ផ្ទុះការគាំទ្ររឿង “លោកតា ២១” មិនបានប៉ុន្មាន! ម្ចាស់ផលិតកម្ម LD ឱ្យតម្រុយរឿងថ្មីមួយទៀត

ក្រោយដាក់បង្ហាញស្នាដៃភាពយន្តបែបកំប្លុកកំប្លែង «លោកតា ២១» មិនបានប៉ុន្មានផង លោក លៀក លីដា ផលិតករល្បីឈ្មោះ និងជាម្ចាស់ផលិតកម្ម LD បានបង្ហើបប្រយោគប៉ុន្មានឃ្លា ដែលទំនងជាចំណងជើងនៃរឿងថ្មី ព្រមទាំងបញ្ជាក់ថា “ក្រោយព្រឹត្តិការណ៍ភ្លេីងឆេះក្លិបក្រោមដី ឆាប់ៗនេះ“។ នេះបើតាមខ្លឹមសារ​ជូនដំណឹង តាមរយៈគណនីហ្វេប៊ុកផ្ទាល់ខ្លួនរបស់លោក នៅរសៀលថ្ងៃទី០៣ ខែកុម្ភៈនេះ ។

តាមរយៈសារខ្លី លោក លៀក លីដា ផលិតករមួយរូបដែលជោគជ័យក្នុងការដឹកនាំរឿងជាច្រើន បានរៀបរាប់ថា “ឆាប់ៗនេះ ៧ថ្ងៃ នៃអាពាហ៍ពិពាហ៍ម៉ានីកាំង​ ក្រោយព្រឹត្តិការណ៍ភ្លេីងឆេះក្លិបក្រោមដី“។

ត្រឹមតែប៉ុន្មានឃ្លានេះ សាធារណជនបានទាយថា អាចជាភាពយន្តថ្មីដែលដកស្រង់ពីហេតុការណ៍ពិតមួយ កាលអំឡុងពេលនៃវិបត្តិជំងឺកូវីដ១៩ ពោលគឺមានទំនាក់ទំនងនឹងហេតុការណ៍ភ្លើងឆេះក្លិបកម្សាន្តក្រោមដីមួយកន្លែង នៅខេត្តមួយរបស់កម្ពុជា បើទោះបីជាផលិតកររូបនេះ ពុំបានបញ្ជាក់លម្អិតលើសារនេះក៏ដោយ។

គួរកត់សម្គាល់ថា ឈានចូលឆ្នាំ២០២៥ នេះ ផលិតកម្ម LD ហាក់បញ្ចេញស្នាដៃរឿងបន្តបន្ទាប់ និងកំពុងទទួលបានការចាប់អារម្មណ៍ផងដែរ។ ពិសេសរឿង «លោតា ២១» ដែលសម្តែងដោយតារាភាពយន្តប្រចាំប្រទេស លោក ទេព រិនដារ៉ូ ជាតួអង្គធំក្នុងសាច់រឿង រួមជាមួយនឹងយាយ យ៉យ ខណៈរឿងនេះ ទើបតែចាក់បញ្ចាំងបានជាង ១សប្តាហ៍ ហើយទទួលបានប្រជាប្រិយខ្លាំង។

យ៉ាងណា ក្រោយបញ្ចេញស្នាដៃរឿងកំប្លុកកំប្លែងមួយរឿងនេះមិនបានប៉ុន្មាន ស្រាប់តែផលិតកររូបនេះ បង្ហើបតម្រុយរឿងថ្មី ដែលផលិតកម្មខ្លួនទំនងជាកំពុងផលិតផងដែរ៕