ជយលាភីគម្រោង​អភិវឌ្ឍមូលដ្ឋាន​ល្អជាង​គេ ​ខេត្ត​សៀមរាប​បានទៅ​លើ​ស្រុកបន្ទាយស្រី

រាជធានីខេត្តចំនួន ៣ រួមមាន រាជធានីភ្នំពេញ ខេត្តសៀមរាប និង ខេត្តពោធិ៍សាត់ បានទទួលនូវជយលាភី ក្នុងការអនុវត្តគម្រោងអភិវឌ្ឍមូលដ្ឋានមានការរីកចម្រើន និងបម្រើសេវាជូនប្រជាពលរដ្ឋបានល្អជាងគេក្នុងចំណោមរាជធានីខេត្តទាំង២៥។

ថ្លែងប្រាប់ក្រុមអ្នកសារព័ត៌មាន ក្រោយបញ្ចប់កិច្ចប្រជុំទស្សនកិច្ចផ្លាស់ប្ដូរបទពិសោធន៍ រវាងក្រុមប្រឹក្សារដ្ឋបាលថ្នាក់ក្រោមជាតិ នៅមជ្ឈមណ្ឌលសហប្រតិបត្តិការមិត្តភាព កម្ពិជា-កូរ៉េ CKCC នៅព្រឹកថ្ងៃទី ២២ មិថុនា ឆ្នាំ២០២២ លោក ប៉ុក សុគន្ធណារ៉ា អគ្គលេខាធិការសមាគមក្រុមប្រឹក្សាថ្នាក់ក្រោមជាតិមានប្រសាសន៍ថា សម្រាប់ជយលាភីលេខ១ បានទៅលើក្រុងពោធិ៍សាត់ អនុវត្តគម្រោងទំនប់បង្ហៀរទឹកក្បាលហុងស្ទឹងពោធិ៍សាត់ ចំណាត់ថ្នាក់លេខ ២ បានទៅលើស្រុកបន្ទាយស្រី ខេត្តសៀមរាប អនុវត្តគម្រោងផ្ទះមួយអំពូលភ្លើងមួយ និងចំណាត់ថ្នាក់លេខ ៣ បានទៅលើសង្កាត់ទឹកល្អក់​ទី​១ ស្ថិតក្នុងខណ្ឌទួលគោក រាជធានីភ្នំពេញ អនុវត្តគម្រោងហេដ្ឋារចនាសម្ព័ន្ធផ្លូវបេតុងសហគមន៍ភូមិ១៥-១៦។

ចំពោះកម្មវិធីពានរង្វាន់នេះ ត្រូវបានផ្សព្វផ្សាយយ៉ាងទូលំទូលាយដើម្បីឲ្យគ្រប់បណ្ដារាជធានីខេត្ត បានចូលរួមដាក់គម្រោង​របស់ខ្លួន ដែលគិតថាអនុវត្តបានល្អលើការបម្រើសេវាជូនពលរដ្ឋ ឬអភិវឌ្ឍមូលដ្ឋាន ធ្វើការប្រឡងប្រណាំង ហើយត្រូវបានជ្រើសយកគម្រោងដែលអនុវត្តបានល្អ មកធ្វើបទបង្ហាញនៅរាជធានីភ្នំពេញ ហើយក៏បានរកឃើញនូវជ័យលាភីទាំង៣នេះ ។

ចំពោះគណៈកម្មការដែលវាយតម្លៃ ទៅលើជយលាភីនេះ មានខាងក្រសួងមហាផ្ទៃ  ក្រសួងរៀបចំដែននគរូបនីយកម្ម និងសំណង់សាលារាជធានីភ្នំពេញ ដៃគូអភិវឌ្ឍនៅទីក្រុងប៉ារីសប្រទេសបារាំង សមាគមអន្តរជាតិអភិបាលក្រុងប្រើប្រាស់ភាសាបារាំង និងភាគីមួយចំនួនទៀត ។

លោកម៉ម សារិន ប្រធានសមាគមជាតិក្រុមប្រឹក្សារាជធានីខេត្ត និងជាប្រធានក្រុមប្រឹក្សារាជធានីភ្នំពេញបានលើកឡើង​ថា សមាគមមានរៀបចំការធ្វើដំណើរទស្សនកិច្ចសិក្សាផ្លាស់ប្តូរបទពិសោធន៍ រវាងខេត្តជាប់ជយលាភីទៅដល់បណ្ដាខេត្តផ្សេងៗ ដើម្បីដកស្រង់យកបទពិសោធន៍​មកអនុវត្តទាក់ទងនឹងការអភិវឌ្ឍតំបន់ប្រជុំជន ជាពិសេសពាក់ព័ន្ធការផ្ដល់សេវា​ជូនប្រជាពលរដ្ឋនៅក្នុងមូលដ្ឋាន។

ជាមួយគ្នានេះលោករំពឹងថា គណៈប្រតិភូគ្រប់ខេត្តនឹងដកស្រង់យកបទពិសោធន៍ពីរាជធានីខេត្តជ័យលាភី អនុវត្តន៍តាមបណ្ដាខេត្តរៀងខ្លួនឲ្យកាន់តែល្អប្រសើរបន្ថែមទៀត៕

អត្ថបទ៖ សំអឿន