អាជ្ញាធរ​ខណ្ឌ​ដូនពេញ​ សម្រេច​ផ្អាក​ការដ្ឋាន​សំណង់​១​កន្លែង ដោយសារ​ធ្លាក់​ដែក​ទម្លុះ​ឡាន​មុត​របួស​ធ្លាយ​ជើង​បុរស​ម្នាក់

បុរសម្នាក់បានរងរបួសធ្ងន់ ដោយសារតែគ្រោះថ្នាក់ដោយសារទីតាំងការដ្ឋាន១កន្លែងមានការធ្វេសប្រហែសបានធ្លាក់ដែកថ្នាំងអំពៅ១ដើម ទម្លុះកញ្ចក់រថយន្តទំនើបមួយគ្រឿង បណ្តាលឲ្យធ្លុះធ្កាយជើងម្ខាង។

ហេតុការណ៍នេះកើតឡើងកាលពីនៅព្រឹកថ្ងៃទី២៩ ខែធ្នូ ឆ្នាំ២០២០ នៅចំណុចការដ្ឋាន ស្ថិតនៅមុខវត្តបទុមវតី ក្បាលដីលេខ១២៤ ផ្លូវលេខ៧ ភូមិ៣ សង្កាត់ចតុមុខ ខណ្ឌដូនពេញ រាជធានីភ្នំពេញ។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមាន បុរសម្នាក់ធ្វើដំណើរ ដោយរថយន្តម៉ាក់ Ford ពណ៌ប្រផះ ពាក់ស្លាកលេខភ្នំពេញ 2BF-0636 ពេលធ្វើដំណើរមកដល់ចំណុចការដ្ឋានស្រាប់តែមានដែកថ្នាំងអំពៅធ្លាក់មកពីលើការដ្ឋានកំពុងសាងសង់នោះទម្លុះកញ្ចក់រថយន្ត បុកចំជើងរបស់បុរសកំពុងបើករថយន្តនោះតែម្ដងបណ្តាលឲ្យធ្លុះជើងម្តាង។

ប្រភពបន្តថាភ្លាមៗនោះបង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋ និងអាជ្ញាធរមូលដ្ឋានចុះដល់កន្លែងហេតុ បានបញ្ជូនជនរងគ្រោះទៅមន្ទីរពេទ្យ ដើម្បីសង្គ្រោះបន្ទាន់ផងដែរ។

ពាក់ព័ន្ធនឹងបញ្ហានោះដែរ ក្រោយពេលទទួលបានព័ត៌មាននេះភ្លាម លោក សុខ ពេញវុធ អភិបាលខណ្ឌដូនពេញ បានបញ្ជាអោយកម្លាំងជំនាញចុះទៅទីតាំងការដ្ឋានពិនិត្យមើលនិងអោយផ្អាកដំណើរការសាងសង់នោះទាំងស្រុងជាបណ្ដោះអាស្នន។

គួរបញ្ជាក់ផងដែរក្រោយបញ្ជូនជនរងគ្រោះដល់មន្ទីរពេទ្យ ភាគីម្ចាស់ការដ្ឋាននិងភាគីជនរងគ្រោះ ក៏បានសម្របសម្រួលគ្នាជាមួយរងគ្រោះដើម្បីសងជាសំណងផងដែរ៕

រស្មី