ស្រទាប់ទឹកកកលើភ្នំរបស់ប្រទេសមួយនៅ អឺរ៉ុប នឹងរលាយបាត់ទាំងស្រុង

បើយោងតាមសមាគមអ្នកជិះស្គីបានឲ្យដឹងថា ស្រទាប់ទឹកកកដ៏ក្រាស់ដែលគ្របដណ្តប់លើភ្នំប្រទេសស្វីសអស់ជាច្រើនសតវត្ស នឹងរលាយបាត់ទាំងស្រុងក្នុងរយៈពេលពីរបីសប្តាហ៍ខាងមុខ ។

បន្ទាប់ពីរដូវរងាកន្លងទៅ, រលកកម្ដៅនៅរដូវក្តៅដែលកំពុងវាយលុកទ្វីបអឺរ៉ុបបានក្លាយជាមហន្តរាយសម្រាប់ផ្ទាំងទឹកកក Alpine ពោលវានឹងធ្វើឲ្យផ្ទាំងទឹកកកទាំងនោះរលាយក្នុងល្បឿនដ៏លឿនមួយ ។

ទន្ទឹមនោះ ផ្លូវឆ្លងកាត់រវាងផ្ទាំងទឹកកក Scex Rouge និង Tsanfleuron ក៏រលាយផងដែរ ហើយទំនងប្រែទៅជាបឹងមួយក្នុងរយៈពេល ១០ ទៅ ១៥ ឆ្នាំខាងមុខ ហើយវាប្រហែលជាមានជម្រៅ ១០ ម៉ែត្រ ក្នុងបរិមាណ ២៥ ម៉ឺនម៉ែត្រគូប ។

ចំណែកអ្នកជំនាញផ្នែកទឹកកកលោក Mauro Fischer អ្នកស្រាវជ្រាវនៅសាកលវិទ្យាល័យ Bern បាននិយាយថា ការបាត់បង់កម្រាស់នៃផ្ទាំងទឹកកកក្នុងតំបន់នឹងកើនឡើងជាមធ្យម ៣ ដងនៅឆ្នាំនេះ បើធៀបនឹងរដូវក្តៅ ១០ លើកចុងក្រោយ ។

ជាចុងក្រោយអ្នកជំនាញរូបនេះបានបញ្ជាក់ថា ការរលាយនៃផ្ទាំងទឹកកកនឹងធ្វើឲ្យភ្នំនេះកាន់តែមិនស្ថិតស្ថេរ ជាពិសេសវត្ថុដែលកប់ក្នុងទឹកកកអស់ជាច្រើនឆ្នាំ ឬរាប់ទសវត្សរ៍អាចនឹងកកើតឡើងវិញផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ វិបត្តិសេដ្ឋកិច្ចនៅ អឺរ៉ុប អាចជាសញ្ញាវិជ្ជមានសម្រាប់ អាមេរិក