តោះ! មកដឹងសមាសភាពក្រុមប្រកួតកីឡាពេញនិយម«បាល់ទាត់»នៃព្រឹត្តិការណ៍កីឡាជាតិ លើកទី៣

នៅសល់តែ ១ថ្ងៃទៀតប៉ុណ្ណោះ ព្រឹត្តិការណ៍កីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២ នឹងចាប់ផ្ដើមដោយមានកីឡាចំនួន ៣៨ប្រភេទកីឡាសម្រាប់កីឡាទូទៅ និង៧ប្រភេទកីឡា សម្រាប់កីឡាជនពិការ ដែលនឹងចាប់ផ្ដើមពីថ្ងៃទី២០ ខែវិច្ឆិកា តទៅ។

អ្វីដែលចាប់អារម្មណ៍ កីឡាដែលមានប្រជាប្រិយភាពជាងគេ«បាល់ទាត់»ក៏មានដាក់ឱ្យប្រកួតផងដែរ បើទោះបីជាត្រូវបានគេមើលឃើញថា ក្រុមដែលចូលរួម គឺជាក្រុមពាក់កណ្ដាលអាជីពក៏ដោយ ប៉ុន្តែពោរពេញទៅដោយកីឡាករ-កីឡាការិនី ដែលមានទេពកោសល្យ និងជាយុវជន-យុវនារី បន្តវេន។

ប្រភេទកីឡាបាល់ទាត់ នៃព្រឹត្តិការណ៍កីឡាជាតិលើកទី៣ មានបែងចែកចេញជាពីរ គឺបាល់ទាត់បុរស និងបាល់ទាត់នារី។ បាល់ទាត់បុរស មានក្រុមចំនួន ១១ ចូលរួម៖

ពូល A មាន ៤ក្រុម៖ ក្រសួងការពារជាតិ, ត្បូងឃ្មុំ, កំពង់ឆ្នាំង និង រាជធានីភ្នំពេញ

ពូល B មាន ៤ក្រុម៖ តាកែវ, កោះកុង, កំពត និង ឧត្តរមានជ័យ 

ពូល C មាន ៣ក្រុម៖ បន្ទាយមានជ័យ, ក្រសួងមហាផ្ទៃ និង ព្រៃវែង

បាល់ទាត់នារី មានក្រុមចំនួន ១១ចូលរួមផងដែរ៖

ពូល A មាន ៤ក្រុម៖ កំពង់ស្ពឺ, បាត់ដំបង, ព្រៃវែង និង កំពង់ធំ

ពូល B មាន ៤ក្រុម៖ ស្វាយរៀង, កំពង់ឆ្នាំង, កណ្ដាល និង ត្បូងឃ្មុំ

ពូល C មាន ៤ក្រុម៖ បន្ទាយមានជ័យ, សៀមរាប និង កំពង់ចាម

រូបមន្តប្រកួត គឺវិលជុំសន្សំពិន្ទុក្នុងពូល ហើយក្រុមលេខ១ ប្រចាំពូលទាំង ៣ នឹងបានឡើងទៅវគ្គពាក់​កណ្ដាលផ្ដាច់ព្រ័ត្រ បូកនឹងក្រុមលេខពីរល្អ ចំនួន ១ក្រុម។ ចំពោះទីលានប្រកួត គឺមានកីឡដ្ឋាន ខ.ភ.ម (ស្តាតចាស់), វិទ្យាល័យបឹងកេងកង, វិទ្យាល័យបឹងត្របែក, វិទ្យាល័យច្បារអំពៅ និង វិទ្យាស្ថានជាតិអប់រំកាយ និងកីឡា ក្រុមនារីប្រកួតនៅម៉ោង ៨ព្រឹក ខណៈក្រុមបុរសប្រកួតនៅម៉ោង ៣:៣០នាទីរសៀល។

សូមរំលឹកថា កាលពីព្រឹត្តិការណ៍កីឡាជាតិលើកទី២ ជើងឯកបុរស គឺបានទៅ ខេត្តស្វាយរៀង, លេខ២ ខេត្តបន្ទាយមានជ័យ និងលេខ៣ ខេត្តកំពង់ឆ្នាំង។ ដោយឡែកជើងឯកនារី គឺបានទៅ ខេត្តបាត់ដំបង, លេខ២ ខេត្តកំពង់ស្ពឺ និងលេខ៣ ខេត្តស្វាយរៀង៕

អត្ថបទ៖ មន្នីរ័ត្ន