ក្រុមប្រឹក្សាធម្មនុញ្ញ ​រៀបចំ​សេចក្តី​ទូលថ្វាយ​ព្រះមហាក្សត្រ​​ ​​ស្តីពី​ការកំណត់​សញ្ជាតិ សម្រាប់​ថ្នាក់​ដឹក​នាំ​​ស្ថាប័ន​​កំពូល​​

ក្រុមប្រឹក្សាធម្មនុញ្ញ នៅព្រឹកថ្ងៃទី១១ ខែតុលា ឆ្នាំ២០២១នេះ ​បានបើកកិច្ចប្រជុំពេញអង្គ ដើម្បីពិនិត្យ និង​​រៀបចំ​សេចក្តី​ទូលថ្វាយ​មតិ​ថ្វាយ​ព្រះករុណា​ជា​អម្ចាស់​ជីវិត​លើត្បូង ព្រះមហាក្សត្រ នៃព្រះរាជាណាចក្រកម្ពូជា ​លើ​សេចក្តី​​ព្រាងច្បាប់​ធម្មនុញ្ញ ស្តីពី​ការកំណត់ “សញ្ជាតិ​ខ្មែរ​តែមួយ” ចំពោះ​ថ្នាក់ដឹកនាំ​ស្ថាប័ន​កំពូល​របស់​ជាតិ​។

​​កិច្ចប្រជុំពេញអង្គ​​របសស់ក្រុមប្រឹក្សាធម្មនុញ្ញនេះ​ បាន​ធ្វើឡើងនៅ​អគារ​ស​វិមាន​រដ្ឋ​ចំការមន​ ក្រោម​អធិបតីភាព​លោក អ៊ឹម ឈុនលឹម ប្រធាន​ក្រុមប្រឹក្សាធម្មនុញ្ញ។

​​បើតាម​ក្រុមប្រឹក្សាធម្មនុញ្ញ​ កិច្ចប្រជុំនេះ ​ដើម្បី​ពិនិត្យ និង​រៀបចំ​សេចក្តី​ទូលថ្វាយ​មតិ​របស់​ក្រុមប្រឹក្សាធម្មនុញ្ញ​ថ្វាយ​ព្រះករុណា​ជា​អម្ចាស់​ជីវិត​លើត្បូង​ជាទីគោរព​សក្ការៈ​ដ៏ខ្ពង់ខ្ពស់​បំផុត​ ទ្រង់​ពិគ្រោះ​​មតិ​ក្រុមប្រឹក្សាធម្មនុញ្ញ តាមរយៈ​ព្រះរាជសារ​ចុះ​ថ្ងៃទី​០៨ ខែតុលា ឆ្នាំ​២០២១ ចំពោះ​សេចក្តី​ព្រាងច្បាប់​ធម្មនុញ្ញ ស្តីពី​វិសោធនកម្ម​មាត្រា​១៩​ថ្មី មាត្រា​៨២​ថ្មី មាត្រា​១០៦ ថ្មី (មួយ) មាត្រា​១១៩ ថ្មី និង​មាត្រា​១៣៧ ថ្មី នៃ​រដ្ឋធម្មនុញ្ញ នៃ​ព្រះរាជាណាចក្រ​កម្ពុជា និង​មាត្រា​៣ និង​មាត្រា​៤ នៃ​ច្បាប់​ធម្មនុញ្ញ បន្ថែម សំដៅ​ធានា​នូវ​ដំណើរការ​ជា​ប្រក្រតី នៃ​ស្ថាប័ន​ជាតិ​​៕

អត្ថបទ៖ កោះកែវ