យកសំណាកទៅធ្វើតេស្តជិត ៦០០ នាក់ រកឃើញអ្នកវិជ្ជមាន ២៧ នាក់ នៅខេត្ត រតនគីរី

អាជ្ញាធរខេត្ត រតនគីរី បានយកសំណាកអ្នកពាក់ព័ន្ធ ទៅធ្វើតេស្តជិត ៦០០ នាក់ ក្នុងនោះរកឃើញវិជ្ជមានកូវីដ ១៩ ចំនួន ២៧ នាក់ ដែលធ្វើ​ឲ្យអ្នកឆ្លងកើនឡើងជាង ៥៣០ នាក់។

យោងតាមសេចក្តីជូនដំណឹងរបស់រដ្ឋបាលខេត្ត រតនគីរី ចុះថ្ងៃទី ០៣ កក្កដា នេះបានឲ្យដឹងថា រដ្ឋបាលខេត្តបានយកសំណាកអ្នកពាក់ព័ន្ធនឹងជំងឺកូវីដចំនួន ៥៧០ នាក់ទៅធ្វើតេស្តរកវីរុសកូវីដ ១៩ ហើយជាលទ្ធផលរកឃើញអ្នកមានវិជ្ជមានចំនួន ២៧ នាក់។

រដ្ឋបាលខេត្តបានអំពាវនាវដល់អ្នកដែលបានប៉ះពាល់ដោយផ្ទាល់ឬប្រយោលជាមួយអ្នកវិជ្ជមានជំងឺកូវីដ១៩កន្លងមកសូមស្ម័គ្រចិត្តទៅធ្វើតេស្តនិងដាក់ខ្លួននៅដាច់ដោយឡែកពីអ្នកដ៏ទៃនិងតាមដានសុខភាពរបស់ខ្លួនជាប្រចាំហើយក្នុងករណីមានបញ្ហាសុខភាពសូមប្រញាប់រាយការណ៍ទៅអាជ្ញាធរមូលដ្ឋានជាបន្ទាន់។

គួរបញ្ជាក់ថា គិតត្រឹមថ្ងៃទី ០៣ ខែ កក្កដា ឆ្នាំ ២០២១ នេះ ខេត្ត រតនគីរី មានអ្នកឆ្លងជំងឺកូវីដ សរុបចំនួន ៥៣២ នាក់ជាសះស្បើយចំនួន ៦១ នាក់ កំពុងសម្រាកពេទ្យចំនួន ៤៧១ នាក់ និងស្លាប់បាត់បង់ជំវិតចំនួន ៤ នាក់៕

អត្ថបទ៖ សំអឿន