មាស សុខសោភា ស្នើមហាជនទុកផ្លូវឱ្យខ្លួននិងតាសក់ស ក្រោយដឹងរឿងអតីតស្វាមីប្តឹង និងនៅតែមានការវែកញែក

រឿងរ៉ាវអាស្រូវនៃជីវិតគូរវាងតារាចម្រៀងល្បីឈ្មោះ មាស សុខសោភា និងអតីតស្វាមី លោក អ៉ិត រ៉ាដា ដ្បិតបានព្រមព្រៀងគ្នានៅចំពោះមុខច្បាប់បញ្ចប់ជចំណងស្នេហ៍ជាង ១៦ឆ្នាំហើយក៏ពិតមែន ប៉ុន្តែមហាជនក៏ដូចជាអ្នកសិល្បៈ បានចេញមកវែកញែកជុំវិញរឿងរ៉ាវនៃការបែកបាក់នេះ ថាទំនងជាជាប់ពាក់ព័ន្ធនឹងភាពងប់ងល់នៃជំនឿ។

យ៉ាងណា ឆ្លើយតបនឹងការចោទថាខាងលើ សាម៉ីខ្លួន ពោលអ្នកនាង មាស សុខសោភា បានចេញមុខអះអាងម្តងហើយម្តងទៀតថា អ្វីដែលខ្លួនធ្វើ គ្រាន់ជាការដឹងគុណលើបុគ្គលដែលខ្លួនហៅថាលោកឪ (តាសក់សភ្នំត្បែង) ប៉ុណ្ណោះ។

ខណៈមុននេះ​ អ្នកនាងបានចេញមុខការពារលោក វង្ស ចក្រាយយុទ្ធ ហៅតាសក់សភ្នំត្បែងជាថ្មី ក្រោយដឹងថាអតីតស្វាមីប្តឹងបុគ្គលរូបនោះ ដោយអះអាងថា រាល់ការបរិច្ចាគជូនតាសក់សភ្នំត្បែង គឺជាផ្តល់ឱ្យដោយខ្លួនឯង មិនមែនជាការបោកប្រាស់អ្វីឡើយ។

ទន្ទឹមនេះ អ្នកនាងបានលើកឡើងដែរថា ខ្លួននិងបុគ្គលកាន់សាសនាខាងលើ ក៏មានការធ្វើជំនួញជាមួយគ្នាផងដែរ។​ សូមស្តាប់វីដេអូលម្អិត៖

ពាក់ព័ន្ធនឹងការបែកបាក់ចែកផ្លូវគ្នាជាមួយអតីតស្វាមី តារាចម្រៀងស្រីល្បីឈ្មោះរូបនេះ ធ្លាប់បានទម្លាយពីឬសគល់នៃបញ្ហាជីវិតគូរបស់ខ្លួន និងអះអាងថា ការដែលឈានដល់ការស្វែងរកខ្លួនឯងតាមរយៈការសមាធិ ក៏ព្រោះតែពេលប្រឈមនឹងការបាក់ទឹកចិត្តម្តងៗ អ្នកនាងធ្លាប់ប៉ងបញ្ចប់ជីវិតមិនតិចនោះឡើយ។

តួយ៉ាង ទន្ទឹមនឹងវេលាដែលត្រូវការជំនួយបំផុត ក៏មានវត្តមានលោក វង្ស ចក្រាយយុទ្ធ ហៅតាសក់សភ្នំត្បែង ជាចំណែកនៃការបើកបង្ហាញផ្លូវសង្គ្រោះទុក្ខវិបត្តិផ្លូវចិត្តរបស់ខ្លួន ដោយហេតុនេះហើយ អ្នកនាងពោលពាក្យដឹងគុណដល់ តាសក់សភ្នំត្បែង និងអះអាងថា បើទោះជាឱ្យខ្លួនលះបង់លុយកាក់ ទ្រព្យធន់ជូនដល់លោកក៏សុខចិត្តដែរ។

យ៉ាងណារាជិនីសំឡេងផ្អែមស្រទន់រូបនេះ ក៏បញ្ជាក់កុំឱ្យមហាជនយល់ច្រឡំដែរថា ខ្លួនធ្លាប់កើតមានជំងឺផ្លូវចិត្តធ្ងន់ធ្ងរអំឡុងផ្ទុះកូវីដ ហើយបើមិនបានជួបលោកតាសក់សភ្នំត្បែងទេ ម៉្លេះក៏គ្មានជីវិតមកដល់បច្ចុប្បន្នដែរ។ មិនតែប៉ុណ្ណោះ អ្នកនាង មាស សុខសោភា ថែមទាំងដាក់ចំៗទៅអតីតស្វាមីឱ្យដោះលែងខ្លួន មិនបាច់រករឿងរុកគួននឹងគ្នាតទៅទៀត ខណៈកន្លងមក ខ្លួនបានលះបង់ច្រើនណាស់សម្រាប់គ្រួសារ ពិសេសស្វាមី។

ដ្បិតតែមានការបកស្រាយជុំវិញរឿងរ៉ាវនេះម្តងហើយម្តងទៀតក៏ដោយ មហាជនមួយចំនួន នៅតែមានមតិលើកឡើង និងមិនយល់ថា ហេតុអ្វីតារាចម្រៀងស្រីល្បីឈ្មោះរូបនេះចេញមុខការពារបុគ្គល វង្ស ចក្រាយយុទ្ធ ដល់ថ្នាក់នេះ៕