ព័ត៌មានអន្ដរជាតិ

ភ្លើងឆេះព្រៃបង្កដោយរលកកម្តៅរាលដាលកាន់តែខ្លាំងនៅអូស្រ្តាលី មនុស្សរាប់លានរងហានិភ័យ

បានផុស

៦ ខែ មុន

នៅ

ថ្ងៃព្រហស្បតិ៍ ៨ មករា ២០២៦

ដោយ

ក្រុមអ្នកពន្លត់អគ្គីភ័យ នៅថ្ងៃព្រហស្បតិ៍នេះ បានព្រមានដល់ប្រជាជនអូស្ត្រាលីរាប់លាននាក់ពីគ្រោះថ្នាក់ភ្លើងឆេះព្រៃ ខណៈប្រជាជននៅមូលដ្ឋានបានព្យាយាមពន្លត់ភ្លើងនិងមិនចាកចេញរកទីសុវត្ថិភាព ដែលបង្កឡើងដោយរលកកម្តៅដែលគ្របដណ្តប់លើប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារ Agencies/rl ឱ្យដឹងថា សីតុណ្ហភាពត្រូវបានគេព្យាករ នឹងកើនលើសពី ៤០អង្សារសេ ខណៈភ្លើងឆេះព្រៃនៅពីរតំបន់ ដែលមានទំហំជាង ៣ ០០០ហិកតា បានឆាបឆេះនៅជិតទីប្រជុំជន Longwood និង Walwa។

រហូតមកដល់ពេលនេះ ភ្លើងបានបំផ្លាញសំណង់អគារធំៗយ៉ាងហោចណាស់ពីរ ហើយត្រូវបានគេរំពឹងថា វានឹងបន្តរីករាលដាលនៅថ្ងៃសុក្រ ខណៈដែលកម្តៅ និងខ្យល់មានការកើនឡើង។

ប្រធានអាជ្ញាធរអគ្គីភ័យប្រចាំប្រទេស លោក Jason Heffernan បាននិយាយថា កម្រិតគ្រោះថ្នាក់នៃភ្លើងឆេះព្រៃនៅក្នុងតំបន់ខ្លះនៃរដ្ឋ Victoria នឹងឈានដល់ជាមហន្តរាយដ៏ធំ។

លោកបានបន្តថា៖«ភ្លើងឆេះព្រៃនេះអាចហត់ដល់តំបន់មនុស្សរស់នៅច្រើន ហើយធំណាស់ ដែលយើងមិនអាចនឹកស្មានដល់នោះទេ។ វាគឺជាអគ្គីភ័យដ៏គ្រោះថ្នាក់បំផុត ដែលអាចរំពឹងទុក ថាភ្លើងនឹងចាប់ផ្តើមឆេះកាន់ខ្លាំង និងរាលដាលកាន់តែធំ។ ហើយការសម្រេចចិត្តរកកន្លែងសុវត្ថិភាពនឹងជួយជីវិតរបស់យើង និងគ្រួសារ»។

ស្នងការគ្រប់គ្រងគ្រោះអាសន្ន លោក Tim Wiebush បាននិយាយថា ខ្យល់ក្តៅ ហើយស្ងួតនឹងបង្កជាភ្លើងឆេះព្រៃ ដែលមិនអាចទាយទុកជាមុន មិនអាចគ្រប់គ្រងបាន និងហក់មកឆាប់រហ័ស។

លោកបានប្រាប់អ្នកយកព័ត៌មានថា៖ «យើងមិនដឹងទេ ទាល់តែយើងត្រូវភ្លើងឡោមព័ទ្ធខ្លាំង ហើយមានផ្សែងខ្លាំងប៉ុណ្ណា និងស្ថានភាពកាន់តែតានតឹងខ្លាំង។ ទិដ្ឋភាពដ៏គួរឱ្យខ្លាចនេះ គួរតែគ្មានអ្នកណាម្នាក់ត្រូវឆ្លងកាត់ទេ»។

អភិបាលរដ្ឋស្តីទីនៃរដ្ឋ Victoria លោក Ben Carroll បានជំរុញប្រជាជនឱ្យរៀបចំផែនការជម្លៀសចេញ ក្នុងនោះសាលារៀនប្រហែលចំនួន ៤៥០ខ្នង នៅរដ្ឋ Victoria គ្រោងនឹងបិទនៅថ្ងៃសុក្រ។

មិនតែប៉ុណ្ណោះ មនុស្សរាប់លាននាក់នៅទូទាំងរដ្ឋដែលមានប្រជាជនច្រើនជាងគេបំផុតរបស់អូស្ត្រាលី ត្រូវបានព្រមានឱ្យរក្សាការប្រុងប្រយ័ត្នខ្ពស់ រួមទាំងនៅក្នុងទីក្រុងធំៗដូចជា Sydney និង Melbourne ផងដែរ។

គួរឱ្យដឹងផងដែរថា អូស្ត្រាលីនៅតែជាប្រទេសផលិត អ្នកនាំចេញឧស្ម័ន និងធ្យូងថ្មធំជាងគេមួយរបស់ពិភពលោក ដែលឥន្ធនៈហ្វូស៊ីលសំខាន់ទាំងពីរ ជាបញ្ហាចម្បងដែលនាំឱ្យប្រទេសនេះឧស្សាហ៍កើនកម្តៅ និងមានភ្លើងឆេះព្រៃ៕

ប្រែសម្រួល៖ ណឺ មិនា