ជួយទិញគាត់ផង! តា ចេក ផ្លាស់ប្តូរកន្លែងលក់និងមុខរបរថ្មី

តារាកំប្លែងជើងចាស់លោកតា ចេក បច្ចុប្បន្នត្រូវបានទស្សនិកជនដឹងហើយថានាយជាតារាកំប្លែងជើងចាស់មួយរូបដែលមានប្រវត្តិតស៊ូ និងជួបការលំបាកជាច្រើនសម្រាប់ជីវភាពគ្រួសារប្រចាំថ្ងៃ ពោលគឺខុសប្លែកពីតារារួមជំនាន់ដទៃទៀតដែលមានជីវភាពធូធា។

ដោយសារតែបញ្ហានៃជីវភាពគ្រួសារនេះហើយទើបរុញច្រានឲ្យតារាកំប្លែងវ័យចំណាស់រូបនេះខំប្រឹងពុសពាររាល់ឧប្បស័គ្គដើម្បីរកប្រាក់ចំណូលបន្ថែមជួយផ្គត់ផ្គង់ដល់ជីវភាពគ្រួសារ។ តួយ៉ាងកន្លងមកមហាជននិងអ្នកគាំទ្រធ្លាប់បានដឹងហើយថាតារាកំប្លែងលោកតា ចេក ក្រៅតែអាជីពសិល្ប:គឺគាត់ចាប់មុខរបរលក់បន្លែរ ផ្លែឈើ និងភេសជ្ជ:នៅម្តុំផ្លូវទៅគីរីរម្យជាដើម។ ប៉ុន្តែយ៉ាងណាមិញបន្ទាប់ពីមុខរបរនេះបានដំណើរការបានរយ:ពេលដោយគ្មានភាពរីកចម្រើននោះឥឡូវនេះលោកតា ចេក ក៏បានសម្រេចផ្លាស់ប្តូរទីតាំងនិងជ្រើសយកមុខរបរថ្មីវិញ។

បើតាមការបញ្ជាក់ពីតារាកំប្លែងលោកតា ចេក បាននិយាយថា ពេលនេះគាត់បានប្តូរទីតាំងមកលក់នៅម្តុំរង្វង់មូលគួរស្រូវផ្លូវទៅតាខ្មៅវិញហើយ។

លោកតា ចេក បានប្រាប់កម្ពុជាថ្មីឲ្យដឹងថា «ខ្ញុំបានប្ដូរមុខរបលក់បន្លែផ្លែឈើនៅគីរីរម្យហើយឥឡូវមកលក់ទុរេន ខ្នុរ និង លក់បាយនៅខាងកើតជាប់រង្វង់មូលគួរស្រូវ ផ្លូវទៅតាខ្មៅខាងស្ដាំដៃហើយបើមកពីតាខ្មៅនៅខាងឆ្វេងដៃបើបងប្អូនកូនក្មួយឆ្លងកាត់កុំភ្លេចចូលជួយទិញទុរេន ខ្នុរ និងចូលហូបបាយក៏បានដែរ»។

បន្ថែមពីនេះតារាកំប្លែងលោកតា ចេក ក៏បានលើកឡើងថា គាត់ពិតជាសូមជូនពរដល់អ្នកមានគុណ និងសប្បុរជនព្រមទាំងបងប្អូនកូនក្មួយដែលតែងតែជួយជ្រោមជ្រែងនិងឧបត្ថម្ភដល់គាត់នាពេលកន្លងមកគ្រាដែលខ្លួនជួបបញ្ហាឬការលំបាកនានាផងដែរ៕

អត្ថបទ៖ ចាន់រ៉ា