ចិញ្ចឹម​ពស់​ចាន់ល្មម​លក់​ ជាមុខរបរថ្មី​ កសិករ​ថា​មាន​ទីផ្សារល្អ​អាច​រកចំណូល​បាន​ច្រើន

កសិករដែលប្រកបរបរចិញ្ចឹមពស់ លោក ម៉េង សារ៉ាត់ បានឲ្យដឹងថា មុខរបរដែលមិនសូវ​មានអ្នក​ចាប់អារម្មណ៍មួយនេះ អាចឲ្យលោកមានពេលវេលាធ្វើការងារដើម្បីរកចំណូលបន្ថែម និងមិនពិបាក​ស្វែងរកទីផ្សារនៅពេលដល់កំណត់លក់។

មិនពិបាករកទីផ្សារគឺដោយសារតែមានតម្រូវការច្រើនពីសំណាក់ឈ្មួញ ខណៈការចិញ្ចឹមសត្វពស់​សម្រាប់លក់នៅក្នុងប្រទេសកម្ពុជាមានតិចតួចបំផុត។

ប្រាប់កម្ពុជាថ្មីនៅថ្ងៃទី១២ ខែឧសភានេះ អ្នកចិញ្ចឹមពស់សម្រាប់លក់ លោក ម៉េង សារ៉ាត់បានឲ្យ​ដឹង​ទៀតថា លោកបានចាប់មុខរបរដែលមិនសូវ​មានអ្នកចាប់អារម្មណ៍​នេះប្រមាណជាពីរឆ្នាំមកហើយ។

លោកថា ចំពោះជំនាញក្នុងការចិញ្ចឹមពស់នេះដែរ គឺលោករៀនពីកសិករវៀតណាម និងពិសោធន៍​ជាក់ស្ដែងផ្ទាល់ខ្លួន ហើយភាគច្រើនសត្វពស់ដែលលោកចិញ្ចឹមគឺ ពស់ចាន់ល្មម ដែលជា​ប្រភេទ​ពស់​កម្រ និងមានតម្រូវការខ្ពស់។

​កសិករឃុំក្អមសំណ ​ក្នុងស្រុកលើកដែក​ជាប់ព្រំដែនវៀតណាម​រូបនេះបានបន្ថែមថា​ ចំពោះពេល​វេលានៃការចិញ្ចឹមគឺមានរយៈពេលយូរគួសម ដែលទាមទារឲ្យមានការអត់ធ្មត់ខ្ពស់ ពោលគឺគិត​តាំង​ពី​ការចាប់ផ្ដើមរហូតដល់ពេលលក់ ត្រូវប្រើពេលប្រហែលមួយឆ្នាំជាងឯណោះ។

លោក សារ៉ាត់បញ្ជាក់យ៉ាងនេះថា ៖«សម្រាប់អាយុកាលដែលយើងចិញ្ចឹមគឺប្រពេលយូរដែរបង ទាល់តែ​យើងព្យាយាមអត់ធ្មត់ដែរ និយាយរួមទៅដ៏យើងតស៊ូដែរក្នុងការចិញ្ចឹមហ្នឹង គឺចំណាយ​ពេលមួយឆ្នាំតិចតួច»។

លោកថា ទីផ្សារដែលទទួលទិញមានហាងមួយចំនួន និងភោជនីយដ្ឋានជាដើម ហើយប្រែប្រួល​ទៅ​តាមការចង់បាន និងតម្រូវការជាក់ស្ដែងក្នុងតម្លៃ គឺប្រាំបីម៉ឺនរៀលក្នុងមួយគីឡូ ទៅតាមសភាព​ជាក់​ស្ដែង​នៃទំហំឬទម្ងន់របស់ពស់មួយក្បាលៗ។

​លោក ម៉េង សារ៉ាត់​បានគូសបញ្ជាក់ថា​ ចំពោះមុខរបរការចិញ្ចឹមពស់នេះ​ គឺលោកបានធ្វើ​ការចង​ក្រង​គ្នាជាក្រុម ដើម្បីផ្លាស់ប្ដូរបទពិសោធន៍ និងរក្សាតម្លៃឲ្យបានល្អ។ លោកបន្តថា ត្បិតតែក្រុម​របស់​លោកប្រកបរបរនេះបែបលក្ខណៈគ្រួសារ ក៏ប៉ុន្តែកសិកររូបនេះរំពឹងថា តាមរយៈនៃការ​ខិតខំប្រឹង​កន្លង​មក របរចិញ្ចឹមពស់ច័ន្ទល្មមនេះនឹងរីកធំធាត់ ហើយក្លាយជាមុខរបរមួយ​ដែលមានការ​ពេញ​និយម ដូចនៅប្រទេសជិតខាងដែរ។

បើតាមលោក ម៉េង សារ៉ាត់ របរចិញ្ចឹមពស់នៅកម្ពុជាមិនសូវមានអ្នកចិញ្ចឹមនោះទេ គឺមានតែលោក និងកសិករខ្លះនៅក្នុខេត្តកំពង់ឆ្នាំងតែប៉ុណ្ណោះ ដែលប្រការនេះហើយទើបជំរុញ​ឲ្យលោកចាប់​អារម្មណ៍​និងសម្រេចចិត្តប្រកបរបរចិញ្ចឹមពស់នេះតែម្ដង។

សូមបញ្ជាក់ថា ពស់ចាន់ល្មមគឺជាប្រភេទពស់កម្រ ហើយពស់ប្រភេទ​នេះត្រូវបានគេនិយម​បរិភោគ​ជាខ្លាំង និងមានតម្លៃថ្លៃនៅតាមហាងអាហារ និងភោជនីយដ្ឋាន។ ដោយឡែកនៅកម្ពុជា ការប្រកបរ​បរ​នេះនៅមិនទាន់ជ្រួតជ្រាបចំពោះកសិករនៅឡើយទេ ដែលបញ្ហានេះទាមទារឲ្យមាន​ការសិក្សា​ស៊ី​ជម្រៅ ផ្ដល់ប្រឹក្សាបច្ចេកទេស និងការលើកទឹកចិត្តពីស្ថាប័នពាក់ព័ន្ធ ដើម្បីលើកកម្ពស់កម្រិត​ជីវភាព​ដល់កសិករដែលចង់ប្រកបរបរនេះ៕

អត្ថបទ៖ លន់ សេនី