ព័ត៌មានជាតិ

លែងបង្ហូរទឹកស្អុយចូលព្រែកកំពតទៀត អាងប្រព្រឹត្តិកម្មទឹកកខ្វក់នៅក្រុងកំពតជិតសង់រួចរាល់

បានផុស

២ years មុន

នៅ

ថ្ងៃសុក្រ ២៦ ឧសភា ២០២៣

ដោយ

Dy Bunnara

អាងប្រព្រឹត្តកម្មទឹកកខ្វក់នៅក្រុងកំពត កំពុងដំណើរការសាងសង់គ្រោងបញ្ចប់ក្នុងពេលឆាប់ៗខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបការសាកសួររបស់កម្ពុជាថ្មីតាមទូរសព្ទនៅព្រឹកនេះ លោក ឃុត ឧសភា នាយករដ្ឋបាលសាលាខេត្តកំពតបានបញ្ជាក់ថា អាងប្រព្រឹត្តកម្មទឹកកខ្វក់នៅក្រុងកំពតជាគម្រោងរបស់ក្រសួងសាធារណការនិងដឹកជញ្ជូន ក្រោមកម្ចីពីធនាគារអភិវឌ្ឍអាស៊ី ADB ដែលគ្រោងបញ្ចប់ដាក់ឲ្យដំណើរការក្នុងពេលឆាប់ៗខាងមុខនេះ។

តាមរយៈអាងប្រព្រឹត្តកម្មទឹកកង្វក់ដែលគ្រោងដាក់ឲ្យដំណើរការឆាប់ៗនេះ នឹងអាចបង្វែរសំណល់រាវចេញពីទីប្រជុំជនមិនឲ្យបង្ហូរចូលទៅក្នុងព្រែកកំពត។

«ពីមុនតាមរយៈបណ្តាញលូចាស់សល់ពីជំនាន់បារាំង ទឹកសម្អុយត្រូវបង្ហូរត្រង់ចូលព្រែកកំពង់បាយហៅព្រែកកំពត ចឹងទេប្រព័ន្ធអាងប្រព្រឹត្តិកម្មនេះដាក់ឲ្យដំណើរការ អាចបញ្ចៀសបង្ហូរទឹកកខ្វក់ចូលដោយត្រូវចម្រោះជាមុនសិនមុនបង្ហូរចូលព្រែកធម្មជាតិ»។

អាងប្រព្រឹត្តកម្មទឹកកខ្វក់នៅក្រុងកំពតកំពុងសាងសង់ជិតបញ្ចប់ឆាប់ៗនេះ

ជុំវិញមតិរិះគន់បន្ទាប់ពីមានការបង្ហោះចែកចាយការបង្ហូរទឹកសម្អុយចូលទៅព្រែកកំពង់បាយក្នុងក្រុងកំពត ដោយចោទអាជ្ញាធរមិនបានគិតគូរ លោក ឃុត ឧសភា បានច្រានចោលការចោទប្រកាន់នេះ។

លោកបញ្ជាក់ថា ការស្ថាបនាប្រព័ន្ធចម្រោះទឹកកខ្វក់នេះ អាជ្ញាធរខេត្តបានគិតគូរយូរឆ្នាំមកហើយ ហើយរំពឹងថានៅពេលគម្រោងបញ្ចប់នឹងចូលរួមអភិវឌ្ឍបរិស្ថានអនាម័យរបស់ក្រុងកំពត ក្នុងការទាក់ទាញភ្ញៀវទេសចរមកកម្សាន្តបន្ថែមទៀត៕