ណាតូ ថា រុស្ស៊ី នឹងបើកការវាយលុកថ្មីលើ អ៊ុយក្រែន រយៈពេល ៣ ខែទៀត

ប្រធានគណៈកម្មាធិការយោធារបស់អង្គការណាតូលោក Rob Bauer បាននិយាយកាលពីថ្ងៃព្រហស្បតិ៍ថា រុស្ស៊ីទំនងជានឹងបើកការវាយលុកថ្មីលើប្រទេសអ៊ុយក្រែន ក្នុងអំឡុងពេលរដូវផ្ការីកខែមេសា និងឧសភា ។

លោក Bauer បាននិយាយថា គោលដៅយុទ្ធសាស្ត្ររបស់ទីក្រុងមូស្គូមិនផ្លាស់ប្តូរនោះទេ ដូច្នេះសម្ព័ន្ធភាពរបស់យើងរំពឹងថា រុស្ស៊ីនឹងមានការវាយប្រហារថ្មីមកលើប្រទេសអ៊ុយក្រែន ។

ឆ្លើយតបទៅនឹងសំណួររបស់អ្នកសារព័ត៌មាននៅឯសន្និសីទសារព័ត៌មាន បន្ទាប់ពីកិច្ចប្រជុំថ្នាក់សេនាធិការរបស់អង្គការណាតូ, លោកឧត្តមនាវីឯកបានបញ្ជាក់ថា “បើទោះបីជាវាមិនច្បាស់ ១០០ ភាគរយក៏ដោយ ប៉ុន្តែផ្អែកលើការសន្មត់របស់យើង រុស្ស៊ីទំនងជានឹងចាប់ផ្ដើមប្រតិបត្តិការសឹកថ្មីផ្សេងទៀតនៅរដូវផ្ការីក” ។

លោក Bauer បន្ថែមថា ប្រសិនបើរុស្ស៊ីមិនផ្លាស់ប្ដូរគោលដៅយុទ្ធសាស្ត្ររបស់ពួកគេទេ ច្បាស់ណាស់ថា ខែមេសា និងឧសភា នឹងកើតមានការវាយលុកថ្មី ហើយលោកក៏បានជំរុញឲ្យប្រជាជនអ៊ុយក្រែនត្រៀមខ្លួនសម្រាប់ការវាយលុកដែលអាចកើតមានឡើងនោះផងដែរ ។

គួរបញ្ជាក់ថា រហូតមកដល់ពេលនេះប្រតិបត្តិការសឹករបស់រុស្ស៊ីលើអ៊ុយក្រែនបានអូសបន្លាយពេលជិត ១ ឆ្នាំហើយ បន្ទាប់ពីលោកប្រធានាធិបតី វ្ល៉ាឌីមៀរ ពូទីន បានបញ្ជាឲ្យកងកម្លាំងទីក្រុងមូស្គូបើកការលុកលុយទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ត្រឹម ២ ថ្ងៃប៉ុណ្ណោះលោក Zelensky បាត់មនុស្សជំនិតៗ ខណៈប្រតិបត្តិការ​សឹករបស់ រុស្ស៊ី នៅតែបន្ត