មន្ត្រីអធិការកិច្ចសន្តិសុខសង្គម ១៦៣ នាក់ ទទួលការបណ្តុះបណ្តាលពង្រឹងជំនាញវិជ្ជាជីវៈ

វិទ្យាស្ថានជាតិការងារ សហការជាមួយ បេឡាជាតិសន្តិសុខសង្គម (ប.ស.ស) នៃក្រសួងការងារ និង បណ្តុះបណ្តាលវិជ្ជាជីវៈ បានរៀបចំវគ្គបណ្តុះបណ្តាលពិសេសមួយ ជូនដល់ មន្ត្រីអធិការកិច្ចសន្តិសុខសង្គមទាំងនៅថ្នាក់កណ្តាល និង សាខា ប.ស.ស រាជធានី-ខេត្ត សរុបចំនួន ១៦៣ នាក់ ចាប់ពីថ្ងៃទី ១១ ដល់ថ្ងៃទី ១២ ខែមិថុនា ឆ្នាំ ២០២៦ ក្នុងគោលបំណងធានាឲ្យមន្ត្រីអធិការកិច្ចសន្តិសុខសង្គមអាចបំពេញតួនាទី និង ភារកិច្ចរបស់ខ្លួនបានប្រកបដោយប្រសិទ្ធភាព វិជ្ជាជីវៈ និង បុរេសកម្ម។

ថ្លែងក្នុងពិធីបិទវគ្គបណ្តុះបណ្តាល លោក ហួត ស៊ីនាដ រដ្ឋលេខាធិការ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និង បណ្តុះបណ្តាលវិជ្ជាជីវៈ បានគូសបញ្ជាក់ថា មន្ត្រីអធិការកិច្ចសន្តិសុខសង្គម គឺជាប្រតិបត្តិករដ៏មានសារៈសំខាន់ក្នុងការត្រួតពិនិត្យការអនុវត្តបទប្បញ្ញត្តិច្បាប់នៅតាមសហគ្រាស ក្រុមហ៊ុន និង រោងចក្រ នានា។

លោកសង្កត់ធ្ងន់ថា ការពង្រឹងសមត្ថភាពមន្ត្រីអធិការកិច្ចសន្តិសុខសង្គម និង ការបង្កើនប្រសិទ្ធភាពផ្នែកអធិការកិច្ច គឺជាអាទិភាពមួយនៅក្នុងក្របខ័ណ្ឌគោលនយោបាយវិស័យការងារ សន្តិសុខសង្គម និង បណ្តុះបណ្តាលវិជ្ជាជីវៈ។

លោកបន្ថែមថា មន្ត្រីអធិការកិច្ចសន្តិសុខសង្គម មិនត្រឹមតែផ្តោតលើការអនុវត្តរបបសន្តិសុខសង្គមប៉ុណ្ណោះទេ ប៉ុន្តែថែមទាំងត្រូវធ្វើការងារដោយប្រទាក់ក្រឡាគ្នាជាមួយអធិការការងារ និង អធិការពេទ្យការងារ ដើម្បីរួមគ្នាការពារសិទ្ធិ និង ផលប្រយោជន៍របស់កម្មករ-និយោជិត ដែលជាសមាជិក ប.ស.ស តាមបណ្តាសហគ្រាស ក្រុមហ៊ុន និង រោងចក្រ។

សម្រាប់ខ្លឹមសារសិក្សាក្នុងវគ្គបណ្តុះបណ្តាលរយៈពេល ២ ថ្ងៃនេះ បានគ្របដណ្តប់ទៅលើប្រធានបទសំខាន់ៗ ចំនួន ៤ រួមមាន ច្បាប់ស្តីពីការងារ កិច្ចសន្យាការងារ លក្ខខណ្ឌសុវត្ថិភាព និង សុខភាពការងារ ព្រមទាំងគ្រោះថ្នាក់ការងារ និង ជំងឺវិជ្ជាជីវៈ៕