ទំនប់ស្ទាក់ទឹកស្ទឹងសង្កែសាង​សង់បាន៩០ ភាគរយ គ្រោងបញ្ចប់ដំណាច់ឆ្នាំនេះ

គម្រោងសាងសង់ទំនប់ស្ទាក់ទឹកស្ទឹងសង្កែ ស្ថិតក្នុងស្រុកឯកភ្នំ ដែលមានតម្លៃ៤០ លានដុល្លារ សម្រេចបាន​៩០ ភាគរយ ហើយគ្រោងនឹងបញ្ចប់នៅដំណាច់ឆ្នាំ២០២១។

ប្រធានមន្ទីរធនធានទឹក និងឧតុនិយមខេត្តបាត់ដំបង លោក ឡុង ផលគុណ បានឱ្យដឹងថា វឌ្ឍនភាពនៃការស្ថាបនាទំនប់ស្ទាក់ទឹកស្ទឹងសង្កែ ឬហៅថា ទំនប់ស្ទាក់ទឹកសាលាតាអន បានដំណើរការសាងសង់ជិតរួច​រាល់ជាស្ថាពរហើយ ហើយនឹងអ្វីដែលនៅសេសសល់គឺការងារកំពុងសម្អាតឲ្យបានត្រឹមត្រូវតាមស្តង់ដាររបស់គម្រោងតែប៉ុណ្ណោះ។

ទំនប់ស្ទាក់ទឹកស្ទឹងសង្កែឬ“ទំនប់សាលាតាអន”នេះបានកើតជារូបរាង្គឡើងស្ថិតក្នុងភូមិសាស្ត្រស្រុកឯកភ្នំខេត្តបាត់ដំបងជាសមិទ្ធិផលមួយដែលមហាជនក៏ដូចជាប្រជាពលរដ្ឋក្នុងខេត្តថាជាសមិទ្ធិផលប្រវត្តិសាស្ត្រក្នុងចំណោមសមិទ្ធិផលដូចគ្នាផ្សេងៗទៀតដែលរាជរដ្ឋាភិបាលកម្ពុជាបានខិតខំដើម្បីជាប្រយោជន៍សម្រាប់ខេត្តបាត់ដំបងប្រើប្រាស់ដល់វិស័យកសិកម្មរបស់ប្រជាកសិករក្រោមកម្ចីហិរញ្ញប្បទានសម្បទានរបស់សា​ធារណរដ្ឋកូរ៉េ។ជាពិសេសប្រយោជន៍នេះបានជួយដល់ប្រជាកសិករក្នុងស្រុកឯកភ្នំស្រុកសង្កែនិងក្រុងបាត់ដំបងក្រោយទំនប់សាលាតាអនមួយនេះត្រូវបានបញ្ចប់នូវការសាងសង់រួចរាល់ជាស្ថាពរនៅចុងឆ្នាំ២០២១​ឆាប់ៗខាងមុខនេះ។

ដោយមើលឃើញអំពីវឌ្ឍនះភាពក្នុងខេត្តបាត់ដំបងលើវិស័យធំៗជាបន្តបន្ទាប់ប្រជាពលរដ្ឋទូទាំងខេត្តរួមនិងអាជ្ញាធរខេត្តផងបានថ្លែងអំណរគុណចំពោះប្រមុខនៃរាជរដ្ឋាភិបាលកម្ពុជារួមនិងថ្នាក់ដឹកនាំក្រសួងនិងដៃគូអភិវឌ្ឍន៍នានាដែលបានផ្តល់នូវសមិទ្ធផលធំៗជាច្រើនដល់ខេត្តកន្លងមក។

ជាពិសេសក្នុងពេលប៉ុន្មានឆ្នាំមុននេះខេត្តបាត់ដំបងធ្លាប់បានទទួលនូវសមិទ្ធផលទំនប់ទឹកកង្ហតក្នុងស្រុកបាណន់,ទំនប់ពហុបំណងសេកសកនៅក្នុងស្រុករតនមណ្ឌលនិងទំនប់ក្បលស្ទឹងដូនទ្រីក្នុងស្រុករុក្ខគីរីដែលបានផ្តល់ឱកាសឲ្យប្រជាកសិករនិងប្រជាពលរដ្ឋនៅទីនោះមានជីវភាពកាន់តែប្រសើរតាមរយះវិស័យកសិកម្ម​និងផលដំណាំរួមផ្សំផ្សេងៗ។

លោកប្រធានមន្ទីរបញ្ជាក់បន្តថា:ទំនប់នេះវានិងផ្តល់នូវអត្ថប្រយោជន៍ដ៏មានសក្តានុពលនៃវិស័យសេដ្ឋកិច្ចរបស់ខេត្តឲ្យបានកាន់តែប្រសើរឡើងថែមទៀតតាមរយៈនៃសារៈប្រយោជន៍សំខាន់ៗចំនួន៣រួមមាន៖ទី១,រក្សានិងតម្កល់កម្ពស់ទឹកស្ទឹងសង្កែឲ្យជាប់ជាប្រចាំទាំងក្នុងរដូវប្រាំងនិងរដូវវស្សាដែលយ៉ាងហោចណាស់ក្នុងកម្រិតកម្ពស់ទឹកពី១០ទៅ១៣ម៉ែត្រមុននិងវាហូរធ្លាក់ចុះទៅតំបន់បឹងទន្លេសាប។

ទី២.បម្រើដល់ការផលិតនូវទឹកស្អាតសម្រាប់ការប្រើប្រាស់ជីវភាពប្រចាំថ្ងៃក្នុងទីប្រជុំជនក្រុងនិងស្រុកជិតខាងនឹងធ្វើឲ្យទីក្រុងបាត់ដំបងកាន់តែស្រស់ស្អាតដែលអាចទាក់ទាញដល់ភ្ញៀវទេសចរជាតិអន្តរជាតិមកទស្សនាកំសាន្តទៀតផង។

ទី៣.ទំនប់នេះបានផ្តល់នូវការស្រោចស្រពលើផ្ទៃដីដាំដុះដំណាំស្រូវនៅក្នុងរដូវវស្សាប្រមាណ១១ពាន់ហិកតានិងស្រូវប្រាំងប្រមាណ៤ពាន់ហិកតាផងដែរ៕ ដោយៈ សៅ សារិទ្ធ