សម្ដេចតេជោ ហ៊ុន សែន ៖ កម្ពុជាគ្មានការចាំបាច់ត្រូវបិទប្រទេសទេ ទោះបីកូវីដ-១៩ត្រូវបានរកឃើញប៉ុន្មានថ្ងៃនេះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា ទោះបីជាជំងឺកូវីដ-១៩ នៅកម្ពុជា ត្រូវបានរកឃើញវិញនាប៉ុន្មានថ្ងៃនេះក៏ដោយ ក៏រាជរដ្ឋាភិបាល គ្មានការចាំបាច់ត្រូវបិទប្រទេសទៀតនោះដែរ ដោយសារតែប្រជាពលរដ្ឋកម្ពុជា ទទួលបានការចាក់វ៉ាក់សាំងបង្ការជំងឺកូវីដ-១៩ ច្រើនណាស់ហើយ។

នៅក្នុងពិធីសំណេះសំណាល និងផ្តល់នូវដំបូន្មានមួយចំនួនជូនដល់គណៈប្រតិភូកីឡា អាស៊ានប៉ារ៉ាហ្គេម (ASEAN Para Games) នាព្រឹកថ្ងៃទី ៦ ខែកក្កដានេះ សម្ដេចតេជោ ហ៊ុន សែន នាយករដ្ឋមន្ត្រី បានថ្លែងថា ប្រជាពលរដ្ឋត្រូវថែរក្សាសុខភាព ហើយក៏ត្រូវយល់ដឹងពេលនេះ ជាងពេលណាៗទាំងអស់ ប្រយ័ត្នតែមានការផ្ទុះឡើងវិញនូវជំងឺកូវីដ-១៩ គឺនឹងជួបបញ្ហាធំ។

សម្ដេចតេជោនាយករដ្ឋមន្ត្រី បានបន្ថែមថា «ប៉ុន្តែយ៉ាងណាក៏ដោយ នៅថ្ងៃដែលខ្ញុំបានប្រកាសអំពីបញ្ហានេះ នៅក្នុងខំមិនបាននិយាយ អំពីបញ្ហាសុំកុំបិទរោងចក្រ ខ្ញុំអត់មានការងារធ្វើ ហើយខ្លះថា កុំបិទសាលាកូនខ្ញុំអត់បានរៀន ខ្លះថា បិទសាលាខ្លាចកូនឆ្លង ប៉ុន្តែខ្ញុំសូមយកឱកាសនេះ ជម្រាបជូនថា គ្មានការចាំបាច់ណាមួយ ដើម្បីធ្វើការបិទប្រទេស បិទខេត្ត បិទរាជធានី បិទសាលា បិទផ្សារ នោះទេ បន្ទាប់ពីយើងបានចាក់វ៉ាក់សាំងពេញលេញ រួចទៅហើយ»៕

អត្ថបទ៖ ឃួន សុភ័ក្រ