ប្រែដោយ៖ ណឺ មិនា