ក្រសួងកសិកម្ម ជំរុញឱ្យមានការអភិវឌ្ឍដីសម្បទានសេដ្ឋកិច្ច​ទៅតាមផែនការកំណត់​របស់រដ្ឋាភិបាល

​រដ្ឋមន្រ្តីក្រសួងកសិកម្ម និងភាគីពាក់ព័ន្ធ កំពុងជំរុញឱ្យមានការអភិវឌ្ឍន៍ដីសម្បទានសេដ្ឋកិច្ចទៅតាមផែនការកំណត់​របស់រដ្ឋាភិបាល។ បន្ថែមពីលើនេះ លោករដ្ឋមន្រ្តី ឌិត ទីណា ក៏បានលើកទឹកចិត្តដល់អាជ្ញាធរមូលដ្ឋាន​ការពារដីវិនិ​យោគរបស់ក្រុមហ៊ុន ដែលជាដីរបស់រដ្ឋ ប្រឈមនឹងការចូលទន្រ្ទាមកាន់កាប់ដោយខុសច្បាប់​ផងដែរ។​ លោក ឌិត ទីណា រដ្ឋមន្រ្តីក្រសួងកសិកម្ម លើកឡើងបែបនេះ នៅក្នុងដំណើរទស្សនកិច្ចនៅក្រុមហ៊ុនវិនិយោគដំណាំកសិ​-ឧស្សាហកម្ម មេហ្គាហ្វាមខេមបូឌៀ លើដីសម្បទាន​សេដ្ឋកិច្ចរបស់រដ្ឋ ជាង៨ពាន់ហិកតា ស្ថិតនៅស្រុករវៀង ខេត្តព្រះវិហារ កាលពីថ្ងៃទី ២៨ មិថុនា។

លោក ឌិត ទីណា បានគូសបញ្ជាក់ថា គោលដៅសំខាន់របស់រដ្ឋាភិបាល ក្នុងការផ្តល់ដីសម្បទាន​សេដ្ឋកិច្ចទៅ​ឱ្យក្រុមហ៊ុន គឺដើម្បីអភិវឌ្ឍន៍ឱ្យរីកចម្រើនកាន់តែខ្លាំងលើវិស័យកសិកម្ម កសិ-ឱស្សាហកម្ម និងការចិញ្ចឹមសត្វជាដើម ឱ្យក្លាយជាកន្លែងផលិតដែលមិនត្រឹមតែសម្រាប់ការផ្គត់ផ្គង់នៅក្នុងស្រុកប៉ុណ្ណោះទេ ប៉ុន្តែក៏សម្រាប់​ការនាំចេញក្រៅ​ប្រទេសទៀតផងដែរ។

នៅក្នុងដំណើរទស្សនកិច្ចនេះ លោករដ្ឋមន្រ្តី ក៏បានអញ្ជើញទៅពិនិត្យការសាងសង់ឃ្លាំងស្តុក និងម៉ាស៊ីនកែច្នៃផលពោត ដែលប្រមូលបាន និងស្វែងយល់ពីការរៀបចំហេដ្ឋារចនាសម្ព័ន្ធដាំដុះ ប្រព័ន្ធស្រោចស្រពទឹក ការប្រើប្រាស់គ្រឿងចក្រ​ដើរដោយប្រព័ន្ធបច្ចេកវិជ្ជាស្វ័យប្រវត្តិដូចជា ត្រាក់ទ័រ យន្តហោះដ្រូន ដើម្បីប្រតិបត្តិការស្រោចស្រពទឹក ដាក់ជី បាញ់​ថ្នាំការពារសត្វល្អិតចង្រៃ ព្យាបាលជំងឺដំណាំ និងប្រមូលផលដោយការប្រើប្រាស់គ្រឿងចក្រស្វ័យប្រវត្តិ ព្រមទាំង​មធ្យោបាយដាំដុះដំណាំដែលអាចរក្សាគុណភាពដីប្រកបដោយនិរន្តរភាព។

លោក ឌិត ទីណា មានការចាប់អារម្មណ៍ខ្ពស់ ចំពោះការដាំសណ្តែកសៀង។ សណ្ដែកសៀងដែលកំពុងមានទីផ្សារខ្ពស់ និងអាចជួយបង្កើនគុណភាពដីសម្រាប់ការដាំដំណាំផ្សេងទៀត ដូចជាពោតជាដើម។

សូមបញ្ជាក់ថា បច្ចុប្បន្នក្រុមហ៊ុនមេហ្គាហ្វាមខេមបូឌៀ កំពុងវិនិយោគលើដំណាំពោត សណ្តែកសៀង និងដំឡូងមី ដើម្បីកែច្នៃមុន និងធ្វើការនាំចេញ៕