ជីវិតកម្សាន្ដ

តារាចម្រៀង វ៉ាន់ នីឡា សម្រេចបំណងធំកាលពីតូច

បានផុស

២ years មុន

នៅ

ថ្ងៃអង្គារ ១៨ កក្កដា ២០២៣

ដោយ

បន្ទាប់អវត្តមានពីសិល្បៈអស់មួយសន្ទុះធំកន្លងទៅ ទីបំផុតតារាចម្រៀងចង្កេះអង្ក្រង កញ្ញា វ៉ាន់ នីឡា កាលពីថ្មីៗ បានសម្រេចចិត្តវិលចូលអាជីពសិល្បៈផ្នែកចម្រៀងរបស់ខ្លួនឡើងវិញហើយ ខណៈមានអ្នកគាំទ្រជាច្រើនបង្ហាញការសាទរ។ មិនតែប៉ុណ្ណោះ រឿងដែលនាងកាន់តែរំភើបថែមទៀត វ៉ាន់ នីឡា ក៏បានប្រកាសទើបសម្រេចបំណងប្រាថ្នាធំកាលពីតូចទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេចាំបានថា ការសម្ងំខ្លួនឃ្លាតឆ្ងាយពីសិល្បៈយូរឆ្នាំរបស់កញ្ញា វ៉ាន់ នីឡា កាលនោះ ដោយសារតែបញ្ហា នៃរឿងអាស្រូវស្នេហាដែលធ្វើឲ្យតារាស្រីរូបនេះកើតក្ដីអាម៉ាស់ ទើបដាច់ចិត្តផ្អាកសិល្បៈមួយរយៈសិន។ ទន្ទឹមគ្នា នៃការវិលត្រឡប់នេះដែរ កញ្ញា វ៉ាន់ នីឡា ធ្លាប់បានបញ្ជាក់ថា មូលហេតុចម្បងធ្វើឲ្យនាងសម្រេចចិត្តចូលសិល្បៈវិញនោះ ដោយសារតែសម្លឹងឃើញពីការគាំទ្ររបស់ទស្សនិកជនចំពោះរូបនាង។

ជាមួយគ្នានេះ តារាចម្រៀង វ៉ាន់ នីឡា សម្ដែងក្ដីរំភើបយ៉ាងខ្លាំង បន្ទាប់ពីបានសម្រេចក្ដីស្រមៃក្លាយជាពិធីការិនីក្នុងកម្មវិធីមួយ ក្រោយប្រឡូកសិល្បៈអស់រយៈពេលជាច្រើនឆ្នាំមកនេះ។ ជាការពិត តារារូបនេះ ត្រូវបានជ្រើសរើសជាពិធីការិនីក្នុងកម្មវិធី «The Rapper Cambodia» ដែលជាកម្មវិធីប្រឡងចម្រៀងបែបរ៉េបដ៏ល្បីមួយ និងមានផ្សាយលើកញ្ចក់ទូរទស្សន៍បាយ័ន។

កញ្ញា វ៉ាន់ នីឡា បញ្ជាក់ឲ្យដឹងទាំងក្ដីរំភើបចិត្តខ្លាំងថា «អារម្មណ៍មួយនេះ មិនដឹងត្រូវរៀបរាប់ចាប់ពីកន្លែងណា។ ទីបំផុតបំណងប្រាថ្នារបស់ខ្ញុំតាំងពីតូច គឺបានសម្រេចហើយ អាជីពជាពិធីការិនី គឺជាអ្វីដែលខ្ញុំស្រលាញ់ខ្លាំង បន្ទាប់ពីបំណងជាតារាចម្រៀង។ នាងខ្ញុំសូមយកឱកាសនេះ អរគុណទៅដល់ផលិតកម្មបារមី Baramey Production ដែលបានផ្ដល់ឱកាសមួយនេះមកកាន់នាងខ្ញុំ»។

បន្ថែមពីលើនេះ តារាចម្រៀងរាងតូចច្រឡឹងកញ្ញា វ៉ាន់ នីឡា លើកឡើងថា «វាជារឿងដ៏អស្ចារ្យមួយដែលកើតឡើងដោយមិននឹកស្មានដល់ នាងខ្ញុំ នឹងប្រឹងប្រែងឲ្យអស់ពីសមត្ថភាព»។ តារាស្រី វ៉ាន់ នីឡា ក៏បានចាត់ទុកឱកាសក្លាយជាពិធីការិនីជាលើកដំបូងរបស់នាងនាពេលនេះ គឺជាការសម្រេចក្ដីស្រមៃតាំងពីតូចរបស់ខ្លួន បន្ទាប់ពីក្លាយជាតារាចម្រៀងអាជីព។

សូមបញ្ជាក់ថា កម្មវិធី «The Rapper Cambodia » បានរៀបចំឡើងដោយផលិតកម្ម Boramey មានការចូលរួមពីតារារ៉េបល្បីៗ នៅកម្ពុជា ជាពិសេសតារាចម្រៀង វណ្ណដា ធ្វើជាគណៈកម្មការដាក់ពិន្ទុផងដែរ។ ការប្រកួតប្រជែងនេះ ផ្ដោតលើការស្វែងរកបេក្ខជនដែលមានទេពកោសល្យជំនាន់ថ្មីរបស់ប្រទេសកម្ពុជា និងជួយជ្រោមជ្រែងពួកគេបានឡើងលើវេទិកាដើម្បីបង្ហាញពីជំនាញនៅក្នុងតន្ត្រីលក្ខណៈផ្ទាល់ខ្លួន ក៏ដូចជាលំហូរ នៃការរ៉េបទៅតាមភ្លេង និងការលេងពាក្យជាដើម៕

អត្ថបទ ៖ ចាន់រ៉ា