រនាលពណ៌ ជាប្រភេទសត្វជិតទទួលរងការគំរាមកំហែងលើពិភពលោក

រនាលពណ៌ មានឈ្មោះវិទ្យាសាស្ត្រ Mycteria Leucocephala ជាប្រភេទជិតទទួលរងការគំរាមកំហែង (NT) លើពិភលោកក្នុងបញ្ជីក្រហម IUCN។ សត្វប្រភេទនេះ មានវត្តមានពេញមួយឆ្នាំក្នុងប្រទេសកម្ពុជា ដែលមាននៅតាមតំបន់ដីសើម តំបន់ទំនាបកណ្ដាល តំបន់ព្រៃលិចទឹកនៃតំបន់រាមសារព្រែកទាល់នៃបឹងទន្លេសាប ។

កត្តាសំខាន់ៗដែលគំរាមកំហែងទៅលើរនាលពណ៌ គឺការប្រមាញ់ និងប្រមូលពងកូនពីកន្លែងបន្តពូជ ការបាត់បង់ទីជម្រក និងការរំខានដោយសកម្មភាពមនុស្ស។ សត្វប្រភេទនេះភាគច្រើន រស់នៅតំបន់សើម និងមានបន្ទាយពងកូនដ៏ធំនៅតំបន់បឹងទន្លេសាប ហើយចាប់ផ្តើម បន្តពូជនៅចុងរដូវវស្សាជាមួយនឹងសត្វស្លាបទឹកធំៗផ្សេងទៀតដូចជា ត្រដក់តូច និងត្រដក់ធំជាដើម។ បន្ទាប់ពីបន្តពូជពងកូននៅតំបន់បឹងទន្លេសាប ប្រភេទនេះផ្លាស់ទី​ទៅកាន់តំបន់ដីសើមផ្សេងៗទៀតក្នុងប្រទេស និងប្រទេសជិតខាង ដើម្បីរកចំណី។

រនាលពណ៌ចូលចិត្តបន្តពូជ និងរកចំណីជាហ្វូងៗរួមគ្នា ហើយពេលបន្តពូជស្បែកក្បាលរបស់វាឡើងក្រហម និងចំពុះពណ៌លឿង។ ស្លាបទីមួយ មានពណ៌ខ្មៅស្រាលលាយសផ្នែកខាងលើ និងផ្នែកខាងក្រោមនៃគម្របស្លាប និងបង្កង់នៅលើ ទ្រូងមានពណ៌ខ្មៅ ស ស្លាបទីពីរ​ និងគម្របស្លាបធំមានពណ៌ផ្កាឈូក ចំពុះផ្កាឈូកលាយលឿង និងមាន ក្បាលត្រងោលពណ៌ក្រហមលាយទឹកក្រូច៕

ប្រភព៖ សៀវភៅកម្ពុជាមាតុភូមិខ្ញុំ