ក្លិប Barcelona ចាប់ដៃគូ​អភិវឌ្ឍ​បាល់ទាត់​៥​ឆ្នាំ​នៅប្រទេសម៉ាលី

ក្លិប FC Barcelona បានប្រកាសពីភាពជាដៃគូរយៈពេល៥ឆ្នាំជាមួយ​​ក្លិប Africa Foot ​នៅ​ប្រទេសម៉ាលី ដើម្បីគាំទ្រដល់ការអភិវឌ្ឍធនធានកីឡា​បាល់ទាត់​នៅទី​នោះ។

កិច្ចព្រមព្រៀងនេះត្រូវបានចុះហត្ថលេខាដោយលោក Sergi Burjuan នាយកសាលា​បាល់ទាត់​ Barcelona Academies, លោក Kassoum Coulibaly ថ្នាក់ដឹកនាំរបស់ក្លិប Africa Foot ជាមួយអគ្គរដ្ឋទូតអេស្ប៉ាញប្រចាំប្រទេសម៉ាលី និងមន្ត្រីជាច្រើនចូលរួម។ ភាពជាដៃគូនេះ ជាផ្នែកមួយនៃកិច្ចខិតខំប្រឹងប្រែង​ទូលំទូលាយរបស់​​ក្លិប​អេស្ប៉ាញ​ នៅក្នុងទ្វីបអាហ្រ្វិក បន្ទាប់ពី​កិច្ច​សហការស្រដៀងគ្នា​បាន​កើត​មាន​ឡើង​នៅប្រទេសកូតឌីវ័រ និងសេណេហ្គាល់ ។

ប្រធានក្លិប Africa Foot លោក Bahama Sidibé បាននិយាយថា ៖«ថ្ងៃនេះជាការចាប់ផ្តើមជាផ្លូវការពី​ភាពជាដៃគូជាប្រវត្តិសាស្ត្ររវាងក្លិប FC Barcelona និងក្លិប Africa Foot។ ភាពជាដៃគូនេះ​សញ្ញាដ៏រឹងមាំ ដែលបង្ហាញពីសក្តានុពលនៅក្នុងប្រទេសម៉ាលី និងទ្វីបអាហ្វ្រិក»។

នាយកសាលាបាល់ទាត់ Barcelona Academies ប្រចាំទ្វីបអាហ្រ្វិក លោក Thierno Barry បាននិយាយ​ថា ៖«យើងបានធ្វើការងារជាមួយភាគីម៉ាលីអស់មួយរយៈ ដើម្បីធ្វើឲ្យកិច្ចសហការនេះក្លាយជាការពិត។ ការធ្វើដំណើរអាចនឹងមានការពិបាក ប៉ុន្តែ​​តាម​រយៈ​ការប្តេជ្ញាចិត្ត និងការតស៊ូរួម​គ្នា យើងប្រាកដថា យើងនឹងសម្រេចបាននូវរឿងដ៏អស្ចារ្យ»៕

ប្រែសម្រួល៖ ផា រតនា