មក​ដឹង​តម្លៃ​សិក្សា​ជំនាញ​ព័ត៌មានវិទ្យា​គ្រឹះស្ថាន​រដ្ឋទាំង ៣ កន្លែង​នៅ​ភ្នំពេញ

ជំនាញ​ព័ត៌មាន​វិទ្យា​ ជា​ជំនាញ​ឯកទេស​ដែល​គ្រប់​ដណ្ដប់​លើ​ការ​គ្រប់គ្រង និង​ការ​រចនា​ប្រព័ន្ធ​កុំព្យូទ័រនិង​ប្រព័ន្ធ​ទូរគមនាគមន៍។

ព័ត៌មានវិទ្យាក៏ជាជំនាញមួយ​ដែល​ទទួលការ​ចាប់អារម្មណ៍ច្រើនពីសិស្សនិស្សិត ក្នុង​ចំណោមមុខជំនាញ​ផ្សេងទៀតនៅតាមមហាវិទ្យាល័យ។

កម្ពុជាថ្មី នឹង​បង្ហាញតម្លៃ​សិក្សា​នៅសាកលវិទ្យាល័យ​រដ្ឋធំៗ ៣ កន្លែង​លើ​ជំនាញ​ព័ត៌មានវិទ្យា។

១. សាកលវិទ្យាល័យ​ភូមិន្ទ​ភ្នំពេញ

សាកលវិទ្យាល័យ​ភូមិន្ទ​ភ្នំពេញ ​ជា​គ្រឹះស្ថាន​ឧត្ដមសិក្សា​ចំណាស់​ជាង​គេ និង​ធំ​ជាង​គេ​​បាន​បង្កើត​ឡើង​ដំបូង​តាំង​ពី​ឆ្នាំ​ ១៩៦០​។

​សម្រាប់​ឆ្នាំ​សិក្សា​ថ្មី​២០២២-២០២៣​នេះ ​ដេប៉ា​តេម៉ង​​ព័ត៌មានវិទ្យានៅ​សាកលវិទ្យាល័យភូមិន្ទភ្នំពេញ​ ​ជ្រើសរើស​សិស្ស​និស្សិត​ឱ្យ​ចូល​សិក្សា​រាប់ពាន់នាក់។ ដោយឡែក​​ថ្នាក់​បរិញ្ញាបត្រ​ព័ត៌មានវិទ្យា​នៅ​សាកលវិទ្យាល័យភូមិន្ទ​ភ្នំពេញ តម្លៃ​សិក្សាគឺ ៥០០​ដុល្លារ​អាមេរិក​ក្នុង​/​ឆ្នាំ ដោយ​​សិក្សា​រយៈ​ពេល​ ៤​ឆ្នាំ។

២.​ សាកលវិទ្យាល័យ​ជាតិ​គ្រប់គ្រង

មហាវិទ្យាល័យ​វិទ្យាសាស្ត្រ​ព័ត៌មានវិទ្យានៅក្នុង​​សាកលវិទ្យាល័យ​ជាតិ​គ្រប់គ្រង ថ្នាក់​បរិញ្ញាបត្រ​ព័ត៌មានវិទ្យា​ជាភាសាខ្មែរតម្លៃ​សិក្សា ៦០០​ដុល្លារ​អាមេរិក​ក្នុង​មួយ​ឆ្នាំ។

៣. សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច

​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច​ ដែល​ជា​សាកលវិទ្យាល័យ​ដ៏ល្បីឈ្មោះ​មួយដែរ តម្លៃ​​សិក្សា​ជំនាញ​ព័ត៌មាន​វិទ្យា​​ថ្នាក់​បរិញ្ញាបត្រ​គឺ ៥៨០​ដុល្លារ​ក្នុង​មួយ​ឆ្នាំ ប៉ុន្តែ​ប្រសិន​បើសិស្ស​បង់​ក្នុង​មួយ​ឆមាសតម្លៃ ៦០០​ដុល្លារ​ក្នុងមួយ​ឆ្នាំ។

ក្រៅ​ពីសាកលវិទ្យាល័យធំៗ​ទាំង ៣ ​គ្រឹះស្ថាន​សិក្សា​ទាំង​រដ្ឋនិង​ឯកជន​ផ្សេងទៀតក៏មានបើកថ្នាក់​ព័ត៌មានវិទ្យាដែល​ទទួលស្គាល់ពី​សិស្ស​និស្សិតសិក្សា​ក្នុង​នោះដូចជា៖ សាកលវិទ្យាល័យន័រតុន, សាកលវិទ្យាល័យ​អាយស៊ី​នៃបច្ចេកវិទ្យា, សាកលវិទ្យាល័យ​លីមកុកវីង, សាកលវិទ្យាល័យ​ពុទ្ធិសាស្រ្ត​, វិទ្យាស្ថាន​ជាតិ​ប្រៃសណីយ៍​ទូរគមនាគមន៍​បច្ចេកវិទ្យា គមនាគមន៍​និង​ព័ត៌មាន (NIPTICT), សាលា ស៊ីតិច(​SETEC Institute), វិទ្យាស្ថាន​បច្ចេកវិទ្យា​កម្ពុជា (Institute of Technology of Cambodia) និង​សាកល​វិទ្យាល័យ​មេគង្គ​កម្ពុជា (Cambodia Mekong University) ជាដើម៕

ដោយ៖ ឌិន ថារី