សមត្ថកិច្ច​ ចាប់​ខ្លួន​បុរស​ជន​សង្ស័យ​៤ នាក់​ធ្វើ​សកម្មភាព​ឆក់ត្រី​ ទៅ​តុលាការ

បុរសជនសង្ស័យ ៤ នាក់ ត្រូវបានសមត្ថកិច្ចចាប់បញ្ជូនទៅតុលាការ នៅព្រឹកថ្ងៃទី ២៤ ខែមករា ឆ្នាំ ២០២២ ពាក់ព័ន្ធក្នុងករណីឆក់ត្រីខុសច្បាប់។

ជនសង្ស័យទាំងបួននាក់ត្រូវបានសមត្ថកិច្ចឃាត់ខ្លួនកាលពីវេលាម៉ោង ១១ និង៤០យប់ថ្ងៃទី ២៣ ខែមករាឆ្នាំ ២០២២ នៅចំណុចស្រែកំបោរដងទន្លេមេគង្គ ស្ថិតក្នុងភូមិអូររៃ ស្រុកថាឡាបរិវ៉ាត់ ខេត្តស្ទឹងត្រែង។

លោក ដេត ចំណាន នាយរងផ្នែកជលផលថាឡាបរិវ៉ាត់បានឱ្យបានថា បុរសជនសង្ស័យដែលសមត្ថកិច្ចឃាត់ខ្លួនមានទី១ឈ្មោះ អ៊ុំ ថូ អាយុ ៣០ ឆ្នាំ មានទីលំនៅខេត្តស្ទឹងត្រែង ទី២ ឈ្មោះ អ៉ើន ជោគជ័យ អាយុ ២៤ ឆ្នាំ មានទីលំនៅខេត្តព្រៃវែង។ទី៣ឈ្មោះ អេង គឹមអាន អាយុ ២០ ឆ្នាំ រស់នៅខេត្តស្ទឹងត្រែង និងទី៤ ឈ្មោះ ហុង ឡេង អាយុ ៤៣ ឆ្នាំ មានទីលំនៅ ខេត្តស្ទឹងត្រែង។

លោកនាយរងផ្នែកបានបន្តឲ្យដឹងទៀតថា ក្នុងសកម្មភាពចុះបង្ក្រាបបទល្មើសនេសាទខុសច្បាប់សមត្ថកិច្ចបានសហការជាមួយមន្ត្រីពាក់ព័ន្ធ ចុះបង្ក្រាបឃាត់ខ្លួន ពេលដែលជនសង្ស័យទាំង ៤នាក់ធ្វើសកម្មភាពឆក់ត្រីនៅក្នុងដងទន្លេមេគង្គខុសច្បាប់។

លោកបន្តថា ក្រោយការឃាត់ខ្លួនយើងបានដកហូត វត្ថុតាងបទល្មើសនេសាទមាន ម៉ូតូចំនួន២គ្រឿង ក្បាលឆក់ក្តៅ១២​គ្រាប់ ចំនួន០២គ្រឿង អាគុយម៉ាក ស៊ីប៉េ ៥០អំពែរ ០១គ្រឿង អាគុយម៉ាក ប៉ាណាសូកា ៤០អំពែរ ០១គ្រឿង ត្រីចំរុះ០៥គីឡូក្រាម ដងសម្រាប់ឆក់ត្រីចំនួន០១គូ ខ្សែភ្លើង ២០មែត្រ។

នៅវាលាម៉ោង ១០ ព្រឹកថ្ងៃទី ២៤ មករា នេះ ជនសង្ស័យទាំង ៤នាក់ រួមនឹងវត្ថុតាងខាងលើ ត្រូវបានកម្លាំងជំនាញជលផលនិបញ្ជូនទៅកាន់តុលាការហើយដើម្បីចាត់ការបន្តទៅតាមនិតិវិធី៕

អត្ថបទ៖ ងិនលីម