មុនពេលល្បី តារាកូរ៉េ ៤រូប ធ្លាប់ត្រូវហ្វេនរិះគន់មិនសំចៃមាត់ សឹងដើរចេញពីក្រុម

សមាជិកនៃក្រុមចម្រៀង​ជា​ច្រើនរូប មិនមែនសុទ្ធតែទទួលបានការគាំទ្រ​នៅពេលបង្ហាញខ្លួនជាលើកដំបូងនោះទេ ខណៈ​អ្នក​និយម​លេង​អ៊ីនធឺណិតមួយចំនួនធំ​តែងតែប្រៀបធៀបសមាជិកម្នាក់ជាមួយសមាជិកម្នាក់ រួចចាប់ផ្ដើមរិះគន់ថា អ្នកនេះសម ឬអ្នកនោះមិនសមនឹងក្រុមជាដើម។

ជាក់ស្ដែង តារាកូរ៉េ ៤ដួងរបស់​ K-pop ក៏ត្រូវបានហ្វេនរិះគន់មិនសំចៃមាត់អំពីរូបសម្រស់មិនស៊ីគ្នា ទេពកោសល្យមិនស្មើគ្នា និងច្រៀងមិនសូវបានល្អដូចសមាជិកផ្សេង។ល។  ប៉ុន្តែយូរទៅ ដោយការខិតខំប្រឹងប្រែង  ពួកគេបានបង្ហាញយ៉ាងច្បាស់ថា ពួកគេមានទេពកោសល្យគ្រប់គ្រាន់ និងជាសមាជិកដែលសក្តិសមជាមួយក្រុមរបស់ខ្លួនជាទីបំផុត។

Jungyeon សមាជិក TWICE

បើ​ប្រៀបធៀប​នឹង​សមាជិក​ឯទៀតៗ Jungyeon ត្រូវគេប្រដូចទៅនឹង Tomboy របស់​ក្រុម និង​ត្រូវ​បាន​គេ​ចាត់​ទុក​សមាជិកម្នាក់ដែល​មិន​ស័ក្តិសម​សម្រាប់ TWICE នោះទេ។ ចំណែកការដែលផលិតកម្ម JYP មិនសូវឱ្យនាងបង្ហាញខ្លួន ឬមានចម្រៀងចេញច្រើន ក៏ធ្វើឱ្យតារាស្រីរូបនេះ កាន់តែគ្មានប្រជាប្រិយភាព។ ក្រោយមក Jungyeon ត្រូវ​បាន​គេ​មើលឃើញថា​ជា​សមាជិក​ម្នាក់​មិន​អាច​ខ្វះ​បាន​របស់ TWICE ព្រោះ​វត្តមានរបស់​នាង​បានធ្វើឱ្យក្រុមមានភាពលេចធ្លោ។ នៅលើឆាក Jungyeon បំពេញតួនាទីរបស់ខ្លួនបានយ៉ាងល្អ ជាពិសេសនាងទទួលបានការសរសើរជាច្រើន ក្រោយលេចមុខនៅក្នុងឧស្សាហកម្មម៉ូដបន្ថែមទៀត។

Jisoo សមាជិក BLACKPINK

នៅ​ពេល​បង្ហាញ​ខ្លួន​ក្នុង​ក្រុម BLACKPINK ដំបូងៗ Jisoo បាន​ធ្វើ​ឱ្យ​អ្នក​លេង​អ៊ីនធឺណិត​មិនពេញចិត្តនោះទេ។ សម្រស់របស់នាង ត្រូវបានហ្វេន ​K-pop រិះគន់ថា សុភាពពេក និងគ្មានមន្តស្នេហ៍ ដូច​សមាជិក​ទាំង​បីនាក់​ទៀត។

ទោះ​បី​ជា​យ៉ាង​ណា កេរ្តិ៍ឈ្មោះ Jisoo នៅ​ពេល​នេះ​បែរជាផ្ទុះល្បីខ្លាំង ជាង​មុន​ទៅ​ទៀត។ នាងមិនត្រឹមតែអាចច្រៀងបានល្អនោះទេ ទាំងការរាំ បង្ហាញម៉ូដ និងសូម្បីតែផ្នែកសម្ដែង ក៏នាងអាចធ្វើបានល្អ រហូតឈ្នះពានតារាសម្ដែងស្រីថ្មីឆ្នើមទៀតផង។

Jisoo បានសាងភាពល្បីល្បាញ ក្រោយបង្ហាញខ្លួនក្នុងកម្មវិធី Paris Fashion Week 2021 ដោយមានអ្នកគាំទ្ររាប់លាននាក់រង់ចាំទស្សនា ហើយរូបភាពជាច្រើនសន្លឹករបស់តារាស្រីរូបនេះក៏បានធ្វើឱ្យផ្ទុះលើអ៊ីនធឺរណិតខ្លាំងផងដែរ។

Sehun សមាជិក EXO

​បច្ចុប្បន្ន Sehun ជាប់ឈ្មោះជាបុរស​សង្ហារបស់ផលិតកម្ម SM ក៏ជាត្បូងដ៏មានតម្លៃ​របស់ EXO ដែរ។ ទោះជាយ៉ាងណា នៅពេលបង្ហាញខ្លួនជាលើកដំបូង Sehun ទទួលមតិចម្រុះ ដោយអ្នកខ្លះនិយាយថា តារាប្រុសរូបនេះគួរតែដកខ្លួនចេញពីក្រុម EXO ព្រោះលោកគ្មានសមត្ថភាព​គ្រប់គ្រាន់ឡើយ។

យ៉ាងណាមិញ Sehun នៅតែក្រាញននៀលស្ដាប់ពាក្យរិះគន់ដដែលៗ រហូតសព្វថ្ងៃលោកអាចយកឈ្នះលើការរិះគន់ទាំងនោះ ហើយបានបន្ថែមអាជីពដោយចូលរួមសម្តែង និងបង្ហាញខ្លួនលើក្របទស្សនាវដ្ដីទៀតផង។

Yeri សមាជិក RED VELVET

ដោយ​សារ​តែ Yeri គឺ​ជា​សមាជិកដែល​ត្រូវ​បាន​បន្ថែម​ក្រោយគេ បន្ទាប់ពីសមាជិក​ក្រុម​ដំបូង​មាន​គ្នាតែ ៤នាក់ ​ដូច្នេះទស្សនិកជនគិតថា បើគ្មាន Yeri ក្រុម RED VELVET ពិតជាក្រុមដ៏ល្អឥតខ្ចោះ ព្រោះគ្មាននាង ក៏គ្មានបញ្ហា។

មិនថាទទួលពាក្យរិះគន់ច្រើនយ៉ាងណា Yeri នៅតែប្រឹងប្រែងផ្ដោតលើការងាររបស់នាងឱ្យល្អបំផុត ហើយពេលនេះនាងពិតជាអាចធ្វើវាបានមែន។

បច្ចុប្បន្ន ក្រៅ​ពី​​ច្រៀង សម្រស់​របស់ ​Yeri បានជាប់​ចំណាត់​ថ្នាក់កំពូល ​ហើយនាងក៏​បាន​ចូល​រួម​ថត​រឿង និង​ទទួល​បាន​មតិ​វិជ្ជមានមកវិញ​រាប់​មិន​អស់ ចំណែក​ពាក្យ​ចចាមអារ៉ាម​មិនល្អពីមុន ​ចាប់ផ្ដើមរលុបសឹងគ្មានសល់៕

ប្រែសម្រួល៖ សន្យា

ចុចអាន៖ អាវក្រៅ Jennie ពាក់ក្នុងវីដេអូរបស់ Grimes មានប្រភពមកពីសារមន្ទីរមួយ

ចុចអាន៖ បង្ហើបមូលហេតុដែលអតីតបវរកញ្ញាអាមេរិក លោតសម្លាប់ខ្លួន កាលពីព្រឹកមិញ