ទន្លាយអាថ៌កំបាំង ផលិតកម្ម LD នៅតែដំណើរការល្អ ខណៈផលិតកម្មដទៃមិនសូវមានភាពយន្តបញ្ចាំងរោង

ទន្ទឹមពេលផលិតកម្មដទៃមិនសូវមានភាពយន្តរបស់ខ្លួនបញ្ចាំងនៅតាមរោងភាពយន្ត ប៉ុន្តែ ផលិតកម្ម អិលឌី តែងចេញភាពយន្តថ្មីៗបញ្ចាំងតាមភាពយន្តជាបន្តបន្ទាប់ និងរៀងរាល់ខែ។ តើកត្តាអ្វីខ្លះ ធ្វើឱ្យ ផលិតកម្ម អិលឌី ភីកឈ័រ (LD Picture) អាចដំណើរការបញ្ចេញ និងផលិតភាពយន្តជាបន្តបន្ទាប់រយៈពេលជាង ១៥ឆ្នាំមកនេះ ព្រមទាំងមានគ្រោងផលិតភាពយន្តជាច្រើនសម្រាប់ឆ្នាំក្រោយទៀត?

បន្ទាប់ពីបញ្ចប់ កម្មវិធីសម្ពោធភាពយន្តថ្មី រឿង “ជួបស៊យ វគ្គ៣” ដែលនឹងចាក់បញ្ចាំងតាមរោងភាពយន្តចាប់ពីថ្ងៃទី៣ ខែវិច្ឆិកា នេះទៅ លោក លៀក លីណា អ្នកចាត់ការទូទៅ ផលិតកម្ម អិលឌី បានផ្ដល់កិច្ចសម្ភាសផ្ដាច់មុខឱ្យ “កម្ពុជាថ្មី” ដឹងថា បានជា ផលិតកម្ម អិលឌី នៅឈរជើងបាន ហើយផលិត និងមានភាពយន្តបញ្ចាំងរោងជាបន្តបន្ទាប់ បើទោះបីជួបវិបត្តិកូវីដ-១៩ រោងកុនបានបិទរយៈពេល ២ឆ្នាំកន្លងមកនោះ ដោយសារ ផលិតកម្ម នៅមានដើមទុន សល់ពីការចំណេញពីការផលិតភាពយន្តកន្លង។

លោក លៀក លីណា បញ្ជាក់ថាបន្តថា៖ “ចំណែកការផលិតភាពយន្តបញ្ចាំងលើទីផ្សាររោងភាពយន្ត គឺផលិតកម្ម បានពង្រឹងគុណភាព ទាំងអត្ថបទនិពន្ធ បច្ចេកទេសថត ដំឡើងគុណភាពកាមេរ៉ាថតជាដើម។ ផលិតកម្ម ពង្រឹងលើគុណភាពឧបករណ៍សម្ភារៈថត ហើយអ្វីដែលសំខាន់នោះ គឺអត្ថបទនិពន្ធ ដែលយើងធ្វើឱ្យសាច់រឿងល្អមើលបាន ហើយទស្សនិកជនគាំទ្រកាន់ច្រើន និងផ្សព្វផ្សាយប្រាប់គ្នាបន្ត”។

អ្នកចាត់ការទូទៅ ផលិតកម្ម អិលឌី រូបនេះ បានឱ្យដឹងបន្ថែមថា កត្តាដែលនាំឱ្យផលិតកម្ម អិលឌី ជោគជ័យបន្ត ដោយសារផលិតកម្ម បានសិក្សាសំខាន់បំផុតទៅលើទីផ្សារអ្នកទស្សនាភាពយន្តនៅកម្ពុជា។

លោក លៀក លីណា បានឱ្យដឹងបន្ថែមថា៖ “យើងសិក្សាថា តើទីផ្សារភាពយន្តខ្មែរ អ្វីដែលមហាជនអាចទទួលយកបាន និងអ្វីដែលពួកគាត់ទទួលយកមិនបាន នេះជាអ្វីដែលសំខាន់បំផុត។ ពេលខ្លះ បើយើងផលិតភាពយន្តបានល្អហើយ ប៉ុន្តែអត់មានអ្នកទៅមើល គេពិបាកទទួលយក ហ្នឹងក៏ពិបាកដែរ។ អ៊ីចឹង យើងត្រូវការពង្រឹងទាំងអត្ថបទភាពយន្ត សិក្សាទីផ្សារ គួបផ្សំសម្ភារៈផលិតដែលយើងមាន ហ្នឹងហើយដែលសំខាន់ អាចឱ្យផលិតកម្ម អិលឌី ឈរជើងដល់សព្វថ្ងៃ”។

លោក លៀក លីណា បានឱ្យដឹងថា ទោះយ៉ាងណា ភាពយន្តរបស់ អិលឌី ទាំងអស់ មិនសុទ្ធតែទទួលបានជោគជ័យទេ អាចនិយាយថា ក្នុងចំណោម ៥​ ឬ ១០ រឿង មាន ១ រឿង ដែល ផលិតកម្ម ផលិតទៅខាត។ ទន្ទឹមពេល ផលិតកម្ម អិលឌី កំពុងដំណើរការល្អក្ដី ប៉ុន្តែ អ្នកចាត់ការទូទៅ ផលិតកម្ម រូបនេះ បានអះអាងថា ផលិតកម្ម នៅតែត្រូវការពង្រឹង វិវត្តខ្លួនបន្ថែមទៀត ព្រមទាំងសហការជាមួយដៃគូក្នុងស្រុក និងក្រៅស្រុក ដើម្បីបន្តទទួលការគាំទ្រពីទីផ្សារនៅកម្ពុជា និងឈាននាំទៅទីផ្សារក្រៅប្រទេសនៅក្នុងតំបន់។

គួរបញ្ជាក់ថា បន្ទាប់ពី ស្ថានភាពការឆ្លងរាលដាលនៃជំងឺកូវីដ-១៩ បានធូរស្រាល ឈានដល់ការបើក​សង្គម ក៏ដូចជារោងភាពយន្តឡើងវិញ ផលិតកម្ម អ៊ិលឌី បានបញ្ចេញភាពយន្តបញ្ចាំងតាមបណ្ដារោងភាពយន្ត ដូចជារឿង លោកប្ដី វគ្គ២, សួស្ដីអ្នកជិតខាង, លោកប៉ាមហាកូរ, ស្នេហា Private, បង្គោលគ្រាក់ វគ្គ២ ជាដើម ដែលនៅតែទទួលការគាំទ្រភាគច្រើនពីអ្នកនិយមទស្សនាភាពយន្តនៅរោងកុន។ ផលិតកម្ម ក៏មានគម្រោងផលិតភាពយន្តចំនួន ១០ រឿងជាបន្តជាឆ្នាំ២០២៣ ខាងមុខ៕

អត្ថបទ៖ ច័ន្ទ វីរៈ