អ្នកឧកញ៉ា គួច ម៉េងលី លើកទឹកចិត្តដល់អ្នករៀនមិនចប់វិទ្យាល័យ ងាកទៅរៀនជំនាញឯកទេស

អ្នកឧកញ៉ា គួច ម៉េងលី ដែលគេស្គាល់ថាជាអ្នកផ្តល់ការអប់រំដល់សង្គមមួយរូប បានបង្ហោះនៅលើហ្វេសប៊ុករបស់លោកនៅថ្ងៃទី១២ ខែកក្តដា លើកទឹកចិត្តដល់បុគ្គលណាដែលរៀនមិនបានចប់ថ្នាក់វិទ្យាល័យ កុំឱ្យបាក់ទឹកចិត្ត ដោយអាចចាប់យកជំនាញឯកទេសសិក្សាបាន ព្រោះវាក៏មានតម្លៃស្មើបរិញ្ញាបត្រនៅសាកលវិទ្យាល័យដែរ។

អ្ន​កឧកញ៉ា គួច ម៉េងលី លើកឡើងបែបនេះ ស្របពេលដែលមនុស្សមួយចំនួននៅក្នុងសង្គមបោះបង់ចោលការសិក្សាត្រឹមថ្នាក់វិទ្យាល័យ ឬ ក្រោយប្រឡងមិនជាប់ថ្នាក់បាក់ឌុប ដែលធ្វើឱ្យពួកគេបាក់ទឹកចិត្ត មិនអាចបន្តការសិក្សាបានទៀត។ ទាំងនេះ ក៏ធ្វើឱ្យអត្រាគ្មានការងារធ្វើកើនឡើង ហើយអាចឱ្យពួកគេជួបបញ្ហាក្នុងជីវិតប្រចាំថ្ងៃផងដែរ។

អ្នកឧកញ៉ា បានលើកឡើងថា មជ្ឈមណ្ឌលបណ្ដុះបណ្ដាលបច្ចេកទេស និងវិជ្ជាជីវៈ ដែលជាកម្មវិធីសិក្សាកម្រិតបរិញ្ញាបត្ររងរយៈពេល២ឆ្នាំមានច្រើនណាស់នៅកម្ពុជា។ សិស្សអាចរៀនចប់២ឆ្នាំ រួចក៏អាចបន្តចូលមហាវិទ្យាល័យ ឬ សាកលវិទ្យាល័យបានទោះមិនបានបញ្ចប់ថ្នាក់ទី១២ក៏ដោយ។ សញ្ញាបត្រដែលទទួលបាន ក៏មានតម្លៃស្មើជាមួយមួយសញ្ញាបត្ររបស់និស្សិតសាកលវិទ្យាល័យដូចគ្នា។ មួយវិញទៀត ជំនាញរឹង ឯកទេសផ្សេងៗកំពុងតែពេញនិយមនៅកម្ពុជាស្រាប់ ដូច្នេះប្រសិនបើអ្នកសិក្សាចង់ចាប់ជំនាញសិក្សា អាចរៀនតាមឯកទេសខ្លួនស្រឡាញ់ និងពេញចិត្ត ងាយស្រួលសម្រាប់ការចាប់អាជីពក្នុងជីវិតថែមទៀតផង។

នាយកប្រតិបត្តិក្រុមហ៊ុន ម៉េងលី ជេគួច អេឌ្យូខេសិន រូបនេះបានសង្កត់ធ្ងន់ថា៖ “សញ្ញាបត្រនេះមានកម្រិតស្មើគ្នា និងតម្លៃស្មើគ្នា។ ដូច្នេះ សូមក្មួយៗទាំងឡាយកុំអស់សង្ឃឹម កុំបាក់ទឹកចិត្ត ឬ មើលរំលងសក្តានុពលរបស់ខ្លួនឯងឱ្យសោះ។”

លោកក៏បន្តជំរុញទឹកចិត្តដល់អ្នកសិក្សាគ្រប់រូប កុំចុះចាញ់ និងមានការតស៊ូ ខិតខំប្រឹងប្រែងចាប់យកចំណេះជំនាញសម្រាប់ជីវិតរបស់ខ្លួនម្តងហើយម្តងទៀត ដោយលោកបានផ្តាំថា បើមានការតស៊ូ នោះនឹងទទួលបានផលសម្រេចដូចបំណងរបស់ខ្លួន៕