លោក ហ្សេលេនស្គី ដកតំណែងរដ្ឋមន្ត្រីការពារជាតិ ដែលគេឲ្យរហស្សនាម «ស្តេចត្រាញ់ដ្រូន»

លោក Mykhailo Fedorov ដែលជាអ្នកជំរុញយ៉ាងសកម្មដល់កម្មវិធីដ្រូនយោធារបស់អ៊ុយក្រែន ឬហៅថា «ស្តេចត្រាញ់ដ្រូន» ត្រូវបានប្រធានាធិបតី លោក វ៉ូឡូឌីមៀរ ហ្សេលេនស្គី ដកចេញពីតំណែងជារដ្ឋមន្ត្រីក្រសួងការពារជាតិ បន្ទាប់ពីបានកាន់តំណែងនេះអស់រយៈពេលកន្លះឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Fedorov បានបង្ហោះសារលើបណ្តាញសង្គម នៅ​ថ្ងៃទី១៥ ខែកក្កដា បន្ទាប់ពីការសម្រេចចិត្តដកតំណែងរបស់លោកដោយប្រធានាធិបតី ហ្សេលេនស្គី ថា «វាជាកិត្តិយសដ៏ឧត្តុង្គឧត្តមសម្រាប់រូបខ្ញុំ ក្នុងការបម្រើប្រជាជនអ៊ុយក្រែន ក្នុងនាមជារដ្ឋមន្ត្រីការពារជាតិ»។ នេះបើយោងតាមការដកស្រង់​ និង​ចុះផ្សាយដោយសារព័ត៌មាន the guardian។

ការសម្រេចចិត្តនេះ គឺជាផ្នែកមួយនៃកិច្ចប្រឹងប្រែងកែទម្រង់រចនាសម្ព័ន្ធរដ្ឋាភិបាល ដែលលោក ហ្សេលេនស្គី បានអនុវត្ត បន្ទាប់ពីការដកតំណែងនាយករដ្ឋមន្ត្រី លោកស្រី Yulia Svyrydenko។ យោងតាមប្រព័ន្ធផ្សព្វផ្សាយអ៊ុយក្រែន បុគ្គលដែលអាចនឹងមកជំនួសតំណែងលោក Fedorov គឺរដ្ឋមន្ត្រីក្រសួងមហាផ្ទៃ លោក Igor Klymenko។ ទោះជាយ៉ាងណា គេនៅមិនទាន់ច្បាស់នៅឡើយទេថា លោក Fedorov នឹងត្រូវផ្តល់តំណែងផ្សេងទៀតនៅក្នុងគណៈរដ្ឋមន្ត្រីដែរឬយ៉ាងណា។

នៅក្នុងអំឡុងពេល ៦ខែ នៃការកាន់តំណែងជារដ្ឋមន្ត្រីការពារជាតិ យោធាអ៊ុយក្រែនសម្រេចបាននូវសមិទ្ធផលសំខាន់ៗជាច្រើន ជាពិសេសនៅក្នុងវិស័យដ្រូន ក៏ដូចជាការចាប់ផ្តើមកម្មវិធីកែទម្រង់ស៊ីជម្រៅនៃកងកម្លាំងប្រដាប់អាវុធ។ នេះហើយជាហេតុធ្វើឲ្យលោក Fedorov ត្រូវបានគេស្គាល់ផងដែរថាជា «ស្តេចត្រាញ់ដ្រូន» របស់អ៊ុយក្រែន។

លោក Fedorov បានឲ្យដឹងថា ក្នុងរយៈពេល ៦ខែកន្លងមកនេះ យោធាអ៊ុយក្រែនបានសាកល្បងដោយជោគជ័យនូវគ្រាប់មីស៊ីលបាលីស្ទីក មួយប្រភេទ។ លោកបានលើកឡើងថា «យើងបានកែសម្រួលតម្រូវការបច្ចេកទេសជាមូលដ្ឋាន សម្រេចបាននូវភាពសុក្រឹតជាអតិបរមា និងបានកាត់បន្ថយការចំណាយរហូតដល់ ៣០%។ អ៊ុយក្រែននឹងឈានទៅរកកម្រិតថ្មីមួយទៀត»។

លើសពីនេះ បុរសវ័យ៣៥ឆ្នាំរូបនេះ បានដើរតួនាទីយ៉ាងសំខាន់ក្នុងការចរចាកិច្ចព្រមព្រៀងជាមួយមហាសេដ្ឋីបច្ចេកវិទ្យា លោក Elon Musk ដើម្បីដាក់ពង្រាយសេវាអ៊ីនធឺណិតផ្កាយរណប Starlink សម្រាប់យោធាអ៊ុយក្រែន ព្រមទាំងបានរឹតត្បិត មិនឲ្យកងកម្លាំងរុស្ស៊ីអាចចូលប្រើប្រាស់ប្រព័ន្ធនេះបានផងដែរ។

យ៉ាងណាមិញ ការដកតំណែងលោក Fedorov នេះ បានជួបប្រទះនឹងការមិនពេញចិត្តយ៉ាងខ្លាំងពីសំណាក់អ្នកគាំទ្រ ចំពេលមានការសង្ស័យអំពីការខ្វែងគំនិតគ្នារវាងរូបលោក និងអគ្គមេបញ្ជាការនៃកងកម្លាំងប្រដាប់អាវុធអ៊ុយក្រែន គឺលោកឧត្តមសេនីយ៍ Oleksandr Syrskyi។ អ្នកគាំទ្រអ៊ុយក្រែនជាច្រើន រួមទាំងអតីតឯកអគ្គរដ្ឋទូតអាមេរិកប្រចាំរុស្ស៊ី លោក Michael McFaul បានអំពាវនាវជាសាធារណៈសុំឲ្យលោក ហ្សេលេនស្គី រក្សាលោក Fedorov ទុកនៅក្នុងគណៈរដ្ឋមន្ត្រី។

គួរបញ្ជាក់ដែរថា លោក Fedorov ត្រូវបានតែងតាំងដោយប្រធានាធិបតី ហ្សេលេនស្គី កាលពីខែមករា ដោយបានក្លាយជារដ្ឋមន្ត្រីការពារជាតិដែលមានវ័យក្មេងជាងគេបំផុតនៅក្នុងប្រវត្តិសាស្ត្ររបស់អ៊ុយក្រែន ជាមួយនឹងភារកិច្ចផ្តល់កម្លាំងរុញច្រានថ្មីដល់កិច្ចប្រឹងប្រែងយោធារបស់ទីក្រុងកៀវ។ លោកក៏ជាមនុស្សដំបូងគេម្នាក់ ដែលបានជំរុញឲ្យមានការប្រើប្រាស់ដ្រូនយ៉ាងទូលំទូលាយ ដែលជាអាវុធដ៏លេចធ្លោបំផុតមួយនៅលើសមរភូមិអ៊ុយក្រែន៕

អត្ថបទ ៖ សាង ស្រីល័ក្ខ

លោក ត្រាំ នឹង​ជួបមេដឹកនាំ អ៊ុយក្រែន និងស៊ីរី អំឡុងពេល​ចូលរួម​កិច្ចប្រជុំកំពូលណាតូ នៅ​តួកគី