ព័ត៌មានជាតិ

កម្ពុជា មានភាពម្ចាស់ការលើការបណ្ដុះបណ្ដាល និង ផ្គត់ផ្គង់កម្លាំងពលកម្មផ្នែកយានយន្តគ្រប់ប្រភេទ ចាប់ពីចុងឆ្នាំ ២០២៧ ខាងមុខ

បានផុស

៣២ វិនាទី មុន

នៅ

ថ្ងៃចន្ទ ១៥ មិថុនា ២០២៦

ដោយ

រាជរដ្ឋាភិបាល ដែលមាន ក្រសួងការងារ និង បណ្ដុះបណ្ដាលវិជ្ជាជីវៈ ជាសេនាធិការ នឹងធ្វើឲ្យ កម្ពុជា មានភាពម្ចាស់ការលើការបណ្ដុះបណ្ដាល និង ផ្គត់ផ្គង់កម្លាំងពលកម្មផ្នែកយានយន្តគ្រប់ប្រភេទទាំងស្រុង ចាប់ពីចុងឆ្នាំ ២០២៧ នេះតទៅ ដើម្បីធ្វើយ៉ាងណា ធានាលើការផ្គត់ផ្គង់កម្លាំងពលកម្មឲ្យបានគ្រប់គ្រាន់ ស្របតាមតម្រូវការជាក់ស្ដែង និង ខ្សែចង្វាក់ផលិតកម្មក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សួរ រដ្ឋមន្រ្តីក្រសួងការងារ និង បណ្ដុះបណ្ដាលវិជ្ជាជីវៈ បានលើកឡើងក្នុងពិធីអបអរសាទរទិវាជាតិអប់រំបណ្ដុះបណ្ដាលបច្ចេកទេស និង វិជ្ជាជីវៈ លើកទី ៩ ឆ្នាំ ២០២៦ កាលពីព្រឹកថ្ងៃទី ១៥ ខែមិថុនា នេះថា តាមរយៈការបង្កើតមជ្ឈមណ្ឌលឧត្តមភាពយានយន្តកម្ពុជា (ACE-C) ដោយបានសហការជាមួយវិទ្យាស្ថាន Bendigo Kangan Institute (BKI) នៃប្រទេសអូស្ត្រាលី និង ក្រុមហ៊ុន RMA Cambodia បានបង្កើតមជ្ឈមណ្ឌលឧត្តមភាពយានយន្តកម្ពុជា ដើម្បីបណ្តុះបណ្តាលជំនាញដល់ប្រជាជនកម្ពុជាក្លាយជាអ្នកជំនាញផ្នែកយានយន្ត មេកានិច និង ជួសជុលដែលមានសមត្ថភាពខ្ពស់។

លោកបន្តថា «តាមរយៈការដាក់ឲ្យដំណើរការមជ្ឈមណ្ឌលយានយន្តទាំងនេះ នឹងធ្វើឲ្យ កម្ពុជា មានភាពម្ចាស់ការលើការបណ្ដុះបណ្ដាល និង ផ្គត់ផ្គង់កម្លាំងពលកម្មកម្ពុជា ផ្នែកយានយន្តគ្រប់ប្រភេទទាំងស្រុង ចាប់ពីចុងឆ្នាំ ២០២៧ នេះតទៅ ដែលនេះ គឺជាមោទនភាពមួយរបស់កម្ពុជារបស់យើង ហើយក្រសួង នឹងខិតខំសហការជាមួយដៃគូ ហើយនឹងក្រុមហ៊ុនឯកជនបន្ថែមទៀត ដើម្បីធ្វើយ៉ាងណា ធានាម្ចាស់ការ និង ផ្គត់ផ្គង់កម្លាំងពលកម្ម ឲ្យស្របទៅតាមតម្រូវការជាក់ស្ដែង ខ្សែចង្វាក់ផលិតកម្មមួយ»។

លើសពីនេះ ក្នុងឆ្នាំ ២០២៧ ខាងមុខនេះ ក្រសួងការងារ ក៏ទទួលបានការគាំទ្រពីធនាគាអភិវឌ្ឍអាស៊ី ក្នុងការបំពាក់ឧបករណ៍ សម្ភារៈសិក្សានៅវិទ្យាស្ថានបណ្ដុះបណ្ដាលបច្ចេកទេសខេត្តកំពង់ធំ ដើម្បីជំនាញមួយពាក់ព័ន្ធផលិតកម្មផលិតផលស្វាយចន្ទី ដែលអាចបង្កើនតម្លៃបន្ថែមដល់ផលិតផលស្វាយចន្ទីនៅកម្ពុជា ស្របតាមការអភិវឌ្ឍ និង លើកកម្ពស់ផលិតកម្មស្វាយចន្ទីនៅកម្ពុជា៕