ព័ត៌មានអន្ដរជាតិ

អ៊ីរ៉ង់ ប្តឹងទៅ UN ឱ្យធ្វើសកម្មភាពបន្ទាន់ ចំពោះការដែលអាមេរិក វាយប្រហារលើខ្លួន ម្តងហើយម្តងទៀត

បានផុស

២៧ វិនាទី មុន

នៅ

ថ្ងៃព្រហស្បតិ៍ ៩ កក្កដា ២០២៦

ដោយ

ឯកអគ្គរដ្ឋទូត និងជាតំណាងអចិន្ត្រៃយ៍របស់អ៊ីរ៉ង់ ប្រចាំអង្គការសហប្រជាជាតិ(UN) លោក Amir Saeid Iravani បានផ្ញើលិខិតមួយច្បាប់ទៅកាន់អគ្គលេខាធិការ UN លោក António Guterres និងក្រុមប្រឹក្សាសន្តិសុខអង្គការសហប្រជាជាតិ(UNSC) បន្ទាប់ពីការវាយប្រហារចុងក្រោយរបស់សហរដ្ឋអាមេរិក ដែលរំលោភលើបទឈប់បាញ់ និងអនុស្សរណៈនៅទីក្រុងអ៊ីស្លាម៉ាបាដ ក៏ដូចជាបណ្តាលឱ្យយោធាអ៊ីរ៉ង់ចំនួន ៨នាក់ ស្លាប់។ នេះបើយោងតាមសារព័ត៌មាន WANA ផ្សាយនៅថ្ងៃទី៩ ខែកក្កដា ឆ្នាំ២០២៦ ។

ឯកអគ្គរដ្ឋទូត អ៊ីរ៉ង់ប្រចាំអង្គការសហប្រជាជាតិ(UN) លោក Amir Saeid Iravani ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងលិខិតផ្ញើនៅល្ងាចថ្ងៃពុធ លោក Iravani រៀបរាប់ថា៖ « អាមេរិកបានបើកការវាយប្រហារយោធាទ្រង់ទ្រាយធំម្តងទៀត ប្រឆាំងនឹងអធិបតេយ្យភាព និងបូរណភាពទឹកដីរបស់សាធារណរដ្ឋអ៊ីរ៉ង់។ ការធ្វើបែបនេះ ជាការរំលោភបំពានយ៉ាងច្បាស់ លើធម្មនុញ្ញ UN និងកាតព្វកិច្ចអន្តរជាតិរបស់ខ្លួន»។

លោកបន្ថែមថា ការវាយប្រហារទាំងនេះ បានកំណត់គោលដៅទៅលើទីតាំងនានានៅភាគខាងត្បូងអ៊ីរ៉ង់ ជាពិសេសនៅទីក្រុង Bushehr ក៏ដូចជាកោះមួយចំនួនរបស់អ៊ីរ៉ង់ នៅឈូងសមុទ្រពែរ្ស។

លោក Iravani បញ្ជាក់ថា ការវាយប្រហារថ្មីនេះ គឺរំលោភបំពានយ៉ាងច្បាស់មួយទៀតលើមាត្រា ២(៤) នៃធម្មនុញ្ញ UN និងជាការរំលោភបំពានជាមូលដ្ឋានលើប្រការ១ នៃអនុស្សរណៈអ៊ីស្លាម៉ាបាដ ដែលអាមេរិកបានប្តេជ្ញាចិត្តដោយគ្មានលក្ខខណ្ឌ ដើម្បីបញ្ឈប់សកម្មភាពយោធាទាំងអស់ប្រឆាំងនឹងអ៊ីរ៉ង់ និងចៀសវាងការគំរាមកំហែង ឬការប្រើប្រាស់កម្លាំងប្រឆាំងនឹងអធិបតេយ្យភាព និងបូរណភាពទឹកដីអ៊ីរ៉ង់។

អ្នកកាទូតអ៊ីរ៉ង់រូបនេះបន្តថា ដោយការរំលោភបំពានម្តងហើយម្តងទៀតរបស់អាមេរិក និងដោយចេតនាលើការប្តេជ្ញាចិត្តទាំងនោះ ពួកគេត្រូវតែទទួលខុសត្រូវពេញលេញ ចំពោះផលវិបាកផ្នែកច្បាប់និងនយោបាយទាំងអស់ កើតចេញពីការប្រព្រឹត្តខុសច្បាប់ និងការកើនឡើងដ៏គ្រោះថ្នាក់របស់ខ្លួន។

លោកក៏អំពាវនាវឱ្យប្រមុខ UN និងក្រុមប្រឹក្សាសន្តិសុខបំពេញកាតព្វកិច្ចភ្លាមៗ ក្រោមធម្មនុញ្ញ UN ដោយចាត់វិធានការបន្ទាន់ មានប្រសិទ្ធភាព និងម៉ឺងម៉ាត់ ដើម្បីបង្ខំសហរដ្ឋអាមេរិកឱ្យបញ្ឈប់ទង្វើឈ្លានពានខុសច្បាប់ដែលកំពុងបន្ត ទប់ស្កាត់ការកើនឡើងបន្ថែមទៀត និងធានាការទទួលខុសត្រូវពេញលេញរបស់សហរដ្ឋអាមេរិកចំពោះទង្វើឈ្លានពាន ការរំលោភបំពានយ៉ាងធ្ងន់ធ្ងរលើច្បាប់អន្តរជាតិ និងឧក្រិដ្ឋកម្មធ្ងន់ធ្ងរ៕

សម្រួល៖ ណឺ មិនា