ផ្លូវ និងស្ពាន នៅខេត្តភាគពាយ័ព្យរងការជន់លិច ដោយសារទឹកភ្លៀង

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងថា ភ្លៀងធ្លាក់ជាប់ៗគ្នានៅខេត្ត​ភាគពាយ័ព្យ បណ្តាលឲ្យខ្សែផ្លូវ ស្ពាន រងការជន់លិចរយៈពេលខ្លី រំខានខ្លះដល់ការធ្វើដំណើររបស់បងប្អូនប្រជាពលរដ្ឋ។

តាមការបញ្ជាក់របស់មន្ទីរសាធារណការ និងដឹកជញ្ជូនខេត្តប៉ៃលិន ពោធិ៍សាត់ និងបាត់ដំបង បានឲ្យដឹងនៅព្រឹកថ្ងៃទី៥ ខែកក្កដា ឆ្នាំ២០២៦នេះថា ពេលនេះទឹកបានស្រក ខណៈដែលភ្លៀងនៅបន្តរលឹមឥតដាច់គ្រាប់។

រដ្ឋបាលស្រុកសំឡូត ខេត្តបាត់ដំបង បានប្រកាសថា ទឹកស្ទឹងក្រញូង និងស្ទឹងបរឡាង ទើបតែឡើងតិចតួចនៅឡើយ។

រដ្ឋបាលស្រុកសំឡូត កាលពីថ្ងៃទី៤ ខែកក្កដា បានប្រកាសដល់ប្រជាពលរដ្ឋក្នុងស្រុកសំឡូត ដែលរស់នៅតាម​​ដងស្ទឹង អូរប្រឡាយ ប្រុងប្រយ័ត្នឲ្យបានខ្ពស់ ចំពោះសុវត្ថិភាពមនុស្សចាស់ កុមារ និងទ្រព្យសម្បត្តិ ព្រមទាំងសម្ភារ:ផ្សេងៗ ព្រោះស្ថានភាពមេឃនៅតែបន្តភ្លៀងធ្លាក់មិនទាន់ឈប់។

មន្ទីរសាធារណការ និងដឹកជញ្ជូននៅខេត្តភាគពាយ័ព្យបន្តតាមដានស្ថានភាពទឹក និងត្រៀមខ្លួនជានិច្ចអន្ត​រាគមន៍ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ៕