កន្លងផុត ១២ ឆ្នាំ ទើបបែកធ្លាយរូបថតមង្គលការ តារាចម្រៀង មាស សុខសោភា

ភ្នំពេញ៖ គិតមកទល់ពេលនេះមានរយៈពេល ១២ ឆ្នាំហើយ ដែលតារាចម្រៀងស្រី មាស សុខសោភា បានរៀបមង្គលការជាមួយស្វាមី។

បើតាមប្រភពពីអ្នកសិល្បៈ ដែលជិតដិតបំផុតបានបង្ហើបថា អ្នកនាង មាស សុខសោភា បានចូលរោងការជាមួយស្វាមីនាអំឡុងឆ្នាំ ២០០៩ ប៉ុន្តែកាលនោះនាងមិនបានបញ្ចេញឱ្យដឹងជាសាធារណៈនូវពិធីមង្គលការរបស់ខ្លួនឡើយ ព្រោះទំនងខ្លាចបាក់ស្រុតនូវប្រជាប្រិយភាព និងការគាំទ្រនៅក្នុងអាជីពសិល្បៈ។

ថ្មីៗនេះស្រាប់តែឃើញរូបថតនៃពិធីមង្គលការរបស់អ្នកនាង មាស សុខសោភា ត្រូវបានទម្លាយជាសាធារណៈនៅបណ្តាញសង្គមហ្វេសប៊ុក។ តារាចម្រៀងប្រុស លោក ឆន សុវណ្ណារាជ បានបង្ហោះរូបភាព ២ សន្លឹកអមដោយការជូនពរនាឱកាសគម្រប់ ១២ ឆ្នាំនៃអាពាហ៍ពិពាហ៍របស់អ្នកនាង មាស សុខសោភា និងស្វាមី។

ចំណែកឯតារាស្រី ញឹម ច័ន្ទថន ក៏បានបង្ហោះសារដែរថា មើលមិនចង់ស្គាល់រូបខ្ញុំ និងលោក ឆន សុវណ្ណារាជ។ ពេលវេលាលឿនណាស់ ១២ ឆ្នាំ ខ្ញុំសប្បាយចិត្តពេលឃើញអ្នកទាំងពីរមានសេចក្តីសុខ។ សូមឱ្យសំណាងល្អជោគជ័យគ្រប់ការងារប៉ង ប្រាថ្នាអ្វីបានសម្រេចណា។

ទន្ទឹមគ្នានេះ មហាជន និងអ្នកគាំទ្រជាច្រើនបានផ្ញើសារអបអរ និងជូនពរ មាស សុខសោភា និងស្វាមីផងក្នុងខួបអាពាហ៍ពិពាហ៍ ១២ ឆ្នាំនេះដែរ៕

អត្ថបទ៖ ចាន់រ៉ា