បង្ហើបមូលហេតុដែលអតីតបវរកញ្ញាអាមេរិក លោតសម្លាប់ខ្លួន កាលពីព្រឹកមិញ

មរណភាពរបស់អតីតបវរកញ្ញាចក្រវាលសហរដ្ឋអាមេរិក ប្រចាំឆ្នាំ២០១៩ ​កញ្ញា Cheslie Kryst បានបង្កការភ្ញាក់ផ្អើលសឹងពេញពិភពលោក ​ជាពិសេសក្នុងវិស័យប្រកួតសម្រស់តែម្ដង។

សារព័ត៌មាន TMZ បញ្ជាក់​ថា អតីតបវរកញ្ញា​អាមេរិក Cheslie Kryst និងជាបេក្ខភាព Top 10 នៃកម្មវិធីប្រកួតបវរកញ្ញាចក្រវាល​ កាលពី​ឆ្នាំ ២០១៩ បាន​ទទួល​មរណភាព​ហើយ នៅ​ព្រឹក​ថ្ងៃ​ចន្ទ ទី៣១ ខែមករា ឆ្នាំ២០២២ ដោយការលោតសម្លាប់ខ្លួនពីលើអគា កម្ពស់ ២៩ជាន់ នៅឯទីក្រុងញូយ៉ក។  

អតីតរាជិនិសម្រស់តំណាងអាមេរិក ឆ្នាំ២០១៩ រូបនេះ ត្រូវបានគេដឹងថាមានអាជីពជាច្រើនក្នុងពេលតែមួយ ដែលនាងជាមេធាវី អ្នកសរសេរប្លុក អ្នកបង្ហាញម៉ូដ និងអ្នកឆ្លើយឆ្លងព័ត៌មានទូរទស្សន៍ Extra TV ផងដែរ។ ដូច្នេះហើយ ទើបបានជាការស្លាប់របស់តារាស្រីរូបនេះ នាំឱ្យមហាជនតក់ស្លុត ​និងសោកស្ដាយខ្លាំងបំផុត។

ជុំវិញមូលហេតុនៃមរណភាពរបស់ Cheslie Kryst ក្រុមគ្រួសាររបស់នាងមិនបានបញ្ជាក់តម្រុយអ្វីនោះទេ ខណៈក្រុមប៉ូលិសបានសន្និដ្ឋានថា នាងបានធ្វើអត្តឃាត។ ទោះយ៉ាងណា ខាងកោសល្យវិច័យនៅមិនទាន់អាចកំណត់ពីមូលហេតុស្លាប់ពិតប្រាកដនៅឡើយទេ។

យ៉ាងណាមិញ ប្រភពពី Hindustan Times បានបង្ហើបថា មុនពេល Cheslie Kryst ស្លាប់ គេបានឃើញសារចម្លែកមួយដែលនាងបានបង្ហោះនៅលើគណនី Instagram កាលពីថ្ងៃអាទិត្យ ទី៣០ ខែមករា ដោយនាងសរសេរថា “May this day bring you rest and peace.” ​(សូម​ឱ្យ​ថ្ងៃ​នេះ​នាំ​​អ្នក​ឱ្យបាន​សម្រាកដោយសុខសាន្ត)។​ តាមរយៈសារដ៏ខ្លីមួយនេះ អ្នកគាំទ្ររបស់នាងជាច្រើនយល់ឃើញថា ទំនងមកពីអាជីពរបស់នាងនាពេលបច្ចុប្បន្នមានភាពតានតឹងខ្លាំងពេក ដែលវានាំឱ្យ Cheslie Kryst រងជំងឺធ្លាក់ទឹកចិត្តធ្ងន់ធ្ងរ ​និងមានរយៈពេលយូរ រហូតបណ្ដាលឱ្យនាងហ៊ានសម្រេចចិត្តបញ្ចប់ជីវិតខ្លួនឯង។

ទោះយ៉ាងណា នេះគ្រាន់តែជាការសន្និដ្ឋានប៉ុនណោះ ​ចំពោះមូលហេតុពិតប្រាកដ យើងនឹងរង់ចាំមើលទាំងអស់គ្នា៕

ប្រែសម្រួល៖ សន្យា

ចុចអាន៖ អតីតបវរកញ្ញាចក្រវាលអាមេរិក លោតសម្លាប់ខ្លួនពីលើ ខុនដូ