បណ្ឌិតសេដ្ឋកិច្ច ៖ កត្តាបីជំរុញកំណើនសេដ្ឋកិច្ច​កម្ពុជា កើនឡើងក្រោយកូវីដ-១៩

កម្ពុជា បានគ្រប់គ្រងការឆ្លងរីករាលដាលជំងឺកូវីដ-១៩ បាន ១០០% ខណៈដែលការចាក់វ៉ាក់សាំងកូវីដ លើពលរដ្ឋបានប្រមាណជាង ៩០ភាគរយ នៅទូទាំងប្រទេស។ តាមរយៈការគ្រប់ជំងឺបានជោគជ័យនេះហើយ ដែលនាំឱ្យសេដ្ឋកិច្ចជាតិ ចាប់ផ្តើមមានសន្ទុះកើនឡើងវិញ ជាបន្តបន្ទាប់។

លោកបណ្ឌិត គី សេរីវឌ្ឍន៍ អ្នកវិភាគ​សេដ្ឋកិច្ច​ នៅរាជ​បណ្ឌិតសភាកម្ពុជា បានឱ្យដឹងថា វិស័យដែលដើរមុនគេក្រោយវិបត្តិកូវីដនេះ គឺវិស័យសេវាកម្មលក់រាយ។ លោកបន្តថា « ​ប្រជាពលរដ្ឋដែលមានជីវភាពទាប គឺគាត់ជាអ្នកលក់រាយ បានមានដំណើរការមកវិញ នេះគេហៅថា ការកសាងសេដ្ឋកិច្ចពីថ្នាក់ក្រោម មានន័យថា ប្រជាជនដែលមានចំណូលទាប ចាប់ផ្តើមរុនសន្ទុះសេដ្ឋកិច្ចមកវិញ»។

អ្នកជំនាញសេដ្ឋកិច្ចជាន់ខ្ពស់រូបនេះ បន្ថែមថា ចំណុចដែលជំរុញសេដ្ឋកិច្ចមួយទៀត គឺការចាយវាយរបស់ប្រជាពលរដ្ឋ។​ លោកបណ្ឌិតពន្យល់ថា ដោយសារភាពសុទិដ្ឋិនិយមក្នុងបរិបទដែលស្បើយកូវីដនេះ ធ្វើឱ្យមនុស្សចាយវាយនូវថវិកាជាច្រើន ជាពិសេស ទៅលើសេវាកម្មនៅក្នុងស្រុក តាមរយៈការដើរកម្សាន្ត។

ជាមួយគ្នានេះ ការបើកឱ្យភ្ញៀវទេសចរបរទេសចូលមក គឺជាឱកាសថ្មីនៃការបង្ហូរចូលមូលធនពីខាងក្រៅប្រទេស។ លោកបណ្ឌិត គី សេរីវឌ្ឍន៍ គូសបញ្ជាក់ថា«ភ្ញៀវបរទេសគាត់មក គឺគាត់កាន់លុយពីស្រុកគាត់ មកចាយនៅស្រុកយើង អ៊ីចឹងបើកឱ្យមានលំហូរទេសចរចូលមកកាន់តែច្រើន ក៏ជាចលករមួយជំរុញកំណើនសេដ្ឋកិច្ចដែរ»។

ប៉ុន្តែលោកបណ្ឌិត គី សេរីវឌ្ឍន៍ ប្រាប់ឱ្យកម្ពុជា ត្រូវប្រយ័ត្នរឿងមួយគឺ ផលិតកម្មនៅក្នុងស្រុក ដើម្បីបំពេញតម្រូវការទេសចរ ដែលអាចនឹងធ្វើឱ្យមានអតិផរណានៅពេលខាងមុខ។ «ដូច្នេះយើងត្រូវតៀមខ្លួនជំរុញផលិតកម្មក្នុងស្រុកឱ្យច្រើន ដើម្បីឆ្លើយតបការលូតលាស់នៃសេដ្ឋកិច្ច។ បើមិនដូច្នោះទេ យើងនឹងទៅទិញពីបរទេសបន្ថែម។ ការទិញពីបរទេស​កាន់តែច្រើន គឺជាការបំប៉នសេដ្ឋកិច្ចបរទេស ជាជាងនៅក្នុងស្រុក»៕

​