សម្ដេចតេជោ ហ៊ុន សែន ជឿជាក់ថា ឥណ្ឌា អាចដើរតួនាទីសមស្របការចរចារវាងភាគី អ៊ុយក្រែន និងរុស្ស៊ី

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា មានការជឿជាក់ថា ឥណ្ឌា អាចដើរតួនាទីសមស្របក្នុងការចរចារវាងភាគីទាំងពីរ អ៊ុយក្រែន និងរុស្ស៊ី។

ក្នុងជំនួបតាមរយៈប្រព័ន្ធវីដេអូ កាលពីថ្ងៃទី១៨ ខែឧសភា ជាមួយលោក ណារិនដ្រា ម៉ូឌី (Narendra Modi) នាយករដ្ឋមន្រ្តីឥណ្ឌា សម្ដេចបានគូសបញ្ជាក់ថា សម្ដេចចង់ឃើញដំណោះស្រាយរវាងរុស្ស៊ី-អ៊ុយក្រែន ឲ្យបានឆាប់ ដោយសារ​វាមានផលប៉ះពាល់ដល់សកលលោកជាពិសេសលើវិស័យសន្តិសុខស្បៀង និងថាមពល ដែលប៉ះពាល់ដល់ប្រទេសទាំងអស់។

លោកនាយករដ្ឋមន្រ្តីឥណ្ឌា បានគូសបញ្ជាក់ពីការព្យាយាមចូលរួមចំណែកក្នុងការសន្ទនារកដំណោះស្រាយរវាងអ៊ុយក្រែន និងរុស្ស៊ី ។ លោកបានលើកឡើងពីការជួបសន្ទនាជាមួយប្រធានាធិបតីទាំងពីរ រុស្ស៊ី និងអ៊ុយក្រែន កន្លងមកនេះ ដើម្បីធ្វើយ៉ាងម៉េច ឲ្យស្ដារស្ថានភាពនេះមករកសន្តិភាពវិញ។

សង្គ្រាមរុស្ស៊ី និងអ៊ុយក្រែន កំពុងបង្កផលប៉ះពាល់យ៉ាងខ្លាំងដល់សេដ្ឋកិច្ចពិភពលោក ហើយមានការលើកឡើងថា សង្គ្រាមនេះ នឹងកាន់តែរីកធំឡើងដរាបណាគ្មានការចរចា។

ជាចុងក្រោយ សម្ដេចតេជោបានគូសបញ្ជាក់ដែរថា សម្ដេចទន្ទឹងរង់ចាំក្នុងការទទួលការធ្វើទស្សនកិច្ចរបស់លោកនាយករដ្ឋមន្ត្រីឥណ្ឌា ក្នុងការចូលរួមកិច្ចប្រជុំកំពូល នៅក្នុងខែវិច្ឆិកា ឆ្នាំ២០២២ខាងមុខនេះ៕