ហេតុផលមួយ បណ្តាលឲ្យភ្លើងឆេះព្រៃនៅ ហាវ៉ៃ រាលដាលកាចសាហាវបែបនេះ

ក្រុមហ៊ុនច្បាប់ជាច្រើន បានប្រកាសពីផែនការដើម្បីចាត់វិធានការផ្លូវច្បាប់ ប្រឆាំងនឹងក្រុមហ៊ុនអគ្គិសនី Hawaiian Electric ដោយអះអាងថា ក្រុមហ៊ុនផ្គត់ផ្គង់ថាមពលដ៏ធំបំផុតរបស់រដ្ឋមួយនេះ បានបង្កកំហុស ព្រោះពួកគេមិនបានកាត់ផ្តាច់ចរន្តពេលមានអគ្គិភ័យ ជាហេតុធ្វើឲ្យភ្លើង រាលដាលកាចសាហាវបែបនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលរដ្ឋ ហាវ៉ៃ លោក Josh Green បានប្រកាសកាលពីល្ងាចថ្ងៃអាទិត្យទី១៣ខែសីហាថា អគ្គិភ័យនៅកោះ Maui បានក្លាយជាភ្លើងឆេះព្រៃដ៏សាហាវបំផុត ក្នុងប្រវត្តិសាស្ត្រអាមេរិកសម័យទំនើប ខណៈចំនួនមនុស្សស្លាប់បានកើនឡើងដល់ ៩៣នាក់ហើយ។

គ្រោះមហន្តរាយនេះ បានវ៉ាដាច់អគ្គិភ័យ Camp Fire នៅរដ្ឋកាលីហ្វ័រញ៉ា កាលពីឆ្នាំ២០១៨ដែលបានសម្លាប់មនុស្សចំនួន៨៥នាក់ ហើយគឺជាគ្រោះមហន្តរាយអាក្រក់បំផុតចាប់តាំងពីអគ្គិភ័យ Cloquet & Moose Lake Fires នៅ Minnesota ក្នុងឆ្នាំ១៩១៨ ដែលសម្លាប់មនុស្ស ៤៥៣នាក់។

ឥឡូវនេះ វាក៏ក្លាយជាគ្រោះធម្មជាតិសាហាវបំផុតក្នុងប្រវត្តិសាស្ត្ររដ្ឋហាវ៉ៃផងដែរ។ ថ្វីបើតួលេខមនុស្សស្លាប់ហក់ឡើងដល់ជិតខ្ទង់រយក៏ពិតមែន ប៉ុន្តែក្រុមសង្គ្រោះនិយាយថា ពួកគេទើបរុករកនៅតំបន់ឆេះខ្ទេចបានប្រហែល ៣%ប៉ុណ្ណោះ ហើយនេះក៏ជាហេតុបង្កើនលទ្ធភាពថា ចំនួនមនុស្សស្លាប់ នឹងកើនឡើងខ្លាំងជាបន្តទៀតផងដែរ ។

ថ្វីបើបច្ចុប្បន្ន អាជ្ញាធរអាចគ្រប់គ្រងភ្លើងឆេះព្រៃបានភាគច្រើនក៏ដោយ ប៉ុន្តែកិច្ចខិតខំប្រឹងប្រែងដើម្បីពន្លត់អគ្គិភ័យឲ្យបានទាំងស្រុង កំពុងបន្តនៅផ្នែកខ្លះនៃកោះ Maui រួមទាំងជុំវិញទីក្រុង Lahaina ដែលត្រូវបានកម្ទេចខ្ទេចគ្មានសល់ផងដែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ មនុស្សស្លាប់ដោយសារភ្លើងឆេះព្រៃនៅ ហាវ៉ៃ កើនដល់ជិត ១០០នាក់