តម្លៃប្រេងកើនបន្តិចថ្ងៃ​នេះ ក្រោយធ្លាក់ចុះគំហុកសប្ដាហ៍មុន ខណៈអាមេរិក និងអ៊ីរ៉ង់បើកការវាយប្រហារថ្មី

តម្លៃប្រេងអន្តរជាតិ​បាន​កើនឡើងបន្តិចនៅលើទីផ្សារអាស៊ីនាព្រឹកថ្ងៃចន្ទនេះ ក្រោយធ្លាក់ចុះជាគំហុកកាលពីសប្ដាហ៍មុន ​ខណៈសហរដ្ឋអាមេរិក និងអ៊ីរ៉ង់បើកការវាយប្រហារគ្នាជាថ្មី ទោះបីមានកិច្ចព្រមព្រៀងសន្ដិភាពបណ្ដោះអាសន្ន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅ​ម៉ាក​ Brent បានកើនឡើង ៥២ សេន ឬ ០,៦២% ដល់ ៧២,៥១ ដុល្លារ/បារ៉ែល គិតត្រឹមម៉ោងជាង ៧ ព្រឹកនៅទីក្រុងហុងកុង ខណៈតម្លៃប្រេងអាមេរិក WTI បាន​កើនឡើង ៧១ សេន ឬ ១,០៣% ដល់ ៦៩,៩៤ ដុល្លារ/បារ៉ែល។ ​

យ៉ាងណាមិញ តម្លៃប្រេង Brent បាន​ធ្លាក់ចុះគំហុក ១០,៦% កាលពីសប្ដាហ៍មុន ក្រោយអាមេរិក និងអ៊ីរ៉ង់ចុះកិច្ចព្រមព្រៀងសន្ដិភាពបណ្ដោះអាសន្ន ដែលធ្វើឱ្យការដឹកជញ្ជូនប្រេងកាត់តាមច្រកហ័រមូហ្សកើនដល់កម្រិតខ្ពស់បំផុតរាប់តាំងពីជម្លោះផ្ទុះឡើង។ ​

យ៉ាងណាមិញ នាវាចរណ៍នៃកប៉ាល់ដឹកប្រេងបា​នថយចុះមកវិញ ក្រោយមាន​ការវាយប្រហារលើកប៉ាល់ក្នុងច្រកហ័រមូហ្សកាលពីថ្ងៃព្រហស្បតិ៍ រួមទាំង​កប៉ាល់ដឹកប្រេង​មានទំនាក់ទំនងជាមួយប្រទេសកាតា ខណៈអាមេរិក និងអ៊ីរ៉ង់វាយប្រហារដាក់គ្នាជាថ្មីដោយចោទប្រកាន់ភាគីរៀងៗខ្លួន​ថារំលោភកិច្ចព្រមព្រៀង។

អ្នកជំនាញមើលឃើញថា ការវាយប្រហារចុងក្រោយគឺជាការផ្ដល់សញ្ញាថា ទីផ្សារប្រេងនៅតែមានការប្រែប្រួលខ្លាំង ទៅតាមការវិវត្តប្រចាំថ្ងៃនៃភាពតានតឹងអាមេរិក និង​អ៊ីរ៉ង់៕

​