ព័ត៌មានជាតិ

សភាផ្ដល់សេចក្ដីទុកចិត្តដល់លោក ប្រាក់ សំអឿន ជាទេសរដ្ឋមន្ត្រីទទួលបន្ទុកបេសកកម្មពិសេសធ្វើឱ្យមន្ត្រីក្នុងតំណែងនេះមានដល់២៣នាក់

បានផុស

២១ វិនាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

សភាកម្ពុជាបានបោះឆ្នោតផ្ដល់សេចក្ដីទុកចិត្តដល់លោក ប្រាក់ សំអឿន ជាទេសរដ្ឋមន្ត្រីទទួលបន្ទុកបេសកកម្មពិសេសក្នុងសម័យប្រជុំពេញអង្គសភាលើកទី៦ នីតិកាលទី៧ នៅថ្ងៃទី១៤ ខែកក្កដា ឆ្នាំ២០២៦នេះ។ តាមរយៈការបោះឆ្នោតបន្ថែមនេះធ្វើឱ្យចំនួនទេសរដ្ឋមន្ត្រីទទួលបន្ទុកបេសកកម្មពិសេសរបស់រដ្ឋាភិបាលអាណត្តិទី៧ មានចំនួន២៣នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការបោះឆ្នោតនៅវិមានរដ្ឋសភានៅព្រឹកនេះ លោក ប្រាក់ សំអឿន ទទួលសំឡេងគាំទ្រចំនួន១០៨ ក្នុងចំណោមសមាជិកសភាដែលមានវត្តមានសរុប១១០នាក់ ក្នុងនោះមានអនុប្បវាទចំនួន២សំឡេង។

ប្រធានរដ្ឋសភាសម្ដេចសភាធិបតី ឃួន សុដារី បានប្រកាសអបអរសាទរដល់លោក ប្រាក់ សំអឿន ចំពោះការទទួលបានសេចក្ដីទុកចិត្តនេះផងដែរ។

សម្ដេចថា៖ «អនុលោមតាមលទ្ធផលនៃការបោះឆ្នោតផ្ដល់សេចក្ដីទុកចិត្តអំបាញ់មិញនេះ ខ្ញុំម្ចាស់ខ្ញុំសូមប្រកាសថាឯកឧត្ដម ប្រាក់ សំអឿន ជាទេសរដ្ឋមន្ត្រីទទួលបន្ទុកបេសកកម្មពិសេស ត្រូវបានអង្គសភាបោះឆ្នោតផ្ដល់សេចក្ដីទុកចិត្តជាប់នាសម័យប្រជុំសភាលើកទី៦ នីតិកាលទី៧ នៅថ្ងៃទី១៤ ខែកក្កដា ឆ្នាំ២០២៦ សូមអង្គសភាអបអរសាទរ»។

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានបញ្ជាក់ថាការស្នើសភាឱ្យបោះឆ្នោតផ្ដល់សេចក្ដីទុកចិត្តដល់លោក ប្រាក់ សំអឿន នេះគឺដោយសារភាពចាំបាច់របស់រដ្ឋាភិបាលដើម្បីពង្រឹងគុណតម្លៃភាពជាដៃគូរ លើកកម្ពស់ការងារ កិច្ចសហប្រតិបត្តិការ និងសម្រុះសម្រួលការងារជាមួយអង្គការសង្គមស៊ីវិលនៅកម្ពុជា។

លោក ប្រាក់ សំអឿន គឺជាមន្ត្រីជាន់ខ្ពស់ម្នាក់របស់រដ្ឋាភិបាលតាំងពីអាណត្តិដឹកនាំដោយសម្ដេចតេជោ ហ៊ុន សែន ក្នុងអាណត្តិទី៧ មុនទទួលបានការទុកចិត្តពីសភាជាទេសរដ្ឋមន្ត្រីទទួលបន្ទុកបេសកកម្មពិសេសលោកគឺជារដ្ឋមន្ត្រីប្រតិភូអមនាយករដ្ឋមន្ត្រី និងជានាយរងខុទ្ទកាល័យសម្ដេចធិបតី ហ៊ុន ម៉ាណែត ផងដែរ។

បច្ចុប្បន្នចំនួនទេសរដ្ឋមន្ត្រីទទួលបន្ទុកបេសកកម្មចំនួន២៣នាក់ហើយ៕